Ka Ui ta Tatou Aronga Tatau . . .

Ka Aere Ainei te au Kerititiano Akarongo Mou ki te Rangi?

▪ Maata tei tatau i ta Iesu au tuatua akapumaana e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Te tuatua ra ainei a Iesu e ka aere te aronga akamori mou pouroa o tona Metua, te Atua ko Iehova ki te rangi, kia rekareka tikai i te oraanga mutu kore?

Akara ana i te akakiteanga akakeu anga a Iesu e: “Kare rava e tangata i tae ki runga i te rangi, mari ra ko tei aere mai ki raro mei runga mai i te rangi ra, ko te Tamaiti a te tangata.” (Ioane 3:13) Te akakite maira teia e kare te aronga akamori mou i te tuatau i topa, mei ia Noa, Aberahama, Mose, e Davida, i aere ki runga i te rangi. (Angaanga 2:34) Kua aere ra ratou kiea? Pauanga poto: Tei roto rai te aronga akarongo mou i taito i te vaarua mate, te moe ra, kare e tuatua mai, te tapapaanga no te akatuakaou anga.​—Koheleta 9:5, 6; Angaanga 24:15.

Ko Iesu te tangata mua tei taiku mai, e ka noo tetai pae i te rangi i muri ake to ratou mate anga. Kua akakite aia ki tana au apotetoro e ka akapapa aia i tetai ngai no ratou i runga i te rangi. (Ioane 14:2, 3) E mea ou teia ki te iti tangata o te Atua. Kua akamarama mai te apotetoro ko Paulo i muri mai e, muri ake i to Iesu mate anga e te tuakaouanga ki te rangi, ‘kua akatapu a Iesu i te ara ou e te ora no tana au pipi’​—tei kare rava tetai i aere ana i mua ana.​—Ebera 10:19, 20.

Ko te aiteanga ainei e mei te reira taime mai ka aere te aronga akarongo mou pouroa ki te rangi? Kare, no te mea te kapiti maira te tuakaouanga ki te rangi tetai angaanga te ka oronga uaia ki tetai au tangata. To ratou aiai openga, kua akakite a Iesu ki tana au apotetoro e ka ‘noo ratou ki rungao i te au terono ei au akava’ i tona Patireia i te rangi. Ta ratou angaanga, te tutara kapiti anga kia Iesu i te rangi.​—Luka 22:28-30.

I te pae mai i te au apotetoro, ka oronga katoaia teia angaanga umere ki tetai au tangata. I roto i tetai orama, kua kite atu a Ioane ia Iesu e tetai pupu tangata tei akatuakaouia ki te rangi e tei akatakaia ‘ei patireia e te kau taunga kia tutara i rungao i teianei ao.’ (Apokalupo 3:21; 5:10) Eaa te maata ia ratou i reira? Mei roto rai i te au kavamani pouroa, e tokoiti ua numero e akaaere ra. Pera katoa teia Patireia i te rangi. Ka tutara kapiti a Iesu, te Mamoe a te Atua, ma te 144,000 tei ‘okoia no roto i te tangata nei.’​—Apokalupo 14:1, 4, 5.

E tika, e numero meangiti ua te 144,000 me akaaiteia atu ki te numero o te aronga akarongo mou pouroa, i te tuatau i topa e i teia tuatau. Te maramaia atu nei teia no te mea kua akatuakaouia te 144,000 ki te rangi no tetai angaanga tapu. Me akatu koe i tetai are, ka iki ainei koe i te aronga akatu are karape pouroa i toou ngai? Kare. Ka anoano ua koe tetai pae no te angaanga e umuumuia ra. Mei te reira rai, kare te aronga akarongo mou pouroa e ikiia e te Atua no teia angaanga umere, te tutara kapiti anga e Karaiti i te rangi.

Ka akatupu teia kavamani i te rangi i te akakoroanga mua o te Atua no te au tangata. Ka akaaere a Iesu e tona aronga tutara e 144,000 i te akaou anga i te enua ei parataito i te ao katoa, e ka noo mataora te urupu maata o te aronga akarongo mou e tuatau ua atu. (Isaia 45:18; Apokalupo 21:3, 4) Ka kapitiia mai te aronga i roto i to te Atua manako te ka akatuakaouia mai.​—Ioane 5:28, 29.

Ka rauka i te aronga akarongo mou e akamori ra ia Iehova—te tuatau i topa e teia tuatau—te apinga aroa umere no te oraanga mutu kore. (Roma 6:23) Ka rauka i te tokoiti te oraanga i te rangi no tetai angaanga puapinga, e te maataanga te oraanga i te enua parataito i te ao katoa nei.