Totou 1. Ngaruerue Enua

‘Ngaruerue enua maata.’​—LUKA 21:11.

● Kua uutiia mai a Winnie e tai e te apa ona mataiti, mei roto mai i te au toka pururu i Aiti. Kua akarongo atu te pupu angaanga tivi e ripoti ra i tana aue. Kua ora mai aia i te ngaruerue enua, inara kua mate tona nga metua.

EAA TA TE AU TUPUANGA E AKAARI MAIRA? Te tupu anga te ngaruerue enua e 7.0 te ririnui i Aiti i roto ia Tianuare 2010, maata atu i te 300,000 tangata tei mate. Kapiti mai e 1.3 mirioni tangata kare e kainga. Noatu te kino tikai o te ngaruerue enua, kare te reira i tupu ua i Aiti. Kua tupu ana mei tetai 18 ngaruerue enua mamaata i te ao katoa mei ia Aperira 2009 kia Aperira 2010.

EAA TE TUPUANGA MATAUIA? Kare tatou e na roto nei i te ngaruerue enua maata; no te tekinoroti ou, mari ra kua maata atu to tatou marama i te reira i to te au tangata i te tuatau i topa.

TAU AINEI TEIA TUPUANGA? Akamanako ana i teia tumu: Kare te Pipiria e akataka mai ana i te numero o te au ngaruerue enua i te tuatau openga. Inara, te karanga ra te reira e ka tupu te ‘ngaruerue enua maata i tera ngai e tera ngai,’ te akariro anga te reira ei tuanga maata no teia tuatau puapinga o te tuatua enua.​—Mareko 13:8; Luka 21:11.

EAA TOOU MANAKO? Te kite ra ainei tatou i te au ngaruerue enua maata, mei ta te Pipiria e totou ra?

Penei kare te ngaruerue enua anake ua i te akapapuanga openga e te noo nei tatou i te tuatau openga. Mari ra, ko tetai ia o te totou tei akatupuia. Akamanako ana i te ka aru mai.

[Tataanga i te kapi 4]

“Kapiki ra matou [te aronga apii reva] i te reira ei au ngaruerue enua maata. Kapiki ra te katoatoa i te reira ei au mea kino tikai.”​—KEN HUDNUT, U.S. GEOLOGICAL SURVEY.

[Akameitakianga no te Tutu i te kapi 4]

© William Daniels/​Panos Pictures