Ko te tu akaaka, kare e akatietie me kore e akaparau. Kare tetai tangata akaaka e manako e e teitei ake aia i tetai ke. Ko tetai ua atu tangata apa e tu akaaka tona, ka akaari aia i te tu tau, koia oki ka kite aia e kare e rauka iaia i te rave i tetai au mea.

Kare a Mose i akaparau ana te orongaia mai anga tetai mana taoonga kiaia. Maataanga o te taime, me orongaia te mana taoonga ki tetai tangata, ka akaari viviki mai aia me e tangata akaaka aia me kore e tangata akaparau aia. Kua tuatua tetai tangata mei te 19 anere mataiti ko Robert G. Ingersoll no runga i te reira e: “Ka rauka i te maataanga o te tangata i te akakoromaki i te au turanga ngata. Inara me ka inangaro koe kia kite i te tu tikai o tetai tangata, e oronga i tetai mana taoonga kiaia.” Na roto i te reira tu, kua akanoo mai a Mose i te akaraanga meitaki no te tu akaaka. Akapeea ra?

Kua rauka ia Mose te mana taoonga teitei no te mea kua akaue a Iehova iaia kia arataki i te ngati Iseraela. Inara, kare te reira mana taoonga i akatupu ana ia Mose kia akaparau. Ei akaraanga, akamanako ana i te tu tau o tana akono anga i tetai uianga ngata no runga i te tikaanga no tetai tuanga kainga. (Numero 27:1-11) E uianga pakari tikai teia, no te mea ka riro te reira ikianga ei akanoo i te ture no te uki ka aere mai.

Akapeea a Mose te ariu atu anga? Ka manako ainei aia e no te mea e arataki aia no te ngati Iseraela, kua tau aia kia rave i tetai ikianga no runga i te reira? Ka irinaki ainei aia ki runga i tona tu kite karape, tona au mataiti i akaaere ana, me kore i tona kite oonu no runga i te manako o Iehova?

Penei ka rave tetai tangata akaparau i te reira. Kare ra a Mose i rave ana i te reira. Kua akakite mai te papaanga Pipiria e: “Kua apai akerā Mose i taua tuatua na ratou ra ki mua i te aroaro o Iehova.” (Numero 27:5) Akamanako ana! Noatu i muri ake i te 40 mataiti te arataki anga i te iti tangata o Iseraela, kare a Mose i irinaki ana ki runga iaia uaorai, mari ra kia Iehova. Te kite meitaki nei tatou i te tu akaaka tikai o Mose i konei.

Kare a Mose i manako ana e koia anake ua tei tau kia akaaere. Kua mataora aia te akatika anga a Iehova i tetai au tangata Iseraela kia riro mai ei au peroveta. (Numero 11:24-29) Te akakite anga tona metua tane ongai kia tua tua aia i tana angaanga ki tetai ke, kua aru a Mose i te reira ma te tu akaaka. (Exodo 18:13-24) I mua ake ka mate ei aia, noatu te maroiroi ra rai tona kopapa, kua pati a Mose kia Iehova kia iki i tetai tangata ei mono iaia. Te iki anga a Iehova ia Iosua, kua turuturu ngakau tae a Mose i taua tangata mapu ra, te raurau anga i te iti tangata kia aru i ta Iosua aratakianga ki roto i te Enua Taputouia. (Numero 27:15-18; Deuteronomi 31:3-6; 34:7) Papu e kua manako a Mose e e tikaanga ngateitei i te arataki i te ngati Iseraela i roto i te akamorianga mou. Inara, kare a Mose i manako ana e e puapinga atu tona mana taoonga i te oraanga o tetai ke.

Kare rava tatou e tuku i tetai mana taoonga me kore te tu kite karape ei akaparau anga no tatou. Akamaara: E rauka ai ia Iehova i te taangaanga ia tatou, kia maata atu to tatou tu akaaka i to tatou tu kite karape. (1 Samuela 15:17) Me e tu akaaka tikai to tatou, ka tauta tatou i te taangaanga i te akoanga pakari a te Pipiria e: “E irinaki kia Iehova ma to ngakau katoa ra; auraka ra e irinaki ki toou uaorai kite.”—Maseli 3:5, 6.

Te apii katoa maira te akaraanga o Mose e auraka tatou e manako maata i to tatou turanga teitei me kore mana taoonga.

Ka puapingaia ainei tatou me aru tatou i to Mose akaraanga no te tu akaaka? Ae! Me akatupu tatou i te tu akaaka tika tikai, ka oaoa mai te au tangata kia tatou e ka inangaro mai ratou ia tatou. Mea puapinga atu, ka inangaro mai te Atua ko Iehova ia tatou, tei akaari mai i teia tu manea tikai. (Salamo 18:35) “E patoi te Atua i tei nengonengo, e oronga mai i te meitaki no tei akaaka.” (1 Petero 5:5) E tumu meitaki tikai teia kia aru i te tu akaaka o Mose!