E aere putuputu ana a Estelle * e tana tamariki ki te pure. “Kua akakite au ki toku orometua e ka inangaro au i te apii no runga i te Pipiria,” i karanga ai a Estelle. Inara kare rava te orometua i apii ana iaia. Muri mai, kare a Estelle i oki akaou ana ki te pure. Karanga katoa aia e: “Kua tata mai te au akaaere akonoanga i te akakite mai e, me kare au e tae atu ki te pure, e tuku ua atu i tetai moni. Kia akamanako au, ‘Kare tikai ratou e kea mai ana e me ka aere atu au e me kare; ko taku moni ua ta ratou e inangaro maira.’”

Ko Angelina, e aere ua ana aia ki te pure, e kua karanga aia e: “I ko i taku pure, e apai aere mai ana ratou i te kete e toru taime i mua ake ka akamutu ei te pure, e te inangaroia maira matou kia oronga i te au taime pouroa. E pati ua mai ana ratou i te moni. Oki au i te akamanako, ‘Kare te vaerua o te Atua i rotopu i teia aronga.’”

I te ngai e noo ra koe, te akapera ra ainei te au akonoanga i te manono mai i te tangata kia oronga mai i te moni? Te rotai ra ainei te reira ki te Pipiria?

Kua akakite tei akatumu mai i te Akonoanga Kerititiano, koia oki a Iesu e: “E mea o mai ua to kotou, e oronga ua atu oki kotou.” (Mataio 10:8) Kare te karere o te Pipiria e peke kia okoia ki te moni, e mea tau ra kia orongaia ki te katoatoa tei inangaro.

E akapeea ana te au Kerititiano mua i te akono anga i te au anoano o te putuputuanga i te pae o te moni?

Kua oronga ratou tataki tai “i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7) Kua akakite te apotetoro ko Paulo e: “Kare oki i ngaro ia kotou, e te au taeake, i ta matou angaanga e te roiroi: i te rave anga i te angaanga i te po e te ao, kia kore oki kotou kia teimaa ia matou, i te tuatua anga atu ia kotou i te evangelia a te Atua.” (1 Tesalonia 2:9) E maani puakapa ana a Paulo ei tauturu iaia i te rave anga i tana angaanga orometua.—Angaanga 18:2, 3.

E akaputuputu ana te Au Kite o Iehova i roto i te au are tei kapikiia e ko te Are Uipaanga Patireia. E akapeea ana ratou te akono anga i ta ratou akapouanga moni? Kare ratou e apai aere mai ana i te mereki koi moni, e kare katoa ratou e tuku tikiro mai ana i te patipati moni. Mari ra, ka rauka i tetai ua atu tei inangaro, i te tuku i tetai moni oronga ua ki roto i te pia i ko i te Are Uipaanga Patireia.

Kua kite ua tatou e ka anoanoia te moni ei nenei, e ei tuku i teia makatini ki te au enua. E oti akera, kare rava koe e kite i tetai ua atu tuatua akakite me kore i tetai patianga no te moni. Ko te mea maata koia oki kia akakitekite aereia te tuatua mou o te Pipiria.

Eaa ra toou manako: Te rotai ra ainei teia mataara no te akapouanga moni ki ta Iesu tuatua, e te akaraanga a te au Kerititiano i mua ana?