Apii mei te Tuatua a te Atua

Eaa to te Atua Akakoroanga no te Enua?

Te ui nei teia atikara i te au uianga penei tei ui ana koe, e te akaari maira i te ngai ka rauka ia koe te tatau i te au pauanga i roto i taau Pipiria. Ka rekareka te Au Kite o Iehova i te uriuri i teia au pauanga kia koe.

1. Eaa to te Atua akakoroanga no te enua?

Ko te enua te kainga o te tangata. Muri ake te angaia anga te au angera kia noo ki runga i te rangi, kua anga te Atua i te tangata kia mataora i te enua nei. (Iobu 38:4, 7) Kua tuku a Iehova i te tangata mua ki roto i tetai kainga manea tei kapikiia e ko Edene, e kua oronga kiaia e tana uanga no te tuatau ki mua te manakonako anga kia mataora i te oraanga mutu kore i runga i te enua.​—Genese 2:15-17; e tatau ia Salamo 115:16.

Ko tetai tuanga ua o te enua te kainga i Edene. Ka anau tamariki te nga tokorua mua ko Adamu raua ko Eva. E maata maira te pamiri tangata, kia tatanu ratou i te enua e kia akariro i te reira ei parataito. (Genese 1:28) Kare rava te enua e takoreia.​—E tatau ia Salamo 104:5.

2. Eaa ra te enua kare i riro ei parataito i teianei?

Kua akarongo kore a Adamu raua ko Eva i te Atua e kua tuaruia atu raua ki vao i te kainga i Edene. Kua ngaro te parataito, e kare i rauka i tetai tangata i te akaoki akaou mai i te reira. Kua karanga te Pipiria e: “Kua orongaia te enua ki te rima o te aronga kino.”​—Iobu 9:24; e tatau ia Genese 3:23, 24.

Inara, kare a Iehova i akangaropoina i tana akakoroanga mua no te tangata katoatoa, e ka akatupu rai te Atua i tana i akakoro. (Isaia 45:18) Ka akaoki akaou mai aia i te au iti tangata mei te tu rai i akakoro ei aia i mua ana.​—E tatau ia Salamo 37:11.

3. Akapeea ra te Atua me akaoki akaou mai i te au ki te enua nei?

E rekareka ai te au tangata i te au, ka tamate te Atua i te aronga kino na mua. Me tupu te tamaki i Aramakito, ka takore atu te au angera a te Atua i te aronga tei patoi i te Atua. Ka tapekaia a Satani no tetai 1,000 mataiti, e ko te aronga te inangaro ra i te Atua ka ora mai e ka mataora i tetai akatereanga ou o te au mea i te enua nei.​—E tatau ia Apokalupo 16:14, 16; 20:1-3; 21:3, 4.

  4. Aea e ope ei te mamae?

I te tuatau o te 1,000 mataiti ka tutara a Iesu mei te rangi mai ki runga ake i te enua e ka akaoki akaou mai i te parataito. Ka takore katoa aia i te au ara a te aronga e inangaro ra i te Atua. Ka takore atu a Iesu i te maki, te ruaine, e te mate.​—E tatau ia Isaia 11:9; 25:8; 33:24; 35:1.

Aea te Atua e takore ei i te kino i te enua nei? Kua oronga mai a Iesu i te “akairo” i te akakite i te taime e vaitata mai ei te openga. Te takino nei te au turanga o teianei ao i te oraanga o te au tangata e te akaari maira e te noo nei tatou i “te openga o teianei ao.”​—E tatau ia Mataio 24:3, 7-14, 21, 22; 2 Timoteo 3:1-5.

5. Koai ma ka noo i roto i te parataito a te tuatau ki mua?

Kua akaue a Iesu i tana au pipi kia akariro i te au tangata ei pipi e kia apii ia ratou i to te Atua au mataara aroa. (Mataio 28:19, 20) Te akapapa nei a Iehova i te au mirioni ua atu tangata i te ao katoa kia ora i roto i te akatereanga ou o te au mea i te enua nei. (Zephania 2:3) I ko i te au Are Uipaanga Patireia o te Au Kite o Iehova, te apii ra te au tangata e akapeea e riro mai ei ei au tane e ei au metua tane meitaki atu, e akapeea e riro mai ei ei au vaine e ei au metua vaine meitaki atu. Te apii kapiti ra te au metua e te tamariki i te au tumu apiianga kia irinaki i tetai oraanga meitaki atu i te tuatau ki mua.​—E tatau ia Mika 4:1-4.

Ka aravei atu koe i te au tangata e inangaro ra i te Atua e te inangaro ra i te apii i te akamareka iaia i ko i te Are Uipaanga Patireia.​—E tatau ia Ebera 10:24, 25.

No tetai akakite anga maata atu, akara i te pene 3 o teia puka, Eaa Tikai ta te Pipiria e Apii Maira?, neneiia e te Au Kite o Iehova.