▪ I kite ana koe i te au tutu anauanga o Iesu e te au akatutuanga o nga ariki e toru, me kore aronga pakari, e aravei ra i te pepe ou ko Iesu i roto i te are angai manu? No runga i te tua, kua tuku te Atua i tetai etu kia arataki ia ratou ki te are o te manu i Betelehema. I tetai au enua, e apiiia ana te tamariki kia tamou ngakau i te ingoa o taua au ariki e toru​—ko Melchior, Caspar, e Baltazar. Inara, te tau ra ainei taua tua rongonui ra ki ta te Pipiria e akakite tikai maira? Kare. Maataanga o te taime, kare e tika ana te tua.

Mea mua, koai ra taua aronga ra? I roto i te tuatua Ereni, kare te Pipiria e kapiki ana ia ratou e e au ariki me kore e aronga pakari. E aronga akara etu ra ratou. E rave ana ratou i te angaanga purepure tei akatumuia ki runga i te au etu. Kare te Pipiria i akakite mai ana i te au ingoa me kore te numero o te aronga tei atoro mai.

Te rua, i naea taua aronga ra i atoro atu ei? Kare i te tuatau e te pepe ra rai a Iesu i roto i te are angai manu. Akapeea tatou i kite ei? Kua akakite te tangata tata evangeria ko Mataio e: “E tae atura ratou ki roto i te are, kite atura ratou i taua tamaiti iti ra, e tona metua vaine ko Maria.” (Mataio 2:11) Akara ana e kare a Iesu i te pepe anau ou, mari ra e “tamaiti iti” ua. Kare a Maria e Iosepha i roto i tetai are angai manu; mari ra, tei roto raua i tetai are.

Te toru, naai i tono mai i te “etu” kia arataki i te au aronga akara etu? E apii putuputu ana te au arataki akonoanga e na te Atua i tono mai i te “etu.” Nana ainei i tono mai? Akamaara ana, e kare te “etu” i arataki mua ana i taua aronga akara etu ra ki Betelehema. Mari ra, kua arataki te reira ia ratou ki te ariki ko Heroda i Ierusalema. Kua akakite ratou ki taua ariki vareae ra e te ta tangata e kua anauia a Iesu, e tei akakeu iaia kia makitakita atu i te tamaiti iti te ka riro mai ei ‘ariki no te ngati Iuda.’ (Mataio 2:2) Kua akakite a Heroda kia ratou na roto i te tu kikite kia oki mai e akakite i te ngai e noo ra te tamaiti, te karanga anga e ka akangateitei aia i te tamaiti. Kua arataki i reira te “etu” i te aronga akara etu kia Iosepha e Maria. No reira ko ta te aronga akara etu e rave nei ka taki atu ki te tamate anga o te tamaiti naringa kare te Atua i taui i te parani. Inara, kua taui aia i te reira. Kua riri tikai a Heroda e kare te aronga akara etu i oki mai i te akakite kiaia, i akaue ei aia kia tamateia te au tamariki tamaroa e rua mataiti e i raro ake, i roto ia Betelehema e te au oire takapini atu.​—Mataio 2:16.

Muri ake kua taiku a Iehova ia Iesu e ko “Taku Tamaiti akaperepere teia, kua mareka rava au iaia.” (Mataio 3:17) Akamanako ana: Ka iki ainei tetai Metua aroa e te takinga meitaki i tetai aronga akara etu peikani​—aronga rave angaanga purepure kare e tau ana ki tana Ture—​ei karere nana? (Deuteronomi 8:10) Ka tuku ainei aia i tetai etu kia arataki ia ratou ki tetai tangata kino tikai e te ta tangata i taua enua ra, te akakite atu anga i tetai karere te ka akariri maata atu ia Heroda? Ka tuku katoa ainei te Atua i taua etu ra e te aronga akara etu kia akakite i te ngai e noo ra tana tamaiti varevare?

Ei akatutuanga: Ka tono tetai rangatira vaeau meitaki i tana vaeau tukatau ki tetai ngai tamakianga kino tei reira te enemi. Ka akakite ainei aia ki te enemi e teiea taua vaeau ra? Kare! Mei te reira rai, kua tono mai a Iehova i tana Tamaiti ki teia ao kino. Ka akakite ainei Aia ki te ariki kino ko Heroda e teiea Tana Tamaiti varevare? Kare rava!

Naai, i reira, i tono mai i te “etu”? Koai te inangaro maata ra kia tamate i te tamaiti ko Iesu, kia kore aia e mamaata mai e kia kore e akatupu i tana angaanga i te enua nei? Koai te kimi ra i te akavare i te tangata e te akatupu i te pikikaa, te kino, e te ta anga? Na Iesu uaorai i akakite mai e ko te Tiaporo ko Satani tei ‘pikikaa e e metua oki aia no te pikikaa,’ tei ‘ta tangata mei ito mairai.’​—Ioane 8:44.