Apii Mei te Tuatua a te Atua
Akapeea Tatou me Iki i te Au Oa Meitaki?
Te ui nei teia atikara i te au uianga penei tei ui ana koe, e te akaari maira i te ngai ka rauka ia koe te tatau i te au pauanga i roto i taau Pipiria. Ka rekareka te Au Kite o Iehova i te uriuri i teia au pauanga kia koe.
1. Eaa te tumu ka iki ei tatou i te au oa meitaki?
Maataanga i te tangata, inangaro ratou kia arikiia mai e etai ke. E riro ana teia tu ei akakeu ia tatou kia aru i te tu o etai ke. No reira e ririnui te akakeuanga a to tatou au oa ki runga i te au tu e tupu mai ana mei roto i te ngakau. No reira ka riro te au oa ta tatou ka iki ei akakeuanga pakari ki runga i te tu tangata ka riro mai tatou.—E tatau ia Maseli 4:23; 13:20.
E matakite ana a Davida, te tata Pipiria akauruia, me iki i tona au oa. E piri ana aia ki te aronga e tauturu ana iaia kia vai tiratiratu ei tavini no te Atua. (Salamo 26:4, 5, 11, 12) Ei akaraanga, e reka ana a Davida i te pirianga oa kia Ionatana no te mea e akamaroiroi ana a Ionatana iaia kia irinaki ia Iehova.—E tatau ia 1 Samuela 23:16-18.
2. Akapeea ra koe e riro ei ei oa no te Atua?
Noatu e mana katoatoa a Iehova, ka rauka ia tatou kia riro mai ei oa nona. Ei akaraanga, kua riro a Aberahama ei oa no te Atua. Kua irinaki e kua akarongo a Aberahama ia Iehova, e no reira kua akariro a Iehova iaia ei oa nona. (Genese 22:2, 9-12; Iakobo 2:21-23) Me irinaki tatou ia Iehova e me rave i tana e pati maira ia tatou kia rave, ka riro katoa mai tatou ei au oa no te Atua.—E tatau ia Salamo 15:1, 2.
3. Akapeea koe e puapinga ai mei te au oa meitaki?
E tiratiratu te au oa mou tikai e ka tauturu ia koe kia rave i te mea tika. (Maseli 17:17; 18:24) Ei akaraanga, noatu e mei te 30 o Ionatana mataiti i pakari ake ia Davida, e nona tikai te taoonga ariki o Iseraela, kua turuturu tiratiratu rai aia ia Davida e koia tei ikiia e te Atua ei ariki. Tu mataku kore katoa to te oa piri mou i te akatikatika ia koe me kite ratou e te rave ra koe i tetai angaanga neneva. (Salamo 141:5) Te au oa tei inangaro i te Atua, ka tauturu ia koe kia akatupu i te au tu memeitaki.—E tatau ia 1 Korinetia 15:33.
Ka aravei koe i te au tangata mei ia koe rai te inangaro i te mea tika i ko i te Are Uipaanga Patireia o te Au Kite o Iehova. Ka kite koe i te au oa ka akamaroiroi mai ia koe i roto i taau tautaanga kia akamareka i te Atua.—E tatau ia Ebera 10:24, 25.
Tetai taime ra, e riro ana te au oa e inangaro ana i te Atua i te akataitaia ia tatou. Eiaa e riri vave ua i to ratou tarevake. (Koheleta 7:9, 20-22) E akamaara e kare e oa apa kore, e te au oa e inangaro ana i te Atua, e puapinga maata tikai ratou kia tatou. Te raurau maira te Tuatua a te Atua ia tatou kia akakore atu i te tarevake o to tatou au oa Kerititiano.—E tatau ia Kolosa 3:13.
4. Peea me patoi mai te “au oa” ia koe?
Manganui te tangata e kite ana e me rauka to ratou tauturu kia marama i te Tuatua a te Atua, e patoi ana to ratou au oa takere ia ratou. Penei kare taua au oa e marama ana i te au ako tau e te manakonakoanga papu taau i kite i roto i te Pipiria. Penei ka rauka ia koe te tauturu ia ratou.—E tatau ia Kolosa 4:6.
Tetai aronga, penei ka aviri mai te “au oa” i te tuatua meitaki i roto i te Tuatua a te Atua. (2 Petero 3:3, 4) Penei ka aviri tetai papaki i taau tautaanga kia rave i te mea tika. (1 Petero 4:4) Me tupu te reira kia koe, penei ka anoanoia koe kia iki i rotopu ia ratou ei oa, me ei oa no te Atua. Me iki koe kia riro ei oa no te Atua, kua iki koe i te oa meitaki rava atu. —E tatau ia Iakobo 4:4, 8.
No tetai akakiteanga maata atu, akara i te pene 12 e te 19 o teia puka, Eaa Tikai ta te Pipiria e Apii Maira?, tei neneiia e te Au Kite o Iehova.