Te manako maira tikai ainei te Atua ia tatou, me, kare ainei aia e kea mai ana i te turanga o te tangata i runga nei i te enua? Pumaana tikai to tatou ngakau i te pauanga a te Pipiria no tera uianga. Te manako ua maira a Iehova i te tangata nei, e te inangaro maira aia kia mataora to tatou oraanga. Te au ra ravarai te rauka nei i te tangata​—pera katoa te aronga manako kore—​te puapinga no to Iehova takinga meitaki maata. Akamanako ana i te tuatua a te apotetoro ko Paulo.​—E tatau ia Angaanga 14:16, 17

I te tuatua anga ki te au tangata kare i te aronga akamori i te Atua i roto i te oire ko Lusetera, kua akakite a Paulo e: “Ko tei vaoo ua i te pa enua ravarai i muatangana, kia akono ua ana ratou i ta ratou uaorai tuatua. Kare ra aia i ngere i te akakite iaia uaorai, koia i takinga-meitaki mai, i te oronga anga mai i te ua no runga i te rangi, e te tuatau mou, e te akaki anga mai i to tatou ngakau ki te kai ma te rekareka.” Eaa ra te aiteanga o taua au tuatua ki te aronga e akarongo maira kia Paulo?

Mama ua i te iti tangata o Lusetera kia marama i te au tuatua a Paulo. E iti tangata tanutanu ratou i roto i tetai tuanga enua tupu ruperupe te kai e te maata i te vai. Inara mei ta Paulo i akamaara atu ia ratou e na te Atua i oronga mai i te ua, e te au tuatau mou. No reira i te au tuatau ravarai ka kokoti ratou i te maata o te mou e ka kaikai meitaki, te puapingaia ra ratou no to Iehova takinga meitaki.

E maata te au apiianga puapinga ka rauka ia tatou, mei te au tuatua a Paulo ki te iti tangata o Lusetera no runga i te Atua ko Iehova.

Kua oronga mai a Iehova i te tikaanga no tatou kia iki. Akara ana ra e kua akatika a Iehova i te pa enua Etene “kia akono ua ana ratou i ta ratou uaorai tuatua.” Te karanga ra tetai puka apii na te aronga uri reo o te Pipiria e ko tetai aiteanga o teia tuatua, koia oki “kia aere i te arataa e inangaro ra ratou” me kore “kia rave i ta ratou e manako ra e ko te mea meitaki.” Kare a Iehova e maro ana i te tangata kia akamori iaia. Kua oronga mai aia i te tikaanga no tatou kia iki​—te tareni kia iki i te arataa o to tatou uaorai oraanga.​—Deuteronomi 30:19.

Inangaro a Iehova ia tatou kia kite no runga iaia. Kare aia “i ngere i te akakite iaia uaorai,” i akamarama ai a Paulo. Te karanga ra te puka apii tei taikuia i mua ake e ka tau katoa teia tuatua kia uriia e “kua akakite atea ua mai aia ki te tangata e mei teaa tona tu.” Te akakite pu ua maira te Atua i “te au mea oki nona [koia oki tona au tu] tei kore e tau kia akara,” kapiti mai i tona tu takinga meitaki, pakari, mana, e te aroa. (Roma 1:20) E maata ua atu ta Iehova i akakite mai no runga iaia i roto i te Pipiria. (2 Timoteo 3:16, 17) Kare ainei e taka ua ra e te inangaro maira aia ia tatou kia kite no runga iaia?

Inangaro a Iehova kia mataora tatou. Te akaki maira aia i to tatou “ngakau ki te kai ma te rekareka,” i akakite ei a Paulo. E te tangata ara kare e irinaki ana ia Iehova, ka akaki katoaia ki te kai e ka kite katoa aia i te mataora. Inara, ko te mataora mou tikai ta Iehova e inangaro maira kia rauka ia tatou. Te ravenga ua e rauka ai te reira, koia oki kia apii tatou i te tuatua mou no runga iaia, e kia taangaanga i te reira i roto i to tatou oraanga.​—Salamo 144:15; Mataio 5:3.

Te puapingaia nei tatou mei to Iehova tu takinga meitaki i te au ra ravarai. Kore ei koe e apii kia kite e ka akapeea koe me akaari ki te Atua i toou ngakau rekareka, koia i ‘akaki mai i toou ngakau ki te kai ma te rekareka?’