Totou 6. Tutu Anga i te Ao Katoa
Totou 6. Tutu Anga i te Ao Katoa
“E tutu aereia te evangelia o te basileia nei, e kako rava ake te ao katoa nei.”—MATAIO 24:14.
● E noo ana a Vaiatea ki runga i tetai enua i vao ake i te Patipika i te Tuamotu Archipelago. Noatu vaitata rai e 80 motu i te Tuamotu, maata atu i te 310,000 kuea maire te atea (802,900 kuea kiro mita), te nooia ra e tetai 16,000 tangata. Inara, kua araveiia atu a Vaiatea e tona au tangata tupu e te Au Kite o Iehova. No teaa ra? No te mea te inangaro ra te Au Kite i te oronga i te tuatua meitaki o te Patireia o te Atua ki te au tangata pouroa—noatu eaa te ngai e noo ra ratou.
EAA TA TE AU TUPUANGA E AKAARI MAIRA? Te taeria nei e te karere Patireia i te au ope o te enua i te ao katoa. I te mataiti 2010, kua akapou te Au Kite o Iehova i runga atu i te 1.6 pirioni ora no te akakitekiteanga i teia tuatua meitaki ki te 236 enua. E rave ana e tai Kite, mei tetai 30 miniti i roto i te angaanga tutu anga i te au ra tataki tai. I te rau ngauru mataiti i topa akenei, kua nenei e kua tua aere ratou maata atu i te 20 pirioni puka no te apiianga i te Pipiria.
EAA TE TUPUANGA MATAUIA? Kua tutu aereia ana te karere Pipiria no tetai au tauatini mataiti.
TAU AINEI TEIA TUPUANGA? E tika, kua tutu aere ana te manganui no runga i te karere Pipiria. Inara, kua rave ana te maataanga i te reira no tetai tuatau poto ua e kare i te ngai maata. Te tuke ra, te akatupu nei te Au Kite o Iehova i tetai kamupeini tutu anga i te ao katoa ma te tau tikai, te taeria ra te anere mirioni ua atu tangata. Kua akakoromaki ana te Au Kite i te angaanga orometua noatu te patoi anga pakari mei te akaaereanga ririnui e te kino tikai i roto i te tuatua enua. * (Mareko 13:13) Tei maata atu, kare te Au Kite o Iehova e tutakiia ana no ta ratou angaanga tutu anga. Mari ra, te oronga puareinga ua ra ratou i to ratou taime, e te oronga ra i ta ratou puka ma te kore e tutaki. Te turuturuia ra ta ratou angaanga e te moni tauturu.
EAA TOOU MANAKO? Te ‘tutu aereia ra ainei te evangelia o te basileia’ i te ao katoa? Ko te aiteanga ainei o te akatupu anga o teia totou e e apinga meitaki atu tetai i mua ia tatou?
[Tataanga Rikiriki i Raro]
^ para. 6 No tetai atu au akakiteanga, akara i te vitio e toru “Faithful Under Trials,” “Purple Triangles,” e te “Au Kite o Iehova Stand Firm Against Nazi Assault,” tei tua aereia e te Au Kite o Iehova.
[Tataanga i te kapi 9]
“Me te akatika maira a Iehova i te tuatau, ka tutu maroiroi ua atu rai tatou i te tuatua meitaki o te Patireia, te taangaanga anga i te au atianga ravarai kia itae atu i te au tangata.”—2010 YEARBOOK OF JEHOVAH’S WITNESSES.