E ririnui atu ainei te mate i te Atua? Kare! Akapeea te mate​—me kore tetai ua atu “enemi”—​i ririnui atu ei i te “Atua Mana katoatoa”? (1 Korinetia 15:26; Exodo 6:3) E mana to te Atua i te takore atu i te mate na roto i te tuakaouanga e kua taputou mai aia i te rave i te reira i roto i tona ao ou. * Eaa i papu ei taua taputou ra? Kua akakite mai te Tamaiti a te Atua ko Iesu kia tatou i te au tuatua te ka oronga mai i te manakonakoanga kia tatou.​—E tatau ia Mataio 22:31, 32.

Kua tuatua a Iesu ki te aronga Sadukea kare e irinaki ana i te tuakaouanga e: “I te tuatua ra i te tuakaouanga o tei mate ra, kare kotou i tatau i ta te Atua i tuatua mai kia kotou ra, ka na ko mai ei ra e, ‘Ko au te Atua no Aberahama, e te Atua no Isaaka, e te Atua no Iakoba?’ Kare oki te Atua i te Atua no tei mate, no tei ora ra.” Te taiku ra a Iesu i konei i te pukapuka anga te Atua kia Mose i ko i te pu ngangaere e ka ra i te ai, mei te mataiti 1514 M.T.N. (Exodo 3:1-6) Mei ta Iesu i akakite mai, te akaari maira ta Iehova au tuatua kia Mose​—“Ko au te Atua no Aberahama, e te Atua no Isaaka, e te Atua no Iakoba”—​e ka tupu te taputou no te tuakaouanga. Akapeea ra?

Akamanako ana na mua i te aerenga tuatua. I te tuatau i tuatua ai a Iehova kia Mose, kua mate ke ana te au pateriareka ko Aberahama no tetai 329 mataiti, ko Isaaka no tetai 224 mataiti, e Iakoba no tetai 197 mataiti. Inara kua karanga a Iehova e, “Ko au” to ratou Atua​—kare e “Kua riro ana au” ei Atua no ratou. Te tuatua ra a Iehova no runga i teia au pateriareka tokotoru tei mate, mei te mea rai e te ora ra rai ratou. No teaa ra?

Kua akamarama mai a Iesu e: “Kare oki te Atua [ko Iehova] i te Atua no tei mate, no tei ora ra.” Akamanako ana no runga i te aiteanga o taua au tuatua ra. Naringa kare e tuakaouanga, kare rava a Aberahama, Isaaka, e Iakoba e akaora akaouia mai mei te mate. Me koia ia, ka riro a Iehova ei Atua no te aronga tei mate. Tera te aiteanga i reira, e ririnui atu te mate ia Iehova​—mei te mea rai e kare ona mana ririnui i te akaora mai i tona au tavini tiratiratu mei te mate.

Eaa i reira ta tatou ka kite mai no runga ia Aberahama, Isaaka, Iakoba e te au tavini tiratiratu o Iehova tei mate? Kua akakite mai a Iesu i teia tuatua puapinga e: ‘Te ora katoatoa ra ratou iaia.’ (Luka 20:38) Papu tikai e ka akatupu a Iehova i tona akakoroanga kia akatuakaou mai i tona au tavini tiratiratu tei mate e mei te mea rai e te manako ra aia e te ora ra rai ratou. (Roma 4:16, 17) Ka akamaara ua rai a Iehova ia ratou e tae ua atu ei ki te tuatau e akaora akaou mai ei aia ia ratou mei te mate.

Te rekareka ra ainei koe no te manakonakoanga e ka taokotaiia koe ki toou aronga akaperepere tei mate? Me koia ia, akamaara i reira e e ririnui atu a Iehova i te mate. Kare e apinga e tapu iaia mei te akatupu anga i tana taputou kia akatuakaou mai i te aronga tei mate. Eaa ka kore ei e apii maata atu no runga i te taputou no te tuakaouanga e no runga i te Atua te ka akatupu i te reira? Me rave koe i te reira, ka akavaitata atu koe kia Iehova, ‘te Atua no tei ora.’