Ka Rauka Ainei ia Koe te Irinaki i te au Temeio Tei Rekotiia i Roto i te Pipiria?

ME AKAKITEIA atu tetai tua umere tikai kia koe, kare ainei te tu tiratiratu o te tangata nana e akakite ra i te tua, e akakeu ia koe kia irinaki i taua tua ra? No taua tu tiratiratu ra, ka o mai te tu i akakite ei taua tangata ra i te tua pera katoa tona uaorai rongo meitaki no te akakite i te tika. Ina e, i te au mataiti i aereia mai ana, i akakite ua ana aia i te tika e kare rava i pikikaa ana ia koe, no reira e tumuanga tau toou kia irinaki i tana e akakite maira kia koe i teianei.

Aite rai te reira ki te au temeio tei rekotiia i roto i te Pipiria. Kare tetai ia tatou e ora ra i te tupuanga taua au mea ra. Inara, ka rauka ia tatou i te akapapu e me ka tau kia irinaki i taua tua Pipiria ra​—e me e tika te reira. Akapeea ra? Teia tetai au tumu tika ei turu i te tu tiratiratu o te au papaanga Pipiria no te au temeio.

Manganui te au temeio tei raveia i te au ngai tangata. Tetai au taime, e tauatini me kore e mirioni ua atu aronga akarakara tei kite. (Exodo 14:21-31; 19:16-19) Kare te reira i rave muna uaia i te ngai kare te tangata e kite maira.

Ngoie ua te tu i raveia ai te au temeio. Kare i anoanoia te au apinga ke, au peu akaariari, e te au ravenga akavare. Te au temeio tei rekotiia i roto i te Pipiria, i tupu mai te reira no te patianga a te au tangata, e kare katoa te reira i te mea paraniia. (Mareko 5:25-29; Luka 7:11-16) Kare e tano e e mea paraniia teia au temeio e te tangata nana e rave ra i te reira.

Kare te akakoroanga o te aronga e rave ra i te au temeio e kia rongonui, akameitakiia, e kia puapingaia ratou. Mari ra, ei akakaka i te Atua. (Ioane 11:1-4, 15, 40) Akaapa te Pipiria i tetai ua atu tautaanga a te tangata kia rauka te puapinga mei taua mana angaanga temeio ra.​—2 Ariki 5:15, 16, 20, 25-27; Angaanga 8:18-23.

Te akaari maira te au temeio tukeke tei rekotiia i roto i te Pipiria e kare te reira i te angaanga na te tangata ua nei. Ei akatauanga, kua akamarinoia te tai e te matangi, kua akariroia te vai ei uaina, maro ua kare e ua e oti kua akatopaia mai te ua, kua akaoraia te maki, e kua kite akaou te aronga matapo. Te akaari pouroa maira taua au temeio, e te au temeio e manganui e na tetai mana ririnui atu i to te tangata ki rungao i te au mea tini ravarai, i rave i taua au temeio ra.​—1 Ariki 17:1-7; 18:41-45; Mataio 8:24-27; Luka 17:11-19; Ioane 2:1-11; 9:1-7.

Kare te aronga patoi tei kite i te tupu anga te au temeio i karanga ana e kare te reira i tupu ana. Te akatuakaou mai anga a Iesu i tona taeake ia Lazaro, kare tona au enemi i karanga ana e kare a Lazaro i mate ana. Eaa ra oki ratou ka ekoko ei? Ina e a ra i teianei te tanumia anga a Lazaro. (Ioane 11:45-48; 12:9-11) E i te au anere  mataiti katoa i muri ake i te matenga o Iesu, kua ariki rai te aronga i tataia ai te au Ture a te ngati Iuda [te Talmud] e e mana to Iesu te rave angaanga temeio. Ta ratou ua i ekoko, koia oki noai taua mana ra. Mei te reira rai te apaiia anga te au pipi a Iesu ki mua i te akavaanga ngati Iuda, kare i uiia ana kia ratou e “I rave ana rai kotou i tetai temeio?” Kua uiia ra kia ratou e: “Noai te mana, e te ingoa, i tikaʼi teianei i ta korua i rave nei?”​—Angaanga 4:1-13.

No reira ka irinaki ainei koe i ta te Pipiria e akakite maira no runga i te au temeio? Mei ta tatou i akamanako ua akenei, te taka ua ra te au akapapuanga a te Pipiria no runga i te tu tiratiratu o te au temeio. E au tumuanga ke atu rai tetai kia irinaki i teia au papaanga Pipiria. Ei akaraanga, me akakite mai te Pipiria i tetai tupuanga, e akakite ua mai ana rai te reira i te taime, te ngai, e te ingoa o te au tangata e o maira. E umere katoa ana te aronga akaapa i te Pipiria i te tu tika tikai o te au tuatua enua tataki tai i roto i te Pipiria. Anere ua atu te au totou Pipiria tei akatupuia, e tae ua atu ki te au mea rikiriki. Kapiti mai, e maata ua atu te ako a te Pipiria no runga i te au pirianga mataora o te tangata​—tei riro ei tauturu i te tangata mei te au turanga tukeke o te oraanga. No runga i te au pirianga tangata, kare e mea ke e aite atu ki te akoanga a te Pipiria.

Me kare i rauka ake ia koe te irinakianga papu tikai i roto i te Pipiria, kore ei koe e akataka i tetai taime i te makitoro marie i te reira? Te maata atu i taau ka kite no runga i te Pipiria, ko te maata atu ia toou irinakianga i roto i te reira. (Ioane 17:17) Ka kite koe e ka rauka ia koe kia irinaki i ta te reira e akakite maira kia koe no runga i te au temeio tei tupu ana i te au tuatau i topa. Me rauka ana ia koe te irinaki i taua au papaanga ra, e tumuanga meitaki tikai toou te irinaki i ta te Pipiria e akakite maira e ka tupu a te tuatau ki mua e vaitata mai nei.

[Tutu i te kapi 7]

Kare to Iesu au enemi i karanga ana e kare a Lazaro i mate ana