Mei tei akaariia i roto i te tutu i te tua katau, manganui te tangata e manako ra e a te Ra Akavaanga e pirioni ua atu tangata ka apaiia mai ki mua i te terono o te Atua, kia akavaia no ta ratou angaanga i rave ana i mua ana—tetai pae ki te oraanga i runga i te rangi, e tetai pae ka tamamaeia i roto i ate. Kareka ra, te akaari maira te Pipiria e ko te akakoroanga o te Ra Akavaanga, kia akamatara mai i te tangata mei te au tu tika kore. (Salamo 96:13) Kua iki te Atua ia Iesu ei Akava kia rauka akaou te tu tika no te tangata ravarai.​—E tatau ia Isaia 11:1-5; Angaanga 17:31.

Te rave akakoro anga te tangata mua a Adamu i te meameaau i te Atua, kua akao pouroa aia i tona uanga ki roto i te ara, te mamae, e te mate. (Roma 5:12) Ei akatano i taua tu tika kore ra, ka akatu akaou mai a Iesu i te pirioni ua atu tangata mei te mate. Te akaari maira te puka o Apokalupo e ka tupu teia i te tuatau o te tutaraanga tauatini mataiti a Iesu Karaiti.​—E tatau ia Apokalupo 20:4, 11, 12.

Ka akavaia te aronga tei akatu akaouia mai, kare no runga i ta ratou i rave i mua ake ka mate ei ratou, mari ra i ta ratou ka rave me eeuia mai “nga puka” tei taikuia i roto ia Apokalupo pene 20. (Roma 6:7) Roto i te aronga ka ora akaou mai e tei rauka te tikaanga i te apii no runga i te Atua, ko “te aronga tuatua-tika e te aronga tuatua-tika kore,” ta te apotetoro ko Paulo i akakite mai.​—E tatau ia Angaanga 24:15.

Te aronga tei mate e kare ratou i apii ana no runga i te Atua ko Iehova e kare i tavini ana iaia, ka rauka ia ratou te tikaanga kia taui e kia rave i te mea meitaki. Me akapera ratou, ka rauka “te tuakaouanga ora ïa ratou.” Inara, kare tetai pae te ka akatu akaouia mai e inangaro i te apii no runga i to Iehova au arataa. No ratou, “ei te tuakaouanga akaapa ïa ratou.”​—E tatau ia Ioane 5:28, 29; Isaia 26:10; 65:20.

Kia tae ki te openga o te tauatini mataiti o te Ra Akavaanga, kua oti i reira ia Iehova i te akaoki akaou i te tangata akarongo ki to ratou turanga apa kore o mua ana. (1 Korinetia 15:24-28) E manakonakoanga umere tikai te reira no te aronga akarongo katoatoa! A te tuatau o te timataanga openga, ka tuku mai te Atua ia Satani te Tiaporo, mei roto i te vaarua takere kore, te ngai i tapekaia ana aia no tetai tauatini mataiti. Ka titau akaou a Satani i te akaariu ke i te tangata mei ia Iehova, inara ko te aronga ka patoi atu ia Satani ka rauka ia ratou te oraanga mutu kore i te enua nei e tuatau ua atu.​—E tatau ia Isaia 25:8; Apokalupo 20:7-9.

E taangaanga katoa ana te Pipiria i te tuatua “rā akavaanga” i te tuatua no runga i tetai tupuanga te ka apai mai i te openga o teia akatereanga. Ka tae poitirere mai teia ra akavaanga mei te Vaipuke rai i to Noa tuatau, tei takore takiri i tetai uki tangata kino katoa. Te mea mataora ra, ka akatuera te akapouanga o te “aronga akono kore i te Atua” e vaitata maira, i te mataara no tetai taiate tangata ou, ei reira oki “te vai tika anga o te tuatua-tika ra.”​—E tatau ia 2 Petero 3:6, 7, 13.