Aramakito​—Eaa ra te Reira i na Tetai Aronga Ai?

“Kua akaputuputu iora ratou i tetai ngai, ko Aramagido te ingoa i te tuatua Ebera.”​—APOKALUPO 16:16.

EAA taau e manako ana me akarongo koe i te tuatua “Aramakito”? Kare e kore, e au mea tei tupu i roto i tetai tumatetenga maata. Noatu e tai rai taiku angaia o teia tuatua i roto i te Pipiria, e taiku putuputu ana ra te nuti pepa e te au arataki akonoanga i taua tuatua ra.

Te aiteite ra ainei te au manako no Aramakito ki ta te Pipiria e apii maira? E mea puapinga tikai te kite i te pauanga. No teaa ra? Me kite koe i te tika no runga ia Aramakito, kare koe e mataku puapinga kore ua, ka rekareka atu koe i te manakonakoanga no te tuatau ki mua, e ka akatuke i te tu e manako ra koe no runga i te Atua.

Akamanako ana e toru au uianga e aru mai nei, e oti akaaiteite i te au manako arikiia no runga ia Aramakito ki ta te Pipiria tikai e apii maira.

  1. NA TE TANGATA AINEI TEIA TUMATETENGA?

Taangaanga putuputu ana te aronga nuti e te aronga kimikimi i te tuatua “Aramakito” ei akamarama mai i te au tumatetenga e akatupuia nei e te tangata. Ei akaraanga, e karangaia ana te Tamaki I e te II o te Ao e, ko Aramakito. Muri ake i taua nga tamaki ra, manamanata te tangata e ka akaaruru a Marike e te U.S.S.R., i ta raua pomu atomiki ki runga ia raua rai. Kapiki te nuti i taua tamaki tei tamanakoia e, “e Aramakito na te pomu nukiria i akatupu.” Teia tuatau, te aronga kimikimi e mataku ra e ka akatupu te reva poitini i te tauianga maata ki te reva o te enua, te akamatakite maira e kare e roa atu ka tupu tetai “reva Aramakito.”

Te akaari maira to ratou aiteanga e: Tei te tangata te tika i te akaaere takiri i te enua e te oraanga o te au mea katoatoa a te tuatau ki mua. Me kare e rauka i te au kavamani i te akaaere meitaki, ka ope takiri te enua.

Ta te Pipiria e apii maira: Kare te Atua e akatika i te tangata kia takore i te enua. Te akapapu maira te Pipiria kia tatou e kare a Iehova * i anga i te enua “ei mea puapinga kore ua.” Mari ra, i anga aia i te reira “kia tangataia.” (Isaia 45:18) I to te akatika i te tangata kia takore takiri i te enua, ka apai mai te Atua i te mate ki “te aronga i mate ei to te ao ra.”​—Apokalupo 11:18.

2. E TUMATETENGA NATURA AINEI A ARAMAKITO?

Tetai taime e taangaanga ana te aronga nuti i te tuatua “Aramakito,” ei ingoa no te au tumatetenga mamaata. Ei akaraanga, i te mataiti 2010, kua tuatua tetai ripoti no runga ia “‘Aramakito’ i Aiti.” Kua akataka mai te reira i te au turanga ngata, te kino, e te mate tei tupu i roto i taua aka ngaruerue enua tei nina i taua enua ra. Taangaanga te aronga tata nuti e te aronga nenei teata i taua tuatua, no te au tupuanga tei tupu ke ana e no te au mea ta ratou e mataku ra e ka tupu. Ei akatauanga, kua rave mai ratou i te tuatua “Aramakito” ei akataka mai i te kino ta tetai asteroid ka akatupu me u ki runga i te enua.

Te akaari maira to ratou aiteanga e: E mea tupu ua mai a Aramakito te ka tamate puapinga kore ua i te aronga meitaki. Kare e rauka ia koe i te paruru ia koe uaorai.

Ta te Pipiria e apii maira: Kare a Aramakito i te mea tupu poitirere ua mai ei takore i te au iti tangata. Mari ra, i te tuatau ia Aramakito, ko te aronga kino ua te ka takoreia. Taputou mai te Pipiria e kare e roa atu “kare ua te tangata kino ra, koia tika rai, ka akara koe i tona ngai, e kare ua!”​—Salamo 37:10.

3. KA TAKORE AINEI TE ATUA I TE ENUA ME TAE MAI A ARAMAKITO?

Manganui te aronga akono Atua tei irinaki e e tamaki openga tetai ka tupu i rotopu i te aronga meitaki e te aronga kino, te ka akapou takiri i to tatou paraneta. Kitea mai i roto i tetai tareanga tei raveia i Marike e te Princeton Survey Research Associates e, e 40 patene o te aronga mamaata tei irinaki e ka ope teianei ao i roto i tetai “tamakianga ia Aramakito.”

 Te akaari maira ta ratou apiianga e: Kare te tangata i akakoroia kia noo i te enua nei e tuatau ua atu, e kare katoa te enua i angaia kia vai e tuatau ua atu. Anga te Atua i te tangata e kua akakoro kia mate pouroa ratou a tetai tuatau.

Ta te Pipiria e apii maira: Akakite taka meitaki mai te Pipiria e na te Atua “i akamou i te tumu o te enua, kia kore roa e ngaueue e tuatau ua atu.” (Salamo 104:5) No runga i te tangata i te enua nei, akakite te Pipiria e: “Ka riro te enua no te aronga tuatua-tika, ka noo tamou rai ratou i reira.”​—Salamo 37:29.

Te taka meitaki ua ra e te patoi ra te Pipiria i te au manako e manganui no runga ia Aramakito. Eaa ra i reira te tika?

[Tataanga Rikiriki i Raro]