Te ui nei teia atikara i te au uianga penei tei ui ana koe, e te akaari maira i te ngai ka rauka ia koe te tatau i te au pauanga i roto i taau Pipiria. Ka rekareka te Au Kite o Iehova i te uriuri i teia au pauanga kia koe.

1. Eaa ra tatou ka akarongo ei ki te Atua?

E mea tau kia akarongo tatou ki te Atua​—nana i anga mai ia tatou. E akarongo ua ana rai a Iesu ki te Atua. (Ioane 6:38; Apokalupo 4:11) Oronga mai te au ture a te Atua i tetai mataara i te akapapu i to tatou inangaro iaia.​—E tatau ia 1 Ioane 5:3.

Pouroa te au ture a te Atua, e meitaki te reira no tatou. Apii mai ia tatou i te arataa meitaki rava atu no te oraanga i teianei, e te akaari mai e akapeea e rauka ai ia tatou te tutaki mutu kore a te tuatau ki mua.​—E tatau ia Salamo 19:7, 11; Isaia 48:17, 18.

2. Akapeea te au ture a te Atua i puapinga ai no to tatou oraanga kopapa?

Te ture a te Atua no te kona kava, ka paruru ia tatou mei te au maki kikino e te tumatetenga. Mea kino te inu nui i te kava, ka taki atu te reira ki te au peu neneva. (Maseli 23:20, 29, 30) Akatika te Atua kia inu tatou i te kava, kia tau ua ra.​—E tatau ia Salamo 104:15; 1 Korinetia 6:10.

Te akamatakite katoa maira a Iehova ia tatou i te vareae, te riri otooto, e tetai atu au tu kikino. Me akono tatou i tana akoanga, ka puapingaia to tatou oraanga kopapa.​—E tatau ia Maseli 14:30; 22:24, 25.

3. Akapeea te ture a te Atua i te paruru anga ia tatou?

Arai te ture a te Atua i te ainga i vao ake i te akaipoipo. (Ebera 13:4) Te au tokorua e akono ana i teia ture, tinamou atu to ratou turanga ponuiaau e ta ratou tamariki. I tetai tua, e akatupu mai ana te ainga i vao ake i te akaipoipo i te maki viivii, te kopaeanga, te ta ua, te mamae ngakau, e te au pamiri takaua.​—E tatau ia Maseli 5:1-9.

Na te kopae anga i te au turanga te ka timata ia tatou kia o ki roto i te ainga i vao ake i te akaipoipo, ka paruruia to tatou pirianga oa ki te Atua. Ka kopae katoa tatou i te takino atu i etai ke.​—E tatau ia 1 Tesalonia 4:3-6.

  4. Akapeea te akangateitei anga i te oraanga i puapinga ai no tatou?

Te aronga akangateitei i ta te Atua apinga aroa ua o te oraanga, meitaki to ratou oraanga kopapa me akamutu i te kai avaava e tetai atu au tu viivii ka takino i te oraanga. (2 Korinetia 7:1) Mea akaperepere katoa na te Atua te oraanga o te pepe e tupu maira i roto i te vairanga. (Exodo 21:22, 23) No reira auraka tatou e ta ua i tetai pepe kare i anauia ake. Te aronga akaperepere i to te Atua manako no te oraanga, e akapapu ana e kia paruruia ratou i te ngai angaanga, i te kainga, e i roto i te motoka. (Deuteronomi 22:8) Tetai, kare ratou e takino ana i to ratou oraanga no te tarekareka ua nei, no te mea e apinga aroa ua te reira no ko i te Atua.​—E tatau ia Salamo 36:9.

5. Akapeea te tu tapu o te toto i puapinga ai no tatou?

E mea tapu te toto, no te mea te karanga maira te Atua e te akatutu ra te reira i te oraanga, me kore i te meta o tetai mea ora. (Genese 9:3, 4) Ka puapingaia tatou e te ture a te Atua, tei akaaiteite i te puapinga o te toto ki to te oraanga. Akapeea ra? Na te reira i rauka ai te akakoreanga ara.​—E tatau ia Levitiku 17:11-13; Ebera 9:22.

Puapinga maata rava atu te toto o Iesu no te mea e tangata apa kore aia. Kua oronga a Iesu i tetai mea tei akatutu mai i tona oraanga​—tona toto. (Ebera 9:12) Na tona toto tei maringi i rauka ai ia tatou te manakonakoanga no te oraanga mutu kore.​—E tatau ia Mataio 26:28; Ioane 3:16.

No tetai akakiteanga maata atu, akara i te pene 12 e te 13 o teia puka, Eaa Tikai ta te Pipiria e Apii Maira?, tei neneiia e te Au Kite o Iehova.