E Akaaerenga ainei ta te Atua?

TE KITE papuia nei te tu mako o te au mea angaia a te Atua i te au ngai ravarai. Te akaariia maira te reira i roto i te au mea angaia, e te akaari katoa maira te Pipiria e e tu mako tikai to roto i te ao vaerua, tei rotai ki te akakoroanga o Tei Anga mai. Kua kite atu te peroveta ko Daniela i roto i tetai orama tetai urupu angera maata i te paepae o te Atua i runga i te rangi: “Kua tausani oki te tausani anga i te tavini anga kiaia, e kua ngauru oki te tausani anga i te manotini i te tu anga ki mua iaia.” (Daniela 7:9, 10) Akamanako ana i tetai akaaerenga tei akanooia kia rauka i teia urupu angera maata tere atu i te anere mirioni—i te aru e te rave i ta te Atua i akakite kia ratou kia rave no tona au tavini i te enua nei!​—Salamo 91:11.

Noatu e ko te Atua ko Iehova Tei Anga mai, te Akaaere Teitei Rava Atu, kare ra aia e maro pakari ana e te tureture maata. Inara, e Atua pumaana aia e te mataora, te manako maata maira e kia mataora te oraanga o tana au mea angaia. (1 Timoteo 1:11; 1 Petero 5:7) Te kite papuia nei teia mei te mataara e akono ra aia i te iti tangata Iseraela i taito e te au Kerititiano i te anere mataiti mua.

Iseraela i Taito—E Iti Tangata Mako Tikai

Kua taangaanga te Atua ko Iehova ia Mose kia akaaere i to Iseraela no te akamorianga mou. Akamanako ana i te akanoonooanga no te au puakapa i to ratou noo poto anga i roto i te metepara i Sinai. Naringa te au pamiri i akatikaia kia akatu i to ratou puakapa i ta ratou ngai ua atu ka inangaro, papu e ka tupu te oripu ua. Kua oronga a Iehova i te au ikuikuanga taka meitaki ki te iti tangata i te ngai ka akanoo ei te kopu tataki tai i to ratou puakapa. (Numero 2:1-34) Tei roto katoa i te au Ture a Mose te au ture no te turanga ma e te oraanga kopapa​—ei akaraanga te tanu anga i te repo tangata.​—Deuteronomi 23:12, 13.

Te tomo anga te ngati Iseraela ki roto i te Enua Taputou, kua riro ana ratou ei iti tangata mako tikai i roto i te au turanga ravarai. Kua akanooia te iti tangata i roto i te 12 kopu, e kua orongaia tetai enua ki te kopu tataki tai. Tei roto i te Ture ta Iehova i oronga ki te iti tangata na roto ia Mose te au turanga ravarai o te oraanga o te iti tangata​—te akamorianga, akaipoipo, pamiri, apii, pitiniti, kaikai meitaki, tanu kai, akono anga i te au manu, e te vai atura. * Noatu e e pakari e te maata te au ture, te akaari ra a Iehova i tona inangaro no tona iti tangata e kia mataora ratou. Na te aru anga i teia au akanoonooanga aroa, kua mataora te ngati Iseraela i ta Iehova turuturuanga puapinga.​—Salamo 147:19, 20.

E tika e arataki karape a Mose, inara me ka puapingaia aia me kare, tei runga ia i tona tu tiratiratu ki ta te Atua akaaerenga, kare no tana arataki anga karape. Ei akaraanga, akapeea a Mose te ikianga i te mataara ka aere na roto i te metepara? Kua oronga mai a Iehova i te mataara na roto i te pou tumurangi i te ao e te pou ai i te po. (Exodo 13:21, 22) Noatu e kua taangaanga te Atua i te tangata, na Iehova uaorai i akaaere e i arataki i tona iti tangata. E tika katoa te reira i te anere mataiti mua.

 E Mako Tikai te Au Kerititiano Mua

No te tutu anga maroiroi a te au apotetoro e te au pipi, kua akatumuia te au putuputuanga Kerititiano i roto i te au tuanga maata o Asia e Europa i te anere mataiti mua. Noatu e kua totoa teia au putuputuanga i te au ngai ravarai, kare ra ratou i te au pupu takake. Kua akanoo meitakiia ratou, e te puapingaia ra ratou mei te akaaerenga aroa a te au apotetoro. Ei akaraanga, kua tuku te apotetoro ko Paulo ia Tito ki Kereta “kia akanoo meitaki i te au mea ravarai i reira.” (Tito 1:5, The Jerusalem Bible) Kua tata a Paulo ki te putuputuanga Korinetia e e “au mana akaaere anga” to tetai au taeake me kore “e aronga akaaere.” (1 Korinetia 12:28, The New Testament in Modern Speech; The Bible in Contemporary Language) Inara, naai i oronga mai te reira akanoonooanga? Kua akakite a Paulo e “na te Atua i akanoo,” me kore i “akaaere,” i te putuputuanga.​—1 Korinetia 12:24; The Riverside New Testament.

Kare te au akaaere ikiia i roto i te putuputuanga Kerititiano i te au pu akaaere i rungao i te au taeake irinaki. Inara, e aronga “tauturu” ratou te aru ra i te arataki anga a te vaerua o te Atua, e te umuumuia ra ratou ei ‘akaraanga no te anana.’ (2 Korinetia 1:24; 1 Petero 5:2, 3) Ko Iesu Karaiti tei akatu akaouia mai te tavini ra ei ‘upoko no te ekalesia,’ kare ra ko te tangata noa ua nei me kore ko tetai pupu tane apa.​—Ephesia 5:23.

Te akamataanga te putuputuanga i Korinetia i te rave i te au mea tei tuke mei te tu e rave ana tetai au putuputuanga i te akatikatika anga i te au manamanata, kua tata a Paulo e: ‘Eaa? No ko na mai ia kotou te tuatua a te Atua? E ko kotou anake aina tei taea atu e taua tuatua ra?’ (1 Korinetia 14:36) Kua taangaanga a Paulo i teia uianga ei akamanako anga na ratou i te akatikatika i to ratou manako, e kia tauturu ia ratou kia marama kia kore e angaanga takake. Kua tupu meitaki e kua puapingaia te au putuputuanga te aru anga i te arataki anga a te au apotetoro.​—Angaanga 16:4, 5.

Akaari Anga to te Atua Aroa

Akapeea ra i teia tuatau? Ka emiemi tetai pae i te piri atu ki tetai akaaereanga akonoanga. Inara te akaari maira tetai au akapapu anga Pipiria e e kua taangaanga ua ana te Atua i tana akaaerenga iaia e rave ra i tona akakoroanga. Kua akanoo meitaki aia i tona aronga akamori i Iseraela taito, e kua akaaere i te au Kerititiano mua i roto i ta ratou akamorianga.

No reira kare ainei i te mea tau kia taopenga e te arataki nei rai te Atua ko Iehova i tona iti tangata, mei tana rai i rave ana i te tuatau i topa? Ae, te akaere anga e te taokotai anga i tona aronga akamori, te akaari maira aia i tona aroa takinga meitaki no ratou. Te taangaanga nei a Iehova i teia tuatau i tana akaaerenga i te akatupu i tona akakoroanga no te au tangata. Akapeea i kiteaia ai tana akaaerenga? Akamanako ana i te au kaveinga ka aru mai.

▪ Akaaereia te au Kerititiano mou ei akaoti i tetai angaanga. (Mataio 24:14; 1 Timoteo 2:3, 4) Kua akaue a Iesu i tana au pipi kia tutu aere i te tuatua meitaki o te Patireia ki te au pa enua, e angaanga ngata i te rave me kare e akaaerenga i te ao katoa. Ei akatutu anga, mama ua ia koe te angai e tai tangata, inara me ka angai koe e tauatini ua atu au tangata, me kore mirioni, ka anoano koe i tetai pupu tangata akaaere meitakiia e te mako i te angaanga. Ei akatupu anga i ta ratou angaanga, ka tavini te au Kerititiano mou ma te “manako okotai,” me kore “taokotai anga i roto i te angaanga a te [Atua].” (Zephania 3:9; Byington) Ka rauka ainei i tetai iti tangata tukeke, reo tukeke, e te au tu tangata tukeke i te angaanga kapiti me kare e akaaerenga taokotai e te rotai? Kare.

▪ Kua akaaere meitakiia te au Kerititiano mou kia turuturu e kia akamaroiroi i tetai e tetai. Ka iki te tangata karape kake maunga i te ngai ka kake ei aia, e kare aia e anoanoia i te akono atu i tetai ke kare e tuakatau ana i te kake maunga. Inara me tupu te kino kiaia me kore ka o aia ki roto i tetai turanga ngata, ka kino aia no te mea kare e tangata i reira ei tauturu  iaia. Kare i te mea meitaki no tetai i te akatakake iaia. (Maseli 18:1) E rauka ai i te au Kerititiano i te rave i te akauenga a Iesu, ka tauturu e ka turuturu ratou i tetai e tetai. (Mataio 28:19, 20) Ka oronga te putuputuanga Kerititiano i te ikuiku anga Pipiria, te tereni anga, e te akamaroiroi anga ka anoanoia no te katoatoa kia maroiroi ua atu rai e kia kore e tuku i te au. Ka aere tetai kiea kia apiiia e to Iehova arataa me kare e au uipaanga Kerititiano e akaaere meitakiia kia rauka tetai ikuikuanga e te akamorianga?​—Ebera 10:24, 25.

▪ Kua akaaere meitakiia te au Kerititiano mou kia tavini taokotai i te Atua. I ta Iesu mamoe e akarongo ra ki tona reo, ka riro mai ratou ei ‘okotai anana,’ i raro ake i tana arataki anga. (Ioane 10:16) Kare ratou i totoa aere i roto i te au akonoanga e te au pupu akatakake; kare katoa ratou i akaveeia e te au apiianga tarevake. Mari ra te “tuatua okotai” ra ratou ravarai. (1 Korinetia 1:10) E rauka ai i te noo taokotai, ka anoano tatou i tetai akanoonoo anga mako, te umuumuia ra tetai akaaerenga. Ko te taokotaianga aroa o te au taeake anake ua e rauka mai ei te akameitaki anga a te Atua.​—Salamo 133:1, 3.

No te aroa ngakau tae i te Atua e te inangaro i te tuatua mou Pipiria i taokotai mai ei i te mirioni ua atu tangata. Ei iti tangata akaaere meitakiia e te taokotai, te aruaru nei te Au Kite o Iehova i te ao katoa i te rave i to te Atua anoano. Kua akapapu ia kia ratou tana taputou: “E noo tikai au i roto ia ratou, e aaere au i roto ia ratou; e ei Atua au no ratou, e ei tangata oki ratou noku.” (2 Korinetia 6:16) Ka rauka katoa ia koe teia akameitakianga manea me akamori koe i te Atua ko Iehova ma tona akaaerenga.

[Tataanga Rikiriki i Raro]

[Tutu i te kapi 23]

Kua akanoonoo meitakiia te au puakapa o te ngati Iseraela

[Au Tutu i te kapi 24, 25]

Umuumuia tetai akaaerenga no te rave i te tutuanga i te ao katoa

Tutu anga mei tera are ki tera are

Tauturu tumatetenga

Au akaputuputuanga

Akatu anga are no te akamorianga