ME AKAKITE mai tetai tangata kia koe e, “Kare e roa atu ana kare e tumatetenga akaou,” ka akapeea atu koe? Penei ka karanga koe e, “Te moemoea ua ra koe. E tuanga te au tumatetenga no te oraanga.” Me kore penei ka manako koe kia koe uaorai e, ‘Koai tana e akavare maira?’

Noatu te akaraanga e ka tupu ua atu rai te au tumatetenga, e tumu tetai kia manakonako atu e ka taui te reira. Kare te tauianga no roto mai i te tautaanga a te tangata. Kare te tangata e marama tikai e akapeea, e no teaa ra i tupu ei teia au mea, e pera katoa i te akaaere me kore i te taui i te reira. Kua tata te Ariki ko Solomona o Iseraela i taito, tei kite matauia no tona tu pakari e no tana i kite e: “Kare i kitea e te tangata nei, te au angaanga katoa i raveia i raro ake i te rā nei: e kimi ua atu rai te tangata kia kite, kare rai e kitea e ia; koia rai, kia akamaaraara ua te tangata pakari kia kite, kare rai e kitea e ia.”​—Koheleta 8:17.

Me kare e rauka i te tangata i te akaaere i te au tumatetenga natura, koai ra te ka rauka? Te akataka maira te Pipiria e ko Tei Anga mai ia tatou, te ka rave i teia tauianga. Nana i akatumu i te turanga o te au mea ravarai o te enua nei, mei te aerenga rai o te vai. (Koheleta 1:7) Me akaaiteia te tuke maata ki te tangata, kare e openga anga mai o to te Atua mana. Te akapapu anga i teia tika, kua akakite te peroveta ko Ieremia e: “Aue, e te Atu e! e Iehova! I na, naau te rangi nei i anga, e te enua, i te mana maata noou ra, e to rima i akatikaia ra; kare rava e mea rave ngata ia koe.” (Ieremia 32:17) I te mea na te Atua i anga i te enua e tona au mea tini ravarai, kua kite aia akapeea me akaaere i te au apinga kia rauka te tangata i te noo ki runga i te reira ma te au e te tinamou.​—Salamo 37:11; 115:16.

Akapeea i reira, me apai mai te Atua i taua au tauianga tei anoanoia? Ka maara ia koe e te taiku ra te rua o teia au atikara i te au mea kino e manganui e tupu ra i te enua nei i teia tuatau, tei riro ei tuanga no te “akairo” o “te openga o teianei ao.” Akakite a Iesu e: “Kia akara kotou i taua au mea nei i te tupu anga, kua vaitata ïa te basileia o te Atua.” (Mataio 24:3; Luka 21:31) Ka apai mai te Patireia o te Atua, e kavamani no te Atua i te rangi, i te au tauianga maata i runga i te enua, e ka akaaere meitaki katoa i te au mea natura. Noatu e mana uaorai to te Atua ko Iehova i te rave i teia, kua iki aia e na tana Tamaiti e rave i te reira. No runga iaia, kua akakite te peroveta ko Daniela e: “E kua orongaia maira te mana, e te kakā, e te basileia nona, kia tavini atu te  au tangata katoa, te pa enua, e te au reo, kiaia.”​—Daniela 7:14.

Kua orongaia te mana tei anoanoia ki te Tamaiti a te Atua, ko Iesu Karaiti, kia rave i te au tauianga pouroa te ka anoanoia kia akariro i te enua ei ngai manea. Ia Iesu i te enua nei i te rua tauatini mataiti i topa, kua akaari aia e ka rauka iaia i te akaaere i te au mea natura. I tetai atianga, iaia e tana au pipi i runga i te pai i te Tai o Galilea, “kua tupu maira tetai uriia maata, ki maira te pai i te kare.” Mataku iora tana au pipi. No te mataku e ka mate ratou, kua ariu atura ratou kia Iesu. Eaa ta Iesu i rave? Kua ‘kauvae atura aia i te matangi, e kua na ko atura ki te kare, kua oti ana, kia aki. Torue atura te matangi, marino rava akera.’ Kua umere akera tana au pipi e kua ui e: “Eaa ua te tu o teianei tangata, i akarongo ei te matangi e te kare iaia”?​—Mareko 4:37-41.

Mei reira mai, kua akateiteiia a Iesu ki te ao vaerua e kua oronga katoaia kiaia te mana maata e te mana akaaere. Ei Ariki no te Patireia o te Atua, nana te apainga, e ka rauka iaia i te rave i te au tauianga tei anoanoia kia oronga i tetai oraanga au e te tinamou no te tangata i te enua nei.

Inara, mei ta tatou i kite mai ana, manganui te au manamanata e te au tumatetenga na te tangata te reira i akatupu, me kore i akakino roa atu no te karapii e te noinoi o te tangata. Eaa ta te Patireia ka rave no te aronga e rave maro atu rai i taua au mea ra e tei kore i taui? Te tuatua ra te Pipiria no to Iesu aerenga mai “mei te rangi mai, ma tana au angela mana katoa ra, Ma te ai mura ra, i te tuku anga mai i te mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia.” Ae, ka apai mai aia i te ‘mate o te aronga i mate ei to te ao ra.’​—2 Tesalonia 1:7, 8; Apokalupo 11:18.

Muri ake, ka akaaere teia “Ariki o te au ariki,” ko Iesu Karaiti, i te au mea natura o te enua. (Apokalupo 19:16) Ka akapapu meitaki aia e kare te au tangata o te Patireia e kite akaou i te mamae o te tumatetenga. Ka taangaanga aia i tona mana ei akaaere i te au turanga o te reva, kia tau te reva e te aerenga o te au tuatau ki te turanga te ka riro ei puapinga no te tangata. Te ka tupu, ka kite tikai ratou i ta te Atua ko Iehova i taputou ki tona iti tangata i muatangana: “E oronga atu au i te ua na kotou i te tuatau tikai ra, e e kaiia to te enua; e e akaua mai te au rakau o te enua ra i to ratou ua.” (Levitiku 26:4) Ka rauka i te tangata i te patu i te au are ma te kore e mataku e ka ngere ratou i te are me tupu tetai tumatetenga: “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira.”​—Isaia 65:21.

Kare e ekoko e, mei tetai au tangata rai, ka inangaro koe i te noo i roto i tetai ao kare e tumatetenga akaou. Eaa i reira taau ka rave kia noo ki reira? I te mea e ko “te aronga kare i kite i te Atua” e te aronga “tei kore i akarongo i te evangelia” e tau kia noo i tetai ao kare e tumatetenga, te taka ua ra e ka anoanoia te tangata kia apii no runga i te Atua, e kia turuturu i tana akanoonooanga no te tutara i te enua. Te umuumu maira te Atua ia tatou kia kite iaia e kia akarongo i te tuatua meitaki o te Patireia tana i akanoo na roto i tana Tamaiti.

Te mataara meitaki rava atu i te apii i te rave i te reira koia oki te apii meitaki anga i te Pipiria. E au ikuikuanga tetai no te aronga ka tau kia noo i roto i te turanga ponuiaau i raro i te tutaraanga a te Patireia. Kore koe pati i te Au Kite o Iehova kia tauturu ia koe kia kite eaa ta te Pipiria e apii maira? To ratou akakoronga te reira. Tetai mea papu​—me tauta koe kia kite i te Atua e te akarongo i te tuatua meitaki, ka kite koe i reira i te akatupuanga o te tuatua a Maseli 1:33 e: “Ko tei akarongo mai iaku ra, ka noo marie ua ïa ma te ora; e akaea ua aia ma te mataku kore i te kino.”