Au Temeio Tei Vaitata ua i te Tupu

ME E taote vavai tetai tei akatakaia kia rave i tetai vavaianga ngata ki runga ia koe, eaa ra toou manako me kite mai koe e kare rava aia i rave ana i teia tu vavai i mua ana? Kare e ekoko e ka manamanata koe. Ka akapeea ra me kitea mai e koe e e taote vavai karape teia i roto i tana angaanga, e e maata tana au vavai i rave ana mei toou rai, tei puapingaia? Kare ainei tera e akamaata atu i toou irinakianga e ka rauka iaia i te tauturu mai ia koe?

Ka anoano maataia te “rapakauanga” no teia ao maki e noo nei tatou i roto. Na roto i tana Tuatua te Pipiria, kua taputou te Atua ko Iehova e ka akaoki akaou mai aia i te Parataito ki te enua nei. (2 Petero 3:13) Inara no te reira kia tupu, mea mua ka anoanoia te takore i te au tu kino, te kiriti tumu takiri i te reira. (Salamo 37:9-11; Maseli 2:21, 22) Te au turanga taitaia pouroa ta tatou e kite nei, ka anoanoia kia takoreia i mua ake ka akanoo akaouia ai te parataito. E temeio tika tikai te ka anoanoia no te reira kia tupu!​—Apokalupo 21:4, 5.

Irinaki te Au Kite o Iehova e kare e roa atu ka tupu taua au tauianga maata. Eaa te tumu? No te mea te akapapu maira te au temeio ta te Atua ko Iehova i rave takere ana e, e mana tona i te akatupu i tana au taputou. Ina ka akaaite ana e ono ua o te au temeio tei rekotiia i roto i te Pipiria e ta te reira au taputou no te tuatau ki mua.

 Kia apii ua atu rai koe no runga i te au taputou a te Pipiria no to tatou tuatau ki mua. I toou akarongo e tupu ra, ka tupu katoa toou manakonakoanga​—kia ora a te tuatau e kite ei koe uaorai i te puapinga o te au temeio ta Iehova ka rave.

 [Pia/​Au Tutu i te kapi 9, 10]

TEMEIO:

TAUATINI UA ATU TA IESU I ANGAI KI NGA MEA VARAOA UA E TE IKA.​—MATAIO 14:13-21; MAREKO 8:1-9; IOANE 6:1-14.

TAPUTOU:

“Ei reira e ua maata mai ei te enua, e na te Atua, na to tatou uaorai Atua, e akameitaki mai ia tatou nei!”​—SALAMO 67:6.

AITEANGA NO TATOU:

KARE RAVA E TANGATA E KITE AKAOU I TE ONGE.

TEMEIO:

KUA AKAPUERA AKAOU A IESU I TE MATA O TE MATAPO.​—MATAIO 9:27-31; MAREKO 8:22-26.

TAPUTOU:

“Ei reira e akapueraiaʼi te mata o te matapo ra.”​—ISAIA 35:5.

AITEANGA NO TATOU:

KA KITE AKAOU TE ARONGA MATAPO.

TEMEIO:

KUA AKAORA A IESU I TE PIRIKOKI.​—MATAIO 11:5, 6; IOANE 5:3-9.

TAPUTOU:

“Ei reira te pirikoki e rererere aere ei mei te aili.”​—ISAIA 35:6.

AITEANGA NO TATOU:

KA AKAORAIA TE AU TU MAKI.

TEMEIO:

KUA AKAORA A IESU I TE AU MAKI TUKEKE.​—MAREKO 1:32-34; LUKA 4:40.

TAPUTOU:

“Kare oki to reira e karanga e, Kua maki au.”​—ISAIA 33:24.

AITEANGA NO TATOU:

KA TAKOREIA TE AU MAKI AKAAPIKEPIKE. KA REKAREKA TATOU I TE ORAANGA KOPAPA MEITAKI.

TEMEIO:

RAUKA IA IESU I TE AKAAERE I TE REVA E TE TAI.​—MATAIO 8:23-27; LUKA 8:22-25.

TAPUTOU:

“E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira. Kare ratou e angaanga puapinga kore ua.”​—ISAIA 65:21, 23.

“Ei te atea ke te takinga-kino ia koe; kare oki koe e mataku; e i te rikarika, kare oki te reira e akavaitata mai ia koe ra.”​—ISAIA 54:14.

AITEANGA NO TATOU:

KA KORE TE AU TUMATETENGA NATURA.

TEMEIO:

KUA AKATU A IESU I TEI MATE.​—MATAIO 9:18-26; LUKA 7:11-17.

TAPUTOU:

‘Te aronga katoa i roto i te rua ka aere mai ki vao.’—IOANE 5:28, 29.

“E kua tuku maira te tai i te aronga i mate i roto iaia ra; e kua tuku maira te vaarua e ko ade i te aronga i mate i roto ia raua ra.”​—APOKALUPO 20:13.

AITEANGA NO TATOU:

KA AKATU AKAOUIA MAI TO TATOU AU AKAPEREPERE TEI MATE.