KUA akakiteia ana ainei kia koe kia mou piri tikai i tetai apinga?— * Penei ka akakite te au metua e te au puapii ki te au tamariki mapu kia rave ua rai i ta ratou apii. Koia oki kia akamanako i te reira ei mea puapinga tikai. Ka tuatua tatou no runga i tetai tangata ta te Pipiria i akakite mai tei ‘piri tikai kia Iehova,’ te Atua mou. Tona ingoa ko Hezekia. Ka akara ana tatou eaa ta tatou ka apii mai mei tana akaraanga.

Kare a Hezekia i mataora ana i tona tamarikianga. Kua akamutu tona metua tane ko Ahaza, te ariki o Iuda, i te tavinianga ia Iehova. Kua akamata a Ahaza i te akamori i te au atua pikikaa, te tamariki ra rai a Hezekia. Kua akaue ana a Ahaza kia tamateia tetai tamaiti ana​—e teina no Hezekia—​e kia orongaia atu ei atinga ki te atua ta Ahaza e akamori ra!

Noatu kua rave ua rai a Ahaza i te au mea kino, kua akarongo rai a Hezekia kia Iehova. I toou manako kua ngata iaia i te rave i teia?— Ae. Kare ra a Hezekia i tuku ana i te au! Ka apii ana tatou akapeea i rauka ai iaia kia piri tikai kia Iehova, e akapeea tatou me akapera.

Kua apii ana a Hezekia no runga i tetai ke tei piri tikai kia Iehova. Ko Davida tetai. Noatu kua ora ana a Davida i tetai au anere mataiti i mua ana, kua apii a Hezekia no runga iaia mei roto mai i te au Tuatua Tapu. Kua tata a Davida e: “Akaruke ua toku metua tane e toku metua vaine iaku, ei reirā Iehova e rave mai ei iaku.”

Te kite ra ainei koe e eaa tei tauturu ia Davida kia akarongo kia Iehova?— Tona akarongo! Kua irinaki papu a Davida e me akarongo aia, ka tauturu  mai a Iehova iaia. Kare roa a Davida i ekoko ana no runga i te reira! Papu e te akamanako anga aia no runga ia Davida i tauturuia ai a Hezekia kia piri tikai kia Iehova na te akarongo anga Kiaia. Ka rauka katoa ia koe te irinaki papu e ka tauturu mai a Iehova ia koe me piri tikai koe kiaia na te akarongo anga kiaia.

Akapeea ra me kare toou metua tane e toou metua vaine e akamori ana ia Iehova?— Te karanga ra te Atua e kia akarongo te tamariki ki to ratou au metua. No reira, e akarongo koe ki toou. Inara, me akakite mai toou nga metua kia rave koe i tetai mea te karanga ra te Atua e auraka koe e rave, e akamarama atu koe i te tumu kare koe e akapera. Auraka koe e pikikaa, keia, me kore e rave i tetai ua atu mea ta te Atua i karanga e e tarevake, noatu koai ka akakite kia koe kia rave i te reira. E tikaanga toou kia akarongo ki te Atua!

E au akaraanga meitaki tetai no tatou kia aru. Kua riro a Davida ei akaraanga no Hezekia pera katoa tona uaorai papa ruau ko Iotama. Kua rauka ia Hezekia i te apii no runga iaia, mei ia tatou rai i teia tuatau mei roto mai i ta tatou Pipiria. E au akaraanga meitaki ainei taau i kite ka rauka ia tatou i te aru?—

E tika, ka rauka ia koe i te apii i roto i te Pipiria no runga i tetai au tarevake ta Hezekia, Davida, Iotama, e tetai au tangata apa ua i rave. Inara, e inangaro to taua aronga ra ia Iehova, kua akakite i to ratou tarevake, e kua tauta i te rave i te mea tika. Akamaara e, ko te Tamaiti a te Atua anake, ko Iesu tei apa kore. E apii tatou no runga iaia e e tauta i te aru i tona akaraanga.