Kare i aite ki tetai ua atu tangata, i noo ana a Iesu ei peretana vaerua ki runga i te rangi i mua ake ka anau mai ei ki runga i te enua. (Ioane 8:23) Koia te mea mua ta te Atua i anga, e kua tauturu aia i te anga mai i te au mea katoatoa rava. Koia anake ua tei anga tikaia mai e Iehova, i kapikiia ai e ko te Tamaiti “anau tai” a te Atua. Kua tavini a Iesu ei Vaa Tuatua no te Atua, no reira aia i kapiki katoaia ai e ko “te Logo.”​—Ioane 1:1-3, 14; e tatau ia Maseli 8:22, 23, 30; Kolosa 1:15, 16.

Kua tono mai te Atua i tana Tamaiti ki te enua nei na te tuku anga i tona oraanga mei te rangi ki roto i te vairanga tamariki o te paretenia ngati Iuda, ko Maria. No reira kare to Iesu metua i te tangata. (Luka 1:30-35) Kua aere mai a Iesu ki te enua nei (1) kia apii i te tuatua mou no runga i te Atua, (2) kia akanoo i tetai akaraanga no te rave i te anoano o te Atua, e te (3) kia oronga i tona oraanga apa kore ei “oko.”​—E tatau ia Mataio 20:28; Ioane 18:37.

Ko te oko, e tutaki tei orongaia ei akamatara mai i tetai tangata mei te tuikaanga. Kare te mate e te ruaine anga i te tuanga no te akakoroanga mua o te Atua no te tangata. Akapeea tatou i kite ei i te reira? Kua akakite te Atua ki te tangata mua kia Adamu e, me rave aia i ta te Pipiria i kapiki e ko te ara, ka mate aia. Naringa kare a Adamu i ara, kare rava aia e mate. Noatu e kare te oraanga o Adamu i ope ana no tetai au anere mataiti i muri mai, kua akamata aia i te mate mei te ra i akarongo kore ei aia i te Atua. (Genese 2:16, 17; 5:5) Kua iri te ara a Adamu ki runga i tona uanga katoatoa rava ei utunga no te mate. No reira i “o” mai ei te mate ki te ao o te tangata na roto ia Adamu. Te tumu ia i anoano ei tatou i tetai oko.​—E tatau ia Roma 5:12; 6:23.

Koai te ka rauka i te tutaki i te oko ei akamatara mai ia tatou mei te mate? Me mate tatou, ka tutaki tatou i ta tatou uaorai ara. Kare rava e rauka i tetai tangata apa i te tutaki i te ara a etai ke.​—E tatau ia Salamo 49:7-9.

I te mea kare a Iesu i anauia ma te tu apa ua o te metua tane tangata ua nei, kua mate ra aia kare no tana uaorai ara, mari ra no te ara a etai ke. Kua oronga mai te Atua i tana Tamaiti kia mate no tatou ei akaari i Tona aroa umere maata rava no te tangata. Kua akaari katoa a Iesu i te aroa no tatou na te akarongo anga i tona Metua e kua oronga i tona ora no ta tatou ara.​—E tatau ia Ioane 3:16; Roma 5:18, 19

Na te rapakau anga i te maki, akatu mai i tei mate, e te akaora anga i te tangata mei roto i te tu kino, kua akatutu mai a Iesu i tana ka rave i te openga, no te au tangata akono pouroa. (Luka 18:35-42; Ioane 5:28, 29) Muri ake i te matenga o Iesu, kua akaoki te Atua iaia ki te oraanga ei peretana vaerua. (1 Petero 3:18) Kua tiaki i reira a Iesu i te rima katau o te Atua e tae atu ki to Iehova oronga anga i te mana kiaia kia tutara ei Ariki ki runga i te au enua pouroa. (Ebera 10:12, 13) Teianei te tutara ra a Iesu ei Ariki i te rangi, e te akakite nei tana au pipi i runga nei i te enua i te tuatua meitaki i te ao e pini ua ake.​—E tatau ia Daniela 7:13, 14; Mataio 24:14.

Kare e roa atu, ka taangaanga a Iesu i tona mana ei Ariki i te takore takiri i te mamae pouroa e te aronga e akatupu ra i te reira. Mirioni ua atu tei taangaanga i te akarongo i roto ia Iesu e tei akarongo iaia ka rekareka i te oraanga i roto i te parataito i te enua nei.​—E tatau ia Salamo 37:9-11.