Ae, i te ao katoa e mirioni ua atu au vaine e tangaanga ana te Au Kite o Iehova ei au orometua. E nuku maata ratou e tutu aere ra i te tuatua meitaki o te Patireia o te Atua. Kua totou mai a Salamo 68:11 no runga i taua au orometua e: “Kua tuku maira te Atu ra [ko Iehova] i te tuatua, e na tetai nuku tamaine maata i akakite.”

Inara, eiaa e manako e te aite ra te angaanga orometua a te au vaine e Au Kite no Iehova, ki te angaanga a te au vaine i roto i te au akonoanga ke atu. E aka tuke tetai i rotopu ia ratou. Eaa ra te tuke ia ratou?

E tuke rai te aronga e tuatua atu ana ratou i roto i ta ratou angaanga orometua. Te au orometua vaine o Keritititome, e au taoonga akaaere to ratou i roto i to ratou uaorai au ekaretia, e te aronga e akarongo mai ana kia ratou, e au mema rai no to ratou ekaretia. Te au vaine orometua o te Au Kite o Iehova, ko ta ratou aronga e tutu atu ana, no vaoo ake i te putuputuanga, koia oki te katoatoa ta ratou e aravei ana i roto i ta ratou angaanga orometua mei tera are ki tera are e tetai au ngai ke atu.

Tetai mataara ke i tuke ei te au vaine orometua o te Au Kite o Iehova mei te au vaine i roto i te au akonoanga ke mai, koia oki ta ratou angaanga i roto i te putuputuanga. Te au orometua vaine o Keritititome e te au akonoanga ke mai, na ratou rai e akaaere ana e e apii ana i te au mema o to ratou ekaretia no runga i te irinakianga a ta ratou akonoanga. Te au vaine orometua ra o te Au Kite o Iehova, kare ratou e apii ana i roto i te putuputuanga me e au tane papetitoia tetai i reira. Na te au tane anake tei akataoongaia kia apii, e rave ana i te reira.​—1 Timoteo 3:2; Iakobo 3:1.

Te akataka maira te Pipiria e ko te au tane anake ua, tei akamanaia kia akaaere i te putuputuanga. Akara ana i te akaraanga ta te apotetoro ko Paulo i akanoo i te tata anga aia ki tona taeake akaaere ko Tito e: “Teia te mea i vaoo ei au ia koe i Kereta na, . . . kia akataoonga i te [“au tane,” NW ] orometua i te au oire katoa.” Kua kapiti katoa atu a Paulo e ko te au tane tei akataoongaia, ei au ‘tangata apa kore ratou, ei vaine okotai.’ (Tito 1:5, 6) Kua oronga a Paulo i te ikuikuanga mei te reira rai kia Timoteo i roto i tana reta e: “Kia inangaro tetai tangata i te taoonga episekopo ra, kua inangaro aia i te angaanga meitaki. Ei tangata apa kore ra te episekopo e tikaʼi, ei tangata vaine okotai, . . . e te tau kia apii.”​—1 Timoteo 3:1, 2.

Eaa ra i riro ei na te au tane ua e rave i te au apainga akaaere i roto i te putuputuanga? Te akakite maira a Paulo e: ‘Kare ra e tika iaku kia apii te vaine, e kia akateitei ki runga i te tane ra, kia muteki ua ra. Ko Adamu oki tei angaia na mua, i muri ake a Eva.’ (1 Timoteo 2:12, 13) No reira, te akaari maira te akanoonooanga o te au mea angaia, i te tumu i oronga ai te Atua i te apainga o te apii e te akaaere na te au tane.

E aru ana te au orometua a Iehova i te akaraanga a to ratou Arataki, ko Iesu Karaiti. Kua tata te pipi ko Luka no runga i te angaanga orometua a Iesu e: “Aere atura aia na roto i te au oire, e te au vila katoa, i te tutu aere anga i te tuatua meitaki i te basileia o te Atua.” Muri mai, kua tono a Iesu i tana au pipi kia rave i taua angaanga ra: “Aere atura ratou na roto i te au vila, i te tutu aere anga i te tuatua meitaki.”​—Luka 8:1; 9:2-6.

Teia tuatau, e angaanga maroiroi ana te au orometua a Iehova​—te tane e te vaine—​i te rave i ta Iesu i totou e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”​—Mataio 24:14.