Taui te Pipiria i te Oraanga

EAA tei akakeu i tetai tangata kia oki ki te akonoanga tei utuutu mai iaia i tana i akaruke? Akapeea tetai tangata mapu te kite mai anga i tetai tu metua tane meitaki tana i inangaro ua ana i roto i tona oraanga? E tatau i ta raua i akakite mai.

“Ka inangaro au i te oki kia Iehova.”​—ELIE KHALIL

MATAITI ANAU: 1976

ENUA ANAU: KUPERO

ORAANGA: TAMAITI KAIMOUMOU APINGA

TOKU ORAANGA I MUA ANA: Anauia au i Kupero e kua mamaata mai i Autireria. E nga Kite no Iehova toku nga metua, e kua tauta pakari raua i te apii iaku kia inangaro ia Iehova e tana Tuatua, te Pipiria. Toku mapu tamariki anga kare au e akarongo akaou ana. Ka aere au ki vao i te po kia piri atu ki tetai au mapu. E keia ana matou i te au motoka e te o atu ki roto i tetai atu au manamanata.

Te akamataanga, ka rave muna au i taua au mea ra kia kore e akamareka kore i toku nga metua. Aere ua rai kare au i mataku akaou ana. Kua piri atu au ki tetai aronga pakarikari ake kare e inangaro ana ia Iehova, e kua riro ratou ei akakeuanga kino ki runga iaku. I te openga, kua akakite au ki toku nga metua kare au e piri akaou atu ki ta raua akonoanga. Kua tauta raua ma te akakoromaki i te tauturu mai iaku, inara kua kopae au i ta raua tauturu. Kua mamae tikai te ngakau o toku nga metua.

Muri ake te akaruke anga au i te kainga, kua tamata au i te kai i te au apinga akakona, te akatupu anga e te oko maata katoa anga i te au maruana. E oraanga tau kore toku e kua akapou maata au i te taime ki te ngai tamaoraanga i te po. Kua akamata katoa au i te riri vave. Me tuatua mai tetai tangata me kore ka rave mai i tetai mea kare au e reka ana, ka riri vave ua au, ka vaa maata atu e ka moto atu ia ratou. Kua rave au i te au mea tei apiiia mai kia kore au e rave ei tangata Kerititiano.

KUA TAUI TE PIPIRIA I TOKU ORAANGA: Kua piri atu au ki tetai tangata kai apinga akakona tei mate tona metua tane i tona tamariki anga. Maata te taime e pukapuka ana maua i te roa anga po. Tetai o taua au po ra, ka akakite mai aia i tona manako e te maaraara ua ra aia i tona papa. Toku tupu mai anga kua marama au i te manakonakoanga no te tuakaouanga, e kua akakite atu kiaia no runga ia Iesu​—tei akatu mai i tei mate e kua taputou mai e ka rave akaou aia i teia a te tuatau ki mua. (Ioane 5:28, 29) “Akamanako ana ka kite akaou koe i toou papa,” i tuatua atu ei au. “Ka rauka ia tatou i te noo e tuatau ua atu ki roto i te Parataito i te enua nei.” Kua tukia te ngakau o toku oa e taua au manako ra.

 I tetai au taime, ka tuatua mai toku oa no runga i te tuatau openga me kore te apiianga Toru Tai. Ka mou mai au i tana Pipiria e ka akaari atu i te au irava tukeke no runga i te Atua ko Iehova, e Iesu e te tuatau openga. (Ioane 14:28; 2 Timoteo 3:1-5) Te maata atu taku tuatua no runga ia Iehova ki toku oa, e maata atu taku akamanakoanga no runga ia Iehova.

Aere ua rai, kua tupu akaou mai te tuatua mou Pipiria e vai ua ra ki roto i toku ngakau ta toku nga metua i tauta ana i te akatupu. Ei akaraanga, tetai taime me kai au i te au apinga akakona i te ngai tamataora ma toku au oa, ka akamanako au ia Iehova. Maata toku au oa e karanga ra e te inangaro ra ratou i te Atua, kare ra to ratou tu e akaari mai ana i te reira. Kare au e inangaro ana kia riro mai mei te reira rai, kua kite mai au eaa taku ka rave. Ka anoanoia au kia oki akaou kia Iehova.

E tika e mama i te kite eaa taau ka rave inara e ngata tikai i te rave i te reira. Mama i te rave i tetai au tauianga; kua akamutu au i te kai i te au apinga akakona ma te ngata kore. Kare au e piri akaou ana ki toku au oa taito, e kua apii mai tetai tangata pakari Kerititiano i te Pipiria kiaku.

Inara, e ngata tikai i te rave i tetai atu tauianga. No runga tikai i toku tu riririri. Tetai taime ka meitaki au no tetai tuatau roa e oti ka riri akaou au. E kinokino ana toku ngakau a muri mai te manako anga e kua puapinga kore au. Kua akaparuparu te reira iaku e kua aravei atu au i te tangata pakari tei apii ana i te Pipiria kiaku. No tona tu akakoromaki e te takinga meitaki, kua riro mai aia ei akamaroiroianga tikai kiaku. Tetai taime, kua oronga mai aia i tetai atikara o Te Punanga Tiaki kia tatau au no runga i te puapinga kia kore e tuku i te au. * Kua uriuri maua i te au takainga ka rave au me riri mai au. Aere ua rai, ma te akamaaraanga i te atikara e te pure maata kia Iehova, kua rauka iaku i te akaaere i toku tu riri. I roto ia Aperira mataiti 2000, kua papetitoia au ei Kite no Iehova. Kua mataora tikai toku nga metua.

KUA PUAPINGA AU: Kua rauka iaku te tu manako au e te akava ngakau ma, te kite anga e kare au e taviivii akaou ana i toku kopapa ki te au apinga akakona me kore te au tu peu tau kore. Noatu eaa taku ka rave, te rave anga i taku angaanga, aere anga ki te uipaanga Kerititiano, me kore te rave anga i tetai tu tamataoraanga, kua mataora tikai au. Papu tikai toku manako no runga i te oraanga i teianei.

Te akameitaki nei au ia Iehova no toku nga metua tei kare rava i akangaropoina ana iaku. Kua manako katoa au i te au tuatua a Iesu i roto ia Ioane 6:44: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” Mataora tikai au e kua rauka iaku i te oki kia Iehova no te mea kua ariki mai aia iaku.

 “Inangaro tikai au i tetai metua tane.”​—MARCO ANTONIO ALVAREZ SOTO

MATAITI ANAU: 1977

ENUA ANAU: TIRE

ORAANGA: MEMA AKATANGI IMENE TURITURI

TOKU ORAANGA I MUA ANA: Kua utuutuia mai au e toku mama i Punta Arenas, e oire manea i te Strait o Magellan i te ope o te tua tonga o Marike Apatonga. E rima oku mataiti, kare toku nga metua e noo kapiti akaou ana, e kua manako mai au e kare au e inangaroia ana. Kua inangaro tikai au i tetai metua tane.

Kua apii toku mama i te Pipiria ki te Au Kite o Iehova, e kua apai iaku ki te au uipaanga Kerititiano i ko i te Are Uipaanga Patireia. Inara kare au e reka ana i te aere ki te au uipaanga, e ka kopekope ua rai au e tae ua atu ki reira. E 13 oku mataiti, kua akamutu au i te aere ki te uipaanga.

I te reira taime, kua kite mai au e e inangaro ana au i te akatangi imene, e kua tukatau mai au i te rave i te reira. E 15 oku mataiti, kua akatangi imene turituri au i te au ngai tamataoraanga mamaata, te ngai oko kava, e tetai au ngai ura anga. Kua riro toku pirianga ki te aronga kite i te akatangi imene i te akakeu iaku kia inangaro i te akatangi i te au imene taito. Kua apii au i te akatangi imene i ko i tetai apii teitei. E 20 oku mataiti kua neke atu au ki te oire maata o Santiago i te akamaata atu i taku au apii. Kua rave ua atu au i te akatangi imene turituri i roto i te pupu akatangi imene.

I te au taime ravarai kare au e mataora ana. Ei takore atu i taua au tu ra, ka inu maata au i te kava e te kai apinga akakona ma toku au oa, taku i manako mai e pamiri noku. E tu akarongo kore tikai toku, e kiteaia mai ana te reira i runga i toku tu. E aao ana au i te au kakau kerekere, akatupu i toku uruuru vaa, e te akatupu i toku rouru kia roaroa.

Tetai au taime e o atu ana au ki roto i te au ta anga e te akatupu pekapeka ki te akava. E no te kona kava i tetai taime, kua taanga atu au ki runga i tetai pupu oko apinga akakona e tamanamanata maira iaku e toku au oa. Kua taiaia mai au e taua aronga ra e kua ati toku tanga.

Inara, e kino atu te mamae ta toku au oa piri vaitata i rave mai kiaku. Kua kite mai au i tetai ra e te piri ra toku oa vaine ki toku oa piri vaitata no tetai au mataiti, e kare toku au oa i akakite mai ana i te reira kiaku. Kua mamae tikai toku ngakau.

Kua neke atu au ki Punta Arenas, i akamata ei au i te apii i te akatangi imene e te cello. Kua akatangi e kua rekoti katoa au i te au imene turituri a te au pupu akatangi imene. E kua aravei au i tetai tamaine manea ko Sussan tona ingoa e kua noo kapiti maua. I tetai tuatau i muri mai, kua kite mai a Sussan e e irinaki ana tona mama i te apiianga Toru Tai e kare au e irinaki ana. Kua ui mai aia e, “Eaa i reira te tuatua mou?” Kua pau atu au e kua kite au e e tarevake te apiianga Toru Tai, kare ra e rauka iaku i te akapapu i te reira mei roto mai i te Pipiria. Kua kite ra au e koai ma te ka akamarama mai i te reira. Kua akakite au kiaia e ka rauka i te Au Kite o Iehova i te akaari kiaia i te tuatua mou mei roto mai i te Pipiria. E kua rave au i tetai apinga kare au i rave ana no tetai au mataiti​—kua pure au ki te Atua e kua pati i tana tauturu.

Tetai nga ra i muri mai, kua kite atu au i tetai tangata kua kite ana au, e kua ui atu au me koia tetai o te Au Kite o Iehova. Noatu e kua ru aia no toku akaraanga, kua pau maru mai aia i taku au uianga no runga i te au uipaanga i ko i te Are Uipaanga Patireia. Kua papu iaku e ko teia te pauanga  ki taku pure. Kua aere au ki te Are Uipaanga Patireia e kua noo i muri roa kia kore e tangata e kite mai iaku. Inara, maata tei kite mai iaku i te tuatau i aere ana au ki te uipaanga i toku meangitika anga. Kua ariki e kua takave pumaana mai ratou iaku e kua kite mai au i te turanga au. Mei te mea rai e kua oki mai au ki te kainga. Te kite anga au i te tangata tei apii ana i te Pipiria kiaku i toku meangitika anga, kua pati au kiaia kia apii akaou mai iaku.

KUA TAUI TE PIPIRIA I TOKU ORAANGA: Tetai ra, kua tatau au ia Maseli 27:11, e karanga ra e: “E taku tamaiti, kia pakari koe, kia rekareka toku ngakau.” Kua mareka tikai au i te manako anga e ka rauka i tetai tangata ua nei i te akarekareka i Tei Anga mai i te ao katoa. Kua kite mai au e ko Iehova taua Metua meitaki ra taku i kimi ana i roto i toku oraanga!

Kua inangaro au i te akamareka i toku Metua i te rangi e te rave i tona anoano, inara, kua roa toku kai anga i te au apinga akakona e te inu anga i te kava. Kua marama mai au i te apiianga a Iesu i roto ia Mataio 6:24 e, “kare e tika i te tangata kia akono i nga pu e toko rua.” Iaku e tauta ra i te rave i te au tauianga, kua akakeu maataia au e te kaveinga i roto ia 1 Korinetia 15:33 e: “E kino te tuatua meitaki i te kapiti anga kikino ra.” Kua kite mai au e kare e rauka iaku i te takore atu i taua au tu kino ra me aere ua rai au ki taua ngai e me kapiti atu ki taua au tangata ra. Te taka ua ra te akoanga Pipiria: Ka anoanoia au kia rave i tetai au tauianga maata kia kopae ke i te au mea te akaturori ra iaku.​—Mataio 5:30.

No toku inangaro maata i te akatangi imene, kua riro te akaruke anga i te akatangi imene turituri ei ikianga ngata tikai kiaku. Na te tauturu anga a toku au oa i roto i te putuputuanga, kua rauka iaku i te akaruke i taua au mea. Kua akamutu au i te inu maata i te kava e te kai i te au apinga akakona. Kua pakoti katoa au i toku rouru, kua varu i toku uruuru vaa, e kare e aao akaou ana i te au kakau kerekere. Te akakite anga au kia Sussan e ka pakoti au i toku rouru, kua inangaro aia i te kite e eaa te tumu. Kua karanga mai aia e, “Ka aru atu au ia koe kia kite au e eaa te tupu ra i ko i te Are Uipaanga Patireia!” Kua reka tikai aia i tana i kite mai, e kare i roa ana kua apii katoa aia i te Pipiria. I te openga, kua akaipoipo maua ko Sussan. E kua papetitoia maua ei nga Kite no Iehova i te mataiti 2008. Te mataora nei maua i te kapiti atu ki toku mama i te tavini anga ia Iehova.

KUA PUAPINGA AU: Kua ora mai au mei tetai ao kare e mataora ana e mei te au oa pikikaa. Te inangaro nei rai au i te akatangi imene, e iki meitaki ana ra au i te reira i teia taime. E akakite ana au i tei tupu ana ki toku oraanga ki toku au mema pamiri e tetai ke, ki te au mapu tikai. Inangaro au i te tauturu ia ratou kia kite mai e e manea tikai ta teianei ao e oronga maira, i te openga ra e ‘teita ua rai’ te reira.​—Philipi 3:8.

Kua rauka mai tetai au oa tiratiratu noku i roto i te putuputuanga Kerititiano, tei reira te aroa e te au. Tei maata atu, na te akavaitata anga kia Iehova, kua kitea mai e au toku Metua.

[Tataanga Rikiriki i Raro]

[Tataanga i te kapi 13]

“Kua rauka iaku i te oki kia Iehova no te mea kua ariki mai aia iaku”