Mei tei taangaangaia i roto i te Pipiria, ko te “akarongo” te irinaki pakari no runga i te au akapapuanga tinamou. Ko tetai tangata tei tuku i te akarongo ki roto i te Atua, te irinaki ra aia e ka akatupu te Atua i Tana au taputou ravarai.

Kua rave a Mose i te au ikianga tei akaari mai e kua irinaki aia i ta te Atua au taputou. (Genese 22:15-18) Kua rauka iaia tetai atianga kia akono i tetai oraanga meitaki tikai i rotopu i te au mea mekameka o Aiphiti, inara kua kopae aia i te reira na te iki anga kia tamamaeia ‘no te kapiti anga ki te au tangata o te Atua, i to te rave anga i te navenave poto ua o te kino.’ (Ebera 11:25) E ikianga rapurapu ainei te reira, te ka tataraapa aia i muri mai? Kare, no te mea te akakite ra te Pipiria e “i maroiroi rava atura [a Mose] i te akara anga atu iaia, i tei kore e kitea kia akara ra.” (Ebera 11:27) Kare rava a Mose i tataraapa ana i tana au ikianga i rave no tona akarongo.

Kua tauta a Mose i te akaketaketa i te akarongo o tetai ke. Ei akaraanga, akamanako ana i tei tupu ki te ngati Iseraela te manako anga ratou e kua piritia ratou i rotopu i te nuku vaeau o Pharao e te Tai Muramura. Kua aue maata te ngati Iseraela kia Iehova e kia Mose no te mataku e ka tupu te kino kia ratou. Akapeea a Mose te ariu atu anga?

Penei kare a Mose i manako ana e ka akatakake te Atua i te Tai Muramura kia akaora mai i te ngati Iuda. Inara, kua irinaki rai a Mose e ka rave te Atua i tetai ravenga kia paruru i Tona iti tangata. E te inangaro ra a Mose i tona au taeake Iseraela kia irinaki katoa i te reira. Ka tatau tatou e: “Karanga aturā Mose ki taua aronga tangata ra, Auraka kotou e mataku; e noo ua, e akara i te ora a Iehova, i tana e rave no kotou i teianei rā.” (Exodo 14:13) Kua akaketaketa ainei a Mose i te akarongo o tona au taeake Iseraela? Ae, no te mea te karanga ra te Pipiria no runga ia Mose e te ngati Iseraela e: “No te akarongo i tae ei ratou na raro i te Tai Kutekute mei te mea e e enua marō.” (Ebera 11:29) Kua puapingaia a Mose e te katoatoa tei apiiia mai mei tona akarongo.

Ka rauka ia tatou i te aru ia Mose na te rave anga i te au ikianga te akaari ra e te irinaki ra tatou i ta te Atua au taputou. Ei akaraanga, kua taputou mai te Atua e ka akono aia i to tatou au anoano pae materia me tuku tatou i tana akamorianga ei mea mua i roto i to tatou oraanga. (Mataio 6:33) E tika, e ngata tikai i te kopae i te au apinga materia no te mea e maata te au tangata e tuku ra i te reira ei mea mua i roto i to ratou oraanga. Inara papu ia tatou e me tauta tatou i te akamama mai i to tatou oraanga e te akamanako meitaki anga i ta tatou akamorianga, ka akono mai a Iehova i to tatou au anoano. Kua akapapu mai aia e: “Kare rava au e akaruke atu ia koe, kare oki au e taka ke ia koe, kare, kare rava atu.”​—Ebera 13:5.

Ka tauta katoa tatou i te tauturu i tetai ke kia maata atu to ratou akarongo. Ei akatauanga, ka kite mai te au metua meitaki i te au atianga puapinga kia tauturu i ta ratou tamariki kia irinaki i te Atua. Ia ratou e mamaata maira, ka anoanoia te au tamariki kia kite e e Atua tetai e te apii maira aia ia tatou kia kite i te mea tika e te mea tarevake. Kapiti mai, ka anoanoia ratou kia marama e kia irinaki e ko te aru anga i tona au turanga, ko te mea meitaki rava atuia no te oraanga. (Isaia 48:17, 18) Te oronga ra te au metua i tetai apinga akaperepereia ki ta ratou tamariki me tauturu ratou i te tamariki kia irinaki e e “tika tikai [te Atua] e e tutaki ana aia i te aronga te tauta ngakau tae ra i te kimi iaia.”​—Ebera 11:6, Holy Bible​—Easy-to-Read Version.