Eaa ka Inangaro ei Kia Kite no Runga i te au Temeio?

“Te aati ra te aiteanga o te temeio i te au kaveinga o te kite taieni.”​—RICHARD DAWKINS, FORMER PROFESSOR FOR PUBLIC UNDERSTANDING OF SCIENCE.

“E tumuanga tau tikai to te irinaki i roto i te au temeio. Kare te au temeio e patoi ra i te irinakianga akonoanga, e akairo ra te reira no to te Atua aroa e tona inangaro i te akatupu i tana apainga no tana au mea i anga.”​—ROBERT A. LARMER, PROFESSOR OF PHILOSOPHY.

“E IRINAKI ana rai koe i roto i te au temeio?” Mei tei akaariia mai e te au tuatua i runga akenei, e tuketuke te au tumu manako. Ka akapeea ra koe me pau i taua uianga ra?

Penei ka emiemi koe i te pau e, “Ae, e irinaki ana au.” Penei ka manako koe e me akapera koe, te akaari maira te reira e te irinaki ra koe i tetai au mea tuke ake rai me kore, kare koe i apiiia ana. E maata rai tei manako akapera ana.

Tetai tua, penei kua papu ia koe e e tupu tika ana te au temeio. Penei te irinaki ra koe i te au temeio tei rekotiia i roto i te Pipiria, mei te vee anga rai a Mose i te Tai Muramura. Penei te irinaki katoa ra koe e e tupu ana te au temeio i to tatou nei tuatau. Te akaari maira tetai ripoti i oti ua akenei e “e manganui te tangata i te Pae Opunga o te ao​—ei akaraanga, mei te toru kota o te tangata i Marike, e e 38 patene i Peritane​—te irinaki nei rai i roto i te au temeio.” (The Cambridge Companion to Miracles, na Graham H. Twelftree i tata) E kare ko te au Kerititiano ua te irinaki ana i roto i te au temeio. Te karanga ra te Britannica Encyclopedia of World Religions e, ko te irinaki i roto i te au tupuanga temeio “e tuanga puapinga te reira no te irinakianga o te au akonoanga pouroa.”

Penei ko koe tetai i roto i te toru o te tuanga te ka pau mai e: “Kare au i kite, e kare rai au e kea atu ana! Kare e temeio e tupu  ana i roto i toku oraanga!” No teaa tikai ra koe ka tau ei kia inangaro i te kite no runga i te au temeio?

Akamanako ana i teia turanga: Tamanako ua koe e e maki kino toou kare e rauka kia rapakauia. Mei te mea e ka tatau koe i tetai ripoti i roto i tetai tianara rapakauanga rongo meitaki no runga i tetai vairakau ou te ka akaora i toou maki, kare ainei i te mea meitaki kia akapou i te taime e te maroiroi i te kimi e me e tika tikai te reira? Te taputou maira rai te Pipiria e kare e roa atu ka tupu tetai au temeio umere tikai. Ka akatuke te reira i te oraanga o te tangata ravarai i runga nei i te enua. Kare ainei e paunaia toou taime e te maroiroi i te kimi e me ka tau kia irinakiia taua taputou ra?

Inara, i mua ake ka makitoro mari ei tatou e eaa taua au temeio tei taputouia mai, ka pau ana tatou e toru au patoianga no runga i te au temeio.

[Pia i te kapi 3]

EAA TEIA MEA E TEMEIO?

E tupuanga te reira kare roa e rauka i tetai ua atu tangata pera tetai ua atu mana natura i te rave.