Te ui nei teia atikara i te au uianga penei tei ui ana koe, e te akaari maira i te ngai ka rauka ia koe te tatau i te au pauanga i roto i taau Pipiria. Ka rekareka te Au Kite o Iehova i te uriuri i teia au pauanga kia koe.

1. Koai ma te au angera?

E au vaerua ora te au angera e noo ra i runga i te rangi. E turanga teitei atu to ratou i to te tangata. Na te Atua mou, e vaerua katoa aia, i anga i te au angera i mua ake ka anga mai ei aia i te enua. (Iobu 38:4, 7; Mataio 18:10) Kua koropiniia a Iehova e te au angera tiratiratu e mirioni ua atu.​—E tatau ia Salamo 103:20, 21; Daniela 7:9, 10.

2. Ka tauturu ainei te au angera i te tangata?

Kua tauturu tetai nga angera i te tangata tiratiratu ko Lota. E noo ana aia i tetai oire ta te Atua ka takore no te tu kino o te tangata. Kua akamatakite tetai nga angera ia Lota e tona pamiri kia oro. Kua manako tetai aronga e e tuatua kanga ua teia akamatakiteanga e kua kopae i te reira. Inara kua ora mai a Lota e tana nga tamaine no tei akarongo ratou i te akamatakiteanga ta te Atua i tuku mai na roto i te nga angera.​—E tatau ia Genese 19:1, 13-17, 26.

Kia tau ki te Pipiria, te tauturu nei te au angera i te tangata i teia tuatau, na te arataki anga i te angaanga a te aronga e tutu aere ra ma te tiratiratu i te tuatua meitaki o te Patireia o te Atua. (Mataio 24:14) E akamatakiteanga tetai e o maira ki teia tuatua meitaki. Mei te akamatakiteanga tei orongaia kia Lota, kare te reira i te tuatua kanga ua. No ko mai te reira i te Atua, na roto i tana au angera.​—E tatau ia Apokalupo 1:1; 14:6, 7.

Ka rauka i te Atua i te taangaanga i te au angera kia akamaroiroi ia tatou me aro atu i te au timataanga. Kua taangaanga aia i tetai angera kia akamaroiroi ia Iesu.​—E tatau ia Luka 22:41-43.

Kare e roa atu ana ka taangaanga te Atua i te au angera na roto i tetai mataara ke—ei takore atu i te aronga e akatupu nei i te kino. Ka akatupu te reira i te mataora ki te tangata.​—E tatau ia 2 Tesalonia 1:6-8.

  3. Eaa te akakeuanga o te au temoni ki runga ia tatou?

Mei te au tangata e manganui i te enua nei tei akarongo kore i te Atua, pera katoa i runga i te rangi, e maata te au angera tei meameaau i te Atua. (2 Petero 2:4) Te au angera akarongo kore, e au temoni ratou. To ratou pu ko Satani, te Tiaporo. Te pikikaa nei a Satani e tana au temoni i te tangata.​—E tatau ia Apokalupo 12:9.

E taangaanga ana a Satani i te au pitiniti pikikaa, au kavamani tangata, e te au akonoanga pikikaa ei akavare i te tangata kia uri ke mei te Atua. No reira ko Satani te akatupu nei i te tu tika kore, te ta ua, e te mamae ki te tangata.​—E tatau ia 1 Ioane 5:19.

4. E akapeea ana te au temoni me pikikaa i te tangata?

E manganui te tangata ta Satani i akavare na te apiianga e ka riro mai te aronga tei mate ei au vaerua te ka rauka i te tuatua mai kia ratou. Inara te akakite maira te Pipiria e kare a te aronga mate apinga e kite ana. (Koheleta 9:5) Inara, e akavare ua ana te au temoni i te tangata na te akatutu mai anga i te reo o te aronga i mate. (Isaia 8:19) E pikikaa ana te au temoni i tetai pae na roto i te au taunga vaerua kino, aronga purepure, au tauraatua, e te aronga akara etu. Te akamatakite mai nei te Tuatua a te Atua ia tatou kia kopae i taua au angaanga ra. No reira, kia titiri tatou i tetai ua atu apinga e piri atura ki te au temoni e te au ravenga purepure.​—E tatau ia Deuteronomi 18:10, 11; Angaanga 19:19.

Me e inangaro to tatou ia Iehova, kare tatou e mataku i te au temoni. Me apii tatou i te Tuatua a te Atua e me rave i te reira, te patoi ra tatou i te Tiaporo, e te akavaitata atura tatou ki te Atua. E ririnui atu a Iehova i te au temoni. Ka rauka i tana au angera tiratiratu i te akamaroiroi ia tatou me rokoia tatou e te kino.​—E tatau ia Salamo 34:7; Iakobo 4:7, 8.

No tetai akakiteanga maata atu, akara i te pene 10 o teia puka, Eaa Tikai ta te Pipiria e Apii Maira?, tei neneiia e te Au Kite o Iehova.