Totou 4. Kare e Aroa Natura

‘Kare o te au tangata aroa natura no to ratou pamiri.’​—2 TIMOTEO 3:1-3, God’s Word Bible

● E angaanga ana a Chris na tetai pupu tauturu i te aronga e takinokinoia ra i roto i te ngutuare i North Wales. “Maara iaku tetai vaine tei aere mai ki konei ia matou, tei papa kinoia e kare au i kite ana e koai aia mei taku i kite openga ana iaia,” i karanga ai a Chris. “Tetai au vaine kua kino tikai i te pae manako e kare rava ratou e akara tika mai ana kia koe.”

EAA TA TE AU TUPUANGA E AKAARI MAIRA? I tetai enua o Aperika, mei te 1 i roto i te 3 vaine tei taknoia i te pae ainga mei te tamariki anga mai. Tetai kimikimianga tei raveia i taua enua ra kua kiteaia mai e maata atu i te toru tuanga o te au tane kua manako e te tano ua ra me papaia ratou e ta ratou vaine. Inara, kare ko te vaine ua te takinokinoia ra i roto i te ngutuare. Ei akaraanga i Kanata, vaitata rai e 3 i roto i te 10 tane tei papaia me kore tei takinoia e to ratou patana.

EAA TE TUPUANGA MATAUIA? I tupu ua ana te takinokino anga i roto i te ngutuare. Te akaraia nei te reira i teia tuatau mei tei kare i akaraia ana i te tuatau i topa.

TAU AINEI TEIA TUPUANGA? Te akara maataia ra te takinokino anga i roto i te ngutuare i te rau ngauru mataiti i topa akenei. Inara, kua iti mai ainei te takinokino anga i roto i te ngutuare no te mea te akara maataia ra te reira? Kare, kare e tupu ana te reira. Te maata atura te tu kare e aroa natura.

EAA TOOU MANAKO? Kua akatupuia ainei a 2 Timoteo 3:1-3? Te kore ra ainei te aroa natura o te manganui no to ratou pamiri?

Te rima o te totou e kite ra koe te akatupuia ra no runga i te kainga, e te enua. Akamanako eaa ta te Pipiria i akakite mai no runga i teia tumu tuatua.

[Tataanga i te kapi 7]

“Kua kiteaia mai te takinokino anga i roto i te ngutuare e ko te mea kino roa atu tei ripotiia mai no te au mea kino i roto i te oraanga tangata. Kua taiaia tetai vaine e tona patana e 35 taime i mua ake ka ringiia ai te akava.”​—A SPOKESWOMAN FOR WALES DOMESTIC ABUSE HELPLINE.