“E kite mamao te tangata pakari i te kino, e kua pipini iora; te aere ua atura te kite kore, e mate atura,” i karanga ai te Pipiria. (Maseli 22:3) E ako pakari tikai teia te ka tau no te tumatetenga. Me akamatakiteia mai no runga i tetai maunga ka, vaipuke, me kore uriia te ka tupu, mea tau kia akaruke i te reira ngai e kia aere ki te ngai meitaki. Puapinga atu te oraanga i te are me kore i te au apinga materia.

No tetai pae, penei e mea tau eiaa e noo i te ngai ka tupu taua au tumatetenga. Akakite tetai tangata mana akaaere e: “Ko te kino o te tumatetenga, e pakari atu i tetai au tuanga enua. Te maataanga o te kino tei tetai tuanga meangiti ua o te Enua, e ko te maataanga o te au tumatetenga mamaata, ka tupu i roto i teia au ngai.” Ka tika rai te reira, ei akaraanga, i te au ngai taatai me kore i te au ngai i te pae i te au ara o te papa enua tei ngaa. Me ka rauka ia koe, eiaa e noo i te au ngai e tupu ana te kino me kore, e neke atu ki tetai ngai meitaki, penei ka iti mai te kino o te tumatetenga ka tupu kia koe.

Noatu te au akamatakiteanga, penei ka rokoia rai koe e te au tumatetenga kare i manakoia ana. Ka mama roa atu i te akakoromaki me parani koe na mua. Te rotai ra teia ki te akamaroiroianga ia Maseli 22:3, tei taikuia i mua ana. Kua papa ainei taau au apinga no te tumatetenga? Te akamaroiroi maira te puka 1-2-3 of Disaster Education kia kapiti mai i te: Au apinga rapakau, moina vai, au punu kai, e te au pepa puapinga. E mea tau katoa kia uriuri e toou pamiri i te au tu tumatetenga te ka tupu e eaa te ka rave i taua au turanga ra.

Ka tauturu teia i roto i tetai ua atu turanga. Te tuatua ra te Pipiria no runga i te Atua e koia “te tumu o te aroa, e ko te Atua nona anake te pumaana; Ko tei akapumaana mai ia matou i to matou au mate katoa nei.” Akataka mai tetai irava ke iaia ei Atua “ko te akapumaana i te aronga akaaka.”​—2 Korinetia 1:3, 4; 7:6.

Ae, kua kite mari te Atua i te au turanga e tupu ra ki te aronga tei irinaki iaia. E Atua aroa aia e te oronga maira i te akamaroiroianga na roto i te au mataara tukeke. (1 Ioane 4:8) Te pure, kare no te au temeio, no te vaerua tapu ririnui ra o te Atua, te ka oronga mai te tauturu noatu eaa te turanga. Na te vaerua tapu e akamaara mai kia tatou i te au irava Pipiria te ka riro ei akapumaana e te akamaru i te aronga tei  rokoia e te tumatetenga. Ka rauka i te au tavini akarongo mou o te Atua kia manako mei ia Davida rai, te ariki taito o Iseraela tei karanga: “E kia aere ua atu au na te o ra o te maru-mate, kare rai au e mataku i te kino: tei vaitata katoao koe iaku; to rakau e to tokotoko tei akapumaana mai iaku.”​—Salamo 23:4.

I te anere mataiti mua, akakite tetai peroveta Kerititiano ko Agabo e “te vaitata maira te onge maata i te pa enua ravarai nei: ko tei tupu ïa i te au ia Kalaudio Kaisara ra.” E manganui te au pipi a Iesu tei takino pakariia e te onge i Iudea. Eaa ta te au pipi i tetai atu ngai i rave i te akarongo anga ratou i te turanga ngata o to ratou au oa Kerititiano? Te akakite ra te papaanga e: “Kua akakoro iora te au pipi e akau i te apinga, tona atu rai, tona atu rai, e tau iaia uaorai, ei turu atu i te au taeake i noo i Iudea.” (Angaanga 11:28, 29) Kua oronga puareinga ua ratou i te au apinga tauturu.

Me tupu te au tumatetenga kino i teia tuatau, e tauturu ana te au tavini o te Atua mei te reira rai. Kua kite meitakiia te Au Kite o Iehova no ta ratou tauturu i te au taeake irinaki. Ei akaraanga, te ngaruerue enua tei tupu i Tire i te ra 27 o Peperuare, 2010, kua viviki te Au Kite o Iehova i te tauturu i te aronga tei na roto i te tumatetenga. Kua akakite a Karla, kua takoreia tona are e te tunami e: “E mea pumaana e te akamaroiroi i te kite i te [au taeake Kite] i tera mai ra, tei aere mai mei te au ngai ke i te tauturu ia matou. Kare e ekoko, kua akapumaana mai a Iehova ia matou na roto i te tu meitaki o te aronga tei tauturu mai. Kite tikai au i te tu akaperepere e ta ratou paruruanga.” Kua kite tona papa ruau, kare aia i te Kite, i te tauturu tei orongaia mai kiaia. Karanga aia e: “E mea tuke takiri teia mei taku i kite i te au mataiti i roto i taku akonoanga.” Riro tana i kite ei akakeu iaia kia pati i te Au Kite o Iehova kia apii i te Pipiria kiaia.

Ka riro te pirianga ki te aronga inangaro i te Atua ei tauturu maata i te au tuatau ngata. Noatu rai, e tuatau ainei ra tetai e kore ei te taumaa o te au tumatetenga i te enua nei? Akara tatou eaa ta te Pipiria e tuatua ra no runga i teia tumu manako.