Kua Kite Ainei Koe?

Eaa te aiteanga o ta Iesu tuatua kia aere e rua maire?

▪ I roto i tana Tuatua rongonui i runga i te Maunga, kua tuatua a Iesu e: “E ko te akaue mai kia koe e aere i tetai maile, aere ua atu korua e rua maile.” (Mataio 5:41) Kua marama te aronga e akarongo ra kia Iesu e te taiku ra taua tuatua ra i tetai angaanga ka maro mai te aronga mana i te iti tangata kia rave.

I te anere mataiti mua T.N., te akaaereia ra a Iseraela e to Roma. Kua maro ratou i te au tangata e te au manu kia angaanga me kore kia rave i tetai au mea ta ratou e manako ra e te tau ra no te akapuapinga atu anga i te au pitiniti a te aronga mana. Ei akaraanga, kua maro te au vaeau o Roma i tetai tangata Kurene, ko Simona te ingoa, kia apai i te tatauro me kore te rakau tamamae anga ki te ngai ka tamateia a Iesu. (Mataio 27:32) E kino tikai taua tu ra, e e apinga ririia e te mea mareka koreia e te ngati Iuda.

Kare i kiteaia e mei teaa te mamao ka anoanoia te iti tangata kia apai i tetai apinga teimaa. E ngata tikai i te akamanako atu e ka maata atu ta ratou ka rave i tei umuumuia kia rave ratou. No reira te raurau anga a Iesu i te aronga e akarongo maira kiaia e kia aere atu e rua maire, te akakite ra aia kia ratou e eiaa e riri me rave i te angaanga ta te aronga mana e maro tau kore maira.—Mareko 12:17.

Koai a Ana tei taikuia i roto i te tataanga Evangeria?

▪ I te tuatau o to Iesu akava anga, kua akatakaia mai a Ana e ko te “akava nunui.” (Luka 3:2; Ioane 18:13; Angaanga 4:6) E metua ongai aia no te taunga maata o Iseraela ko Kaiapha, e kua tavini katoa ana aia ei tauanga maata mei te mataiti 6 me kore 7 T.N. e tae ua atu ki te mataiti 15 T.N., te akaateaia anga aia mei taua mana taoonga ra e te kavana o Roma ko Valerius Gratus. Noatu e taunga maata aia i mua ana, kua taangaanga rai a Ana i tona mana akaaere i Iseraela. Kua riro mai tana tamariki tamaroa e rima e tana tamaiti ongai ei kau taunga maata.

Me angaanga ua rai te ngati Iseraela ei iti tangata takake, ka mou ua rai te taunga maata i tona taoonga. (Numero 35:25) Inara, no te mea tei raro ake a Iseraela i te akatereanga a Roma, kua tavini te taunga maata no te au kavana o Roma e te au ariki tei ikiia e Roma, e ka rauka ia ratou i te akaatea iaia. Kua ripoti mai te tata tuatua enua ko Flavius Josephus e kua akaatea a Quirinius, te kavana Roma o Suria, i tetai tangata ko Joazar tona ingoa, ei taunga maata i te mataiti 6 me kore 7 T.N. e kua ikiia atu a Ana ei taunga maata. Te akaraanga, na teia au tutara peikani e iki ana i te aronga ou mei roto mai i te pupu kau taunga.

E aronga noinoi e te apinga nui te pamiri o Ana. Kua rauka mai ta ratou apinga nui na te akaaereanga i te oko anga o te au apinga no te au atinga i roto i te iero, mei te au kukupa, mamoe, inu, e te uaina. Kua akakite mai a Josephus e kua tu a Anania, te tamaiti a Ana, i te “au tavini kino tikai tei maro [ana] i te apai i te tuanga ngauru a te kau taunga; e ka papa katoa ratou i te aronga kare e oronga mai ana i te reira.”