Te Tika no Runga ia Aramakito

“E au vaerua demoni . . . tei aere ki te ui ariki o te ao katoa nei . . ., Kua akaputuputu iora ratou i tetai ngai, ko Aramagido te ingoa i te tuatua Ebera.”(Na matou te tuatua arara.)​—APOKALUPO 16:14, 16.

E IRINAKIIA ana e e ngai tetai ko Aramakito te ingoa. Inara kare e ngai akapera i vai ana i tetai ua atu ngai tikai i te enua nei.

Eaa i reira te aiteanga o te tuatua “Aramakito”? Eaa ra te reira i akapiri putuputuia ai ki tetai tupuanga, mei te tamaki te tu?

Akaputuputu Mai ki te Ngai ko Aramakito te Ingoa

Te tuatua Epera mua ko Har–Magedon, te aiteanga tikai ko te “Maunga o Megido.” Noatu e kare e maunga tika tikai mei te reira i vai ana, te vai nei ra tetai ngai tei kiteaia e ko Megido. Ka kiteaia te reira i tetai ngai puapinga e tukati ra i tetai nga mataara i te tua tokerau opunga o te ngai tei nooia e te iti tangata o Iseraela i taito. E maata te au tamaki puapinga tei raveia ana vaitata atu ki taua ngai ra. No reira te ingoa Megido, i akapiriia atu ei ki te tamaki. *

Inara, ko te puapinga tikai o Megido, kare e eaa ua ai te au tamaki i raveia ana i reira, mari ra, te tumu i raveia ai te reira. E tuanga a Megido no te Enua Taputouia ta te Atua ko Iehova i oronga no te ngati Iseraela. (Exodo 33:1; Iosua 12:7, 21) Kua tia aia ki taua iti  tangata ra e ka paruru aia ia ratou mei te au enemi, e kua akapera rai aia. (Deuteronomi 6:18, 19) Ei akaraanga, i Megido a Iehova i paruru temeio ei i te ngati Iseraela mei te nuku tamaki o te ariki o Kanaana ko Iabina, e tona rangatira vaeau ko Sisera.​—Te Au Akava 4:14-16.

No reira, e akatutuanga puapinga tikai to te tuatua “Har–Magedon,” me kore “Aramakito.” Te piri atura te reira ki tetai tamakianga i rotopu i tetai nga nuku ririnui e rua.

Te tuatua ra te totou i roto ia Apokalupo i tetai tuatau e vaitata maira, me akanauru a Satani e te au temoni i te au kavamani tangata kia akaputuputu mai i to ratou au nuku, i te akaao anga atu i ta te Atua au angaanga. Ka taopenga mai taua tamaki ra ki te mate o te mirioni ua atu tangata, me akavi te Atua i taua au enemi ra.​—Apokalupo 19:11-18.

Eaa ra te Atua, ta te Pipiria i akataka mai e e ‘akaperepere, kare rava e riri vave, e te takinga-meitaki maata,’ ka akatupu ei i te mate o te tangata e manganui? (Nehemia 9:17) Kia marama i ta te Atua ka rave, ka anoanoia tatou kia pau e toru uianga: (1) Naai e akamata i taua tamaki ra? (2) Eaa te tumu ka o mai ei te Atua? (3) Eaa te puapinga mutu kore ta teia tamaki ka akatupu ki te enua e te tangata i reira?

1. NAAI E AKAMATA I TAUA TAMAKI RA?

Kare te tamaki o Aramakito i te angaanga kaitamaki na te Atua. Mari ra, ka paruru te Atua i te aronga meitaki mei te aronga e kaitamaki maira ia ratou. Te aronga kaitamaki i roto i teia tamakianga, ko “te ui ariki o te ao katoa,” te au arataki o teianei ao. Eaa te tumu no te tamaki? No te mea, ka akanauru a Satani i te au rima rave o te kavamani e to te vaeau kia tamaki atu i te aronga e akamori ra i te Atua ko Iehova.​—Apokalupo 16:13, 14; 19:17, 18.

No te mea e puapinga atu ki te tangata te tikaanga kia tuatua e kia akamori, i roto i tetai au enua i teia tuatau, ko te manako e ka arai me kore ka takore te au kavamani i tetai ua atu akamorianga, i te akara anga kare e tupu. Kareka ra, kua tupu ana taua tu tamaki ra i te 20 anere mataiti e te tupu ra i teianei. * Noatu ra, e rua ia nga mea tuke maata i rotopu i te au tamakianga o mua atu e te tamaki  e piri atura kia Aramakito. Mea mua, ka o mai te ao katoa ki teia tamaki. Te rua, me ariu atu a Iehova, ka pakari kino roa atu i tana i rave ana i te tuatau i topa. (Ieremia 25:32, 33) Te akataka maira te Pipiria i teia tamakianga e ko ‘te tamaki o te rā maata o te Atua Mana Katoatoa.’

2. EAA TE TUMU KA O MAI EI TE ATUA?

Kua akakite a Iehova ki te aronga e akamori ra iaia, kia au ua e kia aroa atu i to ratou enemi. (Mika 4:1-3; Mataio 5:43, 44; 26:52) No reira, kare ratou e rave i te apinga tamaki ei paruru ia ratou me tupu teia tamakianga kino. Me kare te Atua e paruru i tona iti tangata, ka akapou takiriia ratou. No reira, te o maira te ingoa o te Atua ko Iehova, me kore tona rongo meitaki. Me ka rauka i tona au enemi i te akapou i Tona iti tangata, tera i reira ka riro a Iehova ei Atua aroa kore, tau kore e te puapinga kore ua. Kare rava te reira e tupu!​—Salamo 37:28, 29.

Kare te Atua e inangaro i te takore i te tangata, no reira e maata tana akamatakiteanga e oronga maira no tana ka rave. (2 Petero 3:9) Na roto i te au papaanga tei rekotiia i roto i te Pipiria, te akamaara maira aia i te katoatoa e kua tupau ana aia i te kino tei raveia ki tona iti tangata i mua ana. (2 Ariki 19:35) Akamatakite katoa mai te Pipiria e, a te tuatau ki mua me tamaki mai a Satani e tona au tangata turuturu i te iti tangata o te Atua, ka tupau akaou a Iehova i te aronga e tamaki maira i tona iti tangata. Kua totou ke ana te Tuatua a te Atua e ka takore a Iehova i te aronga kino. (Maseli 2:21, 22; 2 Tesalonia 1:6-9) A taua taime ra, ka papu meitaki i te au enemi e ko te Mana Katoatoa uaorai ta ratou e tamaki atura.​—Ezekiela 38:21-23.

3. EAA TE PUAPINGA MUTU KORE KA RAUKA MAI I TEIA TAMAKI?

Mirioni ua atu te ka akaoraia mai i roto i te tamaki o Aramakito. E akamataanga te reira no tetai tuatau au i te enua nei.​—Apokalupo 21:3, 4.

Te tuatua ra te puka o Apokalupo no runga i tetai “aronga maata rava” te ka ora mai mei teia tamakianga. (Apokalupo 7:9, 14) Raro i te aratakianga a te Atua, ka tauturu teia aronga i te akaoki akaou i te enua ki te au turanga Parataito ta Iehova i akakoro i mua ana.

Kua kite ainei tatou e aea e tae mai ei teia tamaki ki runga i te iti tangata o te Atua?

[Au Tataanga Rikiriki i Raro]

[Tutu i te kapi 6]

Kua paruru ana te Atua ko Iehova i tona iti tangata i te tuatau i topa

[Tutu i te kapi 7]

Ka paruru akaou rai a Iehova i tona iti tangata, i te tamaki o Aramakito