Kua tupu mai teia uianga no te mea kua taputou a Iesu ki te tangata kino tei akautungaia i te pae iaia i tetai oraanga i roto i te Parataito a te tuatau ki mua. I roto i te Bibilia Tapu, kua taputou a Iesu ki te tangata kino tei akautungaia i te pae iaia e: “Koia mou taku e karanga atu kia koe nei, ei Paradaiso taua katoa i teianei rai rā.” (Luka 23:43) Inara, te uri ra tetai au urianga Pipiria ke i te au tuatua a Iesu e, “Te akakite tika atu nei au kia koe i teianei ra, ei Parataito taua e aravei ei.” Akapeea tatou i kite ei e kare a Iesu e akakite ra ki te tangata kino e ka aravei raua i runga i te rangi i taua ra rai? Akara ana e kare a Iesu e tuatua ra e teiea te Parataito. Te aiteanga ainei i reira e te karanga ra a Iesu ki te tangata kino e ka aravei raua i runga i te rangi?

Mea mua, ka akamanako ana tatou me kua tau rai te tangata kino no te oraanga i runga i te rangi. Kua papetitoia te au tangata e manakonakoanga to ratou no te rangi ki te vai e te vaerua tapu, e e au pipi ratou na Iesu tei akatainuia ki te vaerua tapu. (Ioane 3:3, 5) Tetai umuumuanga ke, koia oki kia aru ratou i to te Atua au turanga tau e kia akaari i te au tu mei te tu tika, te tiratiratu, e te tangi aroa. (1 Korinetia 6:9-11) Kia vai tiratiratu katoa ratou ki te Atua e Karaiti e tae ua atu ki te openga o to ratou oraanga i te enua nei. (Luka 22:28-30; 2 Timoteo 2:12) Na te aru anga i taua au umuumuanga ra, ka akaari ratou e kua tau ratou no te tuakaouanga e no te rave anga i te au apainga puapinga i runga i te rangi, koia oki, te tavini kapiti anga kia Karaiti ei kau taunga e ei ui ariki i rungao i te au tangata no tetai tauatini mataiti.​—Apokalupo 20:6.

Inara, kua rave ua ana te tangata kino i te pae ia Iesu i te au mea kino e kua mate aia ei tangata kino. (Luke 23:32, 39-41) E tika, kua akaari aia i te tu akangateitei i tona tuatua anga kia Iesu e: “E akamaara mai koe iaku, kia tae koe ki toou basileia.” (Luka 23:42) E kare katoa aia i te pipi na Iesu tei papetitoia e tei akatainuia ki te vaerua tapu, e kare aia i akaari ana i te tu tika e te tu tiratiratu i roto i tona oraanga. E tau ainei i reira e ka taputou a Iesu e ka tutara kapiti aia e tona au pipi akarongo mou i runga i te rangi, tei vai tiratiratu ua ana e tae ua atu ki te openga?​—Roma 2:6, 7.

Ei akatutuanga: Me pati mai tetai tangata kia akakore koe i tana ara no te keia anga i taau moni, penei kare koe e apai iaia ki te akavaanga. Inara ka irinaki ainei koe iaia kia rave i taau angaanga pitiniti me kore kia akono i toou pamiri? Kare, ka oronga koe i taua apainga ra ki te aronga ua e irinaki ana koe. E ka akapapu katoa mai te aronga tei orongaia te manakonakoanga i runga i te rangi e ka turuturu ratou i te turanga tuatua tika o te Atua me tutara ratou ki rungao i te au tangata. (Apokalupo 2:10) Kare ra te tangata kino i akaari mai ana i te reira tu, noatu e patianga ngakau tae tana i te openga.

Kare ainei e kua akakite a Iesu ki te tangata kino e ka aravei raua ki runga i te rangi i taua ra rai? Kare e tano te reira, no te mea kare a Iesu i aere ana ki runga i te rangi i taua ra rai. Mari ra kua tukuia aia “ki raro i te enua”​—te vaarua mate—​e toru ra. (Mataio 12:40; Mareko 10:34) E i muri ake i tona akatuakaouanga, kua noo ua rai aia ki runga i te enua e 40 ra i mua ake ka aere ei aia ki runga i te rangi. (Angaanga 1:3, 9) No reira, kare te tangata kino i aru ana ia Iesu ki runga i te rangi i taua ra rai.

Eaa i reira te Parataito ta te tangata kino ka tomo atu ki roto? I muri ake i te tuakaouanga, ka noo aia i runga i te enua Parataito, ta Iesu ka tutara mai i rungao. (Angaanga 24:15; Apokalupo 21:3, 4) Kia kite maata atu no runga i taua Parataito ra e ta te Atua au umuumuanga, e tuatua atu ki tetai o te Au Kite o Iehova.