▪ Maata te au mataara tukeke e akamaramaia ana te apiianga Toru Tai, ko teia ra oki tetai mataara: “E toru Atua (te Metua, te Tamaiti, te Vaerua Tapu), karangaia e e tu mutu kore to ratou tataki tai, e e mana katoatoa ratou tataki tai, kare tetai i maata atu i tetai me kore i iti mai i tetai, e e Atua ratou tataki tai, e oti akera ko ratou katoatoa, okotai rai Atua.” E apiianga Pipiria ainei teia?

E taiku uaia ana a Mataio 28:19 ei akapapu mai i taua apiianga ra. Te taiku ra tera irava no roto i te urianga a te King James Version i te tuatua a Iesu e: “E aere ia kotou, e apii i to te pa enua katoa, papetito atu ia ratou i roto i te ingoa o te Metua, e to te Tamaiti, e to te Vaerua Tapu.” E tika kua taiku pouroaia mai ratou, te Metua, te Tamaiti, e te Vaerua Tapu i roto i teia irava. Inara kare te irava e tuatua ana e, okotai ratou. Te akaue ra a Iesu i tana au pipi ngati Iuda kia apii e kia papetito i te tangata i roto i te ingoa o te Metua, te Tamaiti, e te vaerua tapu. Ei iti tangata, eaa ta te ngati Iuda irinakianga?

Te oronga angaia te Ture koreromotu ki te iti tangata Iseraela, tei akatumu i tetai tuanga ua o te Pipiria, kua akaueia ratou e: “Auraka rava toou ei atua ke atu iaku nei.” (Deuteronomi 5:7) Eia tangata e tuatua ra i konei? Kare roa e ekokoanga e te tatau ra a Deuteronomi 6:4 e: “E akarongo mai, e Iseraela e: Ko Iehova to tatou Atua, okotai Iehova”​—kare e toru i roto i te mea okotai. Koi akarangatira uaia maira to Iseraela mei Aiphiti, te ngai e akamoriia ana a Osiris, Isis, e Horus (akaariia mai i te tua kaui)—​tetai o te au atua toru tai e manganui. No reira, kua akaueia to Iseraela kia akamori e tai ua Atua. Mei teaa ra te puapinga no te tangata kia marama i teia akauenga? Akakite a Dr. J. H. Hertz, tetai rapi e: “Kua riro teia akauenga ngateitei kia akamori okotai anake ua Atua (monotheism) ei patoi pakari i te au akamorianga Atua keke (polytheism) . . . Kopae te Shema i te toru tai a te akonoanga Kerititiano no te mea te patoi ra te reira i te irinakianga Okotai Atua.” *

I te mea i anauia mai a Iesu ei ngati Iuda, kua apiiia aia kia aru i teia akauenga. Muri ake i tona papetitoanga, i tona timata angaia e te Tiaporo, akakite aia e: “E aere ke atu koe e Satani, Kua oti oki i te tataia, ‘Ko toou Atua ra ko Iehova taau e akamori, e koia anake rai taau e akarongo.’” (Mataio 4:10; Deuteronomi 6:13) E rua a tatou apinga ka mou mai mei teia tupuanga. Te mea mua, te tauta ra a Satani i te akanauru ia Iesu kia akamori i tetai ke ua, eiaa ia Iehova, e neneva tikai taua titauanga ra, naringa e ko Iesu tetai tuanga o taua Atua rai. Te rua, kua akataka meitaki a Iesu e, okotai ua rai Atua ka akamoriia i tona tuatua anga e “koia anake rai,” e kare e ko “taua,” tana tikai ka tuatua naringa aia e e tuanga no te Toru Tai.

Me rauka i te tangata te kite tika tikai no te Atua, e te inangaro ra i te tavini iaia, ka papetitoia ratou ‘i te ingoa o te Metua, e no te Tamaiti, e no te vaerua tapu.’ (Mataio 28:19) Te marama ra ratou, e te ariki ra i to Iehova mana e ta Iesu Karaiti tuanga i roto i te akatupuanga i to Iehova akakoroanga. (Salamo 83:18; Mataio 28:18) Marama katoa ratou i te akakoroanga, e te angaanga a te vaerua tapu o te Atua, koia oki tona mana angaanga.​—Genese 1:2; Galatia 5:22, 23; 2 Petero 1:21.

Anere ua atu au mataiti te akaekoko anga te apiianga Toru Tai, i te tangata. Tetai tua, kua apii a Iesu i tana au pipi e kua arataki ia ratou ki “te Atua mou” anake, ko Iehova.​—Ioane 17:3.

[Tataanga Rikiriki i Raro]

[Akameitakianga no te Tutu i te kapi 31]

Musée du Louvre, Paris