Kua anauia au i Santo Domingo, i Dominican Republic, ko au te openga o te toko a tamariki. E nga tangata apii meitakiia toku nga metua e te inangaro ra raua i te utuutu i ta raua tamariki i roto i tetai turanga meitaki. E a mataiti i mua ake ka anauia mai ei au, kua aravei toku nga metua i tetai nga mitinari Momani. Kua mareka raua i te tu akamaneaanga e te tu meitaki o teia nga mapu tane, e kua iki toku nga metua e ko matou te pamiri mua i runga i taua airani ra te ka riro mai ei au mema no te Church of Jesus Christ of Latter-day Saints, me kore no te Akonoanga Momani.

Iaku e mamaata maira, kua mataora au i te piri atu ki te au angaanga a te akonoanga e kua akamanako maata au i te puapinga o te oraanga pamiri e te tu akono tau a te Momani. Kua ngakau parau tikai au e e Momani au e kua akanoo au i tetai akakoroanga kia riro mai ei mitinari.

Te tae anga toku mataiti ki te 18, kua neke atu toku pamiri ki Marike kia rauka iaku i te aere ki tetai apii teitei. E tai mataiti i muri mai, kua atoro mai te teina o toku mama e tana tane, e nga Kite no Iehova, ia matou i Florida. Kua pati mai raua ia matou kia aere ki tetai uruoaanga apii Pipiria. Umere tikai au e te akara ra te au tangata katoatoa i te au irava e te tata ra ratou i te au manako ki raro. No reira kua pati au i tetai peni e tetai pepa, e kua rave katoa au i te reira.

I muri ake i te uruoaanga kua akakite mai te teina o toku mama e tana tane e ka tauturu mai raua iaku kia apii no runga i te Pipiria no te mea te inangaro ra au kia riro mai ei mitinari. Kua manako mai au e e manako meitaki te reira no te mea i taua taime ra e maata atu taku i kite no runga i te Puka Momani i to te Pipiria.

I te tuatau o ta matou uriurianga Pipiria i runga i te terepaoni, kua akamaroiroi ua mai te teina o toku mama e tana tane iaku kia akaaite i taku e irinaki ra ki te au apiianga a te Pipiria. Te  inangaro ra raua kia kimi au e eaa tikai ta te Pipiria e apii ra.

E maata te au apiianga a te Momani taku i ariki, inara kare i papu iaku e akapeea taua au manako ra te rotai anga ki ta te Pipiria e apii ra. Kua tuku mai te teina o toku mama i te makatini Awake! o Noema 8, 1995, tei neneiia e te Au Kite o Iehova, kapiti mai tetai au atikara no runga i te irinakianga a te Momani. Kua poitirere tikai au e kare au i kite i te au apiianga a te Momani. Kua akakeu te reira iaku kia akara i te Web site akamanaia a te Momani kia akapapu e te tika ra ta te makatini Awake! e akakite ra. E tika rai te reira, e kua akapapuia mai taua au mea ra te atoro anga au i te runanga apinga taito o te Momani i Utah.

Kua irinaki ua ana au e te rotai ra te Puka Momani ki te Pipiria. Inara te tatau meitaki anga au i te Pipiria, kua kite mai au e kare e rotai ana te au apiianga a te Momani ki te au tuatua i roto i te Pipiria.

Kapiti mai ki te au apiianga tarevake, kua manamanata au no te au manako akaepaepa anga enua te apiiia ra e te Momani. Ei akaraanga, te apii ra te au Momani e tei roto te kainga i Edene ia Jackson County, Missouri, i U.S.A. E kua karanga te au arataki o te akonoanga e ka tutara mai te Patireia o te Atua i te pa enua katoa na roto i te kavamani o Marike.

Kua manako mai au e eaa te ka tupu ki toku enua anau e tetai atu au enua no runga i teia nga manako. Kua uriuri manako atu au no runga i te reira i tetai aiai te ringi mai anga tetai tangata mapu Momani te tereniia ra aia kia riro mai ei mitinari. Kua ui atu au kiaia me ka tamaki atu rai aia i tona au taeake Momani me tamaki atu tona enua i to ratou. Kua poitirere au te karanga mai anga aia e ae! Kua kimikimi maata atu au i te au apiianga a taku akonoanga e kua tuatua atu au ki te au arataki o te Akonoanga Momani. Kua akakite mai ratou e e au mea muna te au pauanga ki taku au uianga, e a tetai ra ka akamaramaia mai te reira.

Kare au e mareka ana i ta ratou akamaramaanga e kua akara meitaki au i toku tu e te tumu i inangaro ei au kia riro mai ei mitinari no te Momani. Kua kite mai au e ko tetai tumu i inangaro ei au kia riro mai ei mitinari, no te mea te inangaro ra au i te tauturu i tetai ke. Tetai akaou mai tumu, kia akangateitei mai te au tangata iaku. Inara kare au i kite meitaki tikai i te Atua. Noatu e akara putuputu ana au i te Pipiria i mua ana, kare rava au i manako maata ana i te reira. Kare rava au i kite ana eaa to te Atua akakoroanga no te enua me kore no te tangata.

Na roto i taku apii anga i te Pipiria ma te Au Kite o Iehova, kua kite mai au i te ingoa o te Atua, eaa te ka tupu me mate tatou, e ta Iesu tuanga no te akatupu anga i to te Atua akakoroanga, e tetai atu au apiianga. E kua marama tikai au i teia puka meitaki, e e rekareka ana au i te akakitekite i te tuatua mou taku i apii mai ki tetai ke. Kua kite au e e Atua tetai, inara i teianei ka rauka iaku i te tuatua kiaia ei Oa vaitata na roto i te pure. Kua papetitoia au ei Kite no Iehova i roto ia Tiurai 12, mataiti 2004, e e ono marama i muri mai kua piri atu au ki roto i te angaanga orometua Kerititiano tamou.

No tetai rima mataiti, kua angaanga au i ko i te opati maata o te Au Kite o Iehova i Brooklyn, New York. Kua mataora tikai au i te tauturu anga i te maani anga i te au Pipiria e te au puka tei akatumuia ki runga i te Pipiria te ka tauturu i te au mirioni tangata takapini i teianei ao, e te mataora katoa nei au i te tauturu i tetai ke kia apii no runga i te Atua.