Te ui nei teia atikara i te au uianga penei i ui ana koe, e te akaari maira i te ngai ka rauka ia koe i te tatau i te au pauanga i roto i taau Pipiria. Ka rekareka te Au Kite o Iehova i te uriuri i teia au pauanga kia koe.

1. Eaa ra te Atua i taokotai ei i te ngati Iseraela?

Kua taokotai mai te Atua i te uanga o te pateriareka ko Aberahama ei iti tangata e kua oronga i tetai au ture kia ratou. Kua kapiki aia i teia iti tangata e ko Iseraela, e kua oronga i te apainga kia ratou kia paruru i te akamorianga mou e tana Tuatua, te au Tuatua Tapu. (Salamo 147:19, 20) E kua puapinga te iti tangata katoatoa mei te reira.​—E tatau ia Genese 22:18.

Kua iki te Atua i te ngati Iseraela ei au kite nona. Me akarongo ratou, ka puapingaia ratou mei te au ture a te Atua. (Deuteronomi 4:6) Na te apii anga i te tuatua enua o te ngati Iseraela, ka maata atu to tatou kite no runga i te Atua mou.​—E tatau ia Isaia 43:10, 12.

2. Eaa ra i taokotaiia mai ei te au Kerititiano mou?

I te tuatau i aereia, kua ngere to Iseraela i te akaperepereanga a te Atua, e kua mono atu a Iehova i taua iti tangata ra ki te putuputuanga Kerititiano. (Mataio 21:43; 23:37, 38) I mua ana, ko te ngati Iseraela te au kite no te Atua. Teianei, te tavini nei te au Kerititiano mou ei au kite no Iehova.—E tatau ia Angaanga 15:14, 17.

Kua akaaere a Iesu i tana au pipi kia akakite no runga ia Iehova e kia akariro i to te pa enua katoa ei au pipi. (Mataio 10:7, 11; 24:14; 28:19, 20) Te vaitata nei teia angaanga ki tona take. Teia te taime mua, i taokotai mai ei a Iehova i te mirioni ua atu mei te pa enua katoa ki te akamorianga mou. (Apokalupo 7:9, 10) Kua akaaere katoaia te au Kerititiano mou kia akamaroiroi e kia tauturu atu i tetai e tetai. I te ao katoa nei, aiteite ua ta ratou porokaramu apii Pipiria i ko i ta ratou au uipaanga.​—E tatau ia Ebera 10:24, 25.

  3. Akapeea te akamata mai anga te Au Kite o Iehova i teia au tuatau?

Akamata mai te akaaerenga o te Au Kite o Iehova i teia au tuatau, i te au mataiti 1870. Kua kite akaou mai tetai pupu meangiti apii Pipiria i te au tuatua mou Pipiria tei ngaro ana. Kua kite ratou e kua akaaere a Iesu i te putuputuanga Kerititiano kia tutu aere. No reira kua rave ratou i tetai kamupeini i te ao katoa nei kia tutu aere i te Patireia. I te mataiti 1931, kua ariki ratou i te ingoa, Au Kite o Iehova.​—E tatau ia Angaanga 1:8; 2:1, 4; 5:42.

4. Akapeea te Au Kite o Iehova te akaaereia anga i teia tuatau?

I te anere mataiti mua, kua puapingaia te au putuputuanga Kerititiano i te au enua e manganui mei te aratakianga a tetai pupu akaaere tei ariki e ko Iesu te Upoko o te putuputuanga. (Angaanga 16:4, 5) E mei te reira katoa i teia tuatau, e ariki ana te Au Kite o Iehova e ko Iesu to ratou Arataki. (Mataio 23:9, 10) Te puapinga katoaia ra ratou mei te aratakianga a te Pupu Akaaere, e aronga pakari tukatau e oronga maira i te akamaroiroianga e te aratakianga Tuatua Tapu no te 100,000 tuma putuputuanga. I roto i te putuputuanga tataki tai, te tavini ra te au tane tukatau ei aronga pakari, me kore ei au akaaere. E akono ana teia au taeake i te anana a te Atua ma te aroa takinga meitaki.​—E tatau ia 1 Petero 5:2, 3.

Kua akaaereia te Au Kite o Iehova kia tutu aere i te tuatua meitaki e kia akariro i te tangata ei pipi. Kia rauka i te tauturu i te tangata i te au ngai katoatoa, ka uri ratou, ka nenei, e ka tua aere i te au puka apii Pipiria i roto i te 500 tuma reo. Mei te au apotetoro rai, e tutu aere ana ratou mei tera are ki tera are. (Angaanga 20:20) E oronga ana ratou kia apii i te Pipiria ki te aronga tei inangaro tikai i te tuatua mou. Te mea maata ki te iti tangata o Iehova, kia akamareka i te Atua e kia tauturu i etai ke, no reira e akaaerenga iti tangata mataora to ratou.​—E tatau ia Salamo 33:12; Angaanga 20:35.

No tetai akakiteanga maata atu, akara i te pene 19 o teia puka, Eaa Tikai ta te Pipiria e Apii Maira?, neneiia e te Au Kite o Iehova.