PUKAPUKAANGA KI TETAI PU NGUTUARE
Te Manako Maira Ainei te Atua i to Tatou Turanga Taitaia?
Te pukapukaanga ka aru mai, penei aite rai te reira mei ta tetai Kite o Iehova e rave ana e tetai pu ngutuare. Ka tamanako ua tatou e kua aere tetai Kite ko Michelle tona ingoa, ki ko i te kainga o tetai vaine ko Sophia tona ingoa.
EAA RA AIA I AKATIKA AI KIA TUPU TEIA?
Michelle: Teia te tu te tua aere nei au teia aenga pepa ki te tangata i teia ngai. Te tumu manako, Ka Inangaro Ainei Koe i te Kite i te Tuatua Mou? Naau teia kopi.
Sophia: No runga teia i te akonoanga?
Michelle: Ae. Akara koe e ono e ra au uianga i te kapi mua. Ko teea i teia au uianga taau ka—
Sophia: Kite koe eaa, e akamutu ua koe i kona ine. Ka kaimoumou ua koe i toou taime i te tuatua mai kiaku.
Michelle: No teea koe i tuatua akapera ai?
Sophia: Ka akakite atu au i te tika, kare ua rai au i papu e me e Atua tetai.
Michelle: Meitaki ko koe i akakite mai i te tika. Ka inangaro au i te ui atu e me e manako akapera ua ana rai koe?
Sophia: Kare, e aere ua ana au ki te pure e maatamaata ua mai au. Kare ra oki au e aere akaou ana kua roa i teianei.
Michelle: Toku manako te marama atu nei au. I, ko Michelle toku ingoa.
Sophia: Ko Sophia toku.
Michelle: Mataora nei au i te aravei ia koe e Sophia.
Sophia: Mataora rai au i te aravei ia koe e Michelle.
Michelle: Kite koe e Sophia, kare au i aere mai i te maro ia koe kia ariki i toku irinakianga. Ka inangaro ra oki au kia kite e me e apinga ainei tetai i tupu i ekoko ei koe e me e Atua rai tetai?
Sophia: Ae. E 17 mataiti i topa akenei, kua u te motoka e na roto ra toku mama.
Michelle: Aue te tangi nei. I kino ana ra aia?
Sophia: Ae, kua akamate ua tona kopapa mei tera taime mai.
Michelle: Aue taue te akaaroa. Kare aiteia toou mamae ngakau.
Sophia: Ae. No reira au i manako ei e, Me e Atua tetai, eaa ra aia i akatika ai kia tupu teia? No teaa ra te Atua ka akatika ai kia taitaia tatou mei teia te tu?
E TAREVAKE AINEI KIA UI E NO TEAA RA?
Michelle: Kare e tarevake i toou manako e taau au uianga. Me rokoia tatou e te tumatetenga, e mea natura ua kia ui e, no teaa ra. E maata te au tane e te au vaine akarongo mou i te au tuatau Pipiria tei manako akapera ana no runga i te reira!
Sophia: Ine?
Michelle: Ae. Ka akatika koe kia akaari atu au i tetai akaraanga i roto i te Pipiria?
Sophia: O ae, ka inangaro au.
Michelle: Akara ra koe e eaa ta te peroveta akarongo mou ko Habakuka i ui ki te Atua, mei tei tataia i roto i te puka o Habakuka pene 1, irava 2 e te 3: “Mei te aa te roa, e Iehova, o toku kapiki anga, e kare koe akarongo mai! o toku kapiki nui anga atu ia koe i te takinga-kino, e kare koe i akaora? Eaa ra oki koe i akakite mai ei iaku nei i te kino, akara uaʼi koe i te mate nei?” Te aite ra ainei teia au uianga ki te au uianga taau e ui ua ana?
Sophia: Ae, mei tena tikai.
Michelle: Kare roa te Atua i karo ana ia Habakuka no tei ui atu i tera au uianga, e kare katoa aia i karanga ana kia Habakuka e ka anoanoia kia maata atu tona akarongo.
Sophia: E mea umere tikai.
E ENEMI NO IEHOVA TE TURANGA TAITAIA
Michelle: Te apii maira te Pipiria e te kite maira te Atua i to tatou turanga taitaia, e te manako maira aia i te reira.
Sophia: Mei teaa ra te tu?
Michelle: I na ka akaari atu au kia koe tetai akaraanga i konei i roto ia Exodo 3:7. Ka tika ia koe kia tatau mai i tera irava?
Sophia: Ka tika ua. Te karanga ra e: “Kua tuatua mairā Iehova, Kua akara tikai au i te mate o toku iti-tangata i Aiphiti; e kua akarongo au i to ratou aue i to
ratou au akaaiteite angaanga; kua kite oki au i to ratou mamae.”Michelle: Meitaki maata. Kia tau ki teia irava, te kite maira ainei te Atua i te mamae o tona iti tangata?
Sophia: Ae, akara anga te kite maira aia.
Michelle: Kare ko tetai papaki ua o te au mea e tupu ra tana e kite maira. Akara akaou koe i te tuanga openga o tera irava. Akakite te Atua e “Kua kite oki au i to ratou mamae.” Te akaari maira ainei te tangi anga o tera au irava i te tuatua a tetai Atua tangi kore kare e kea mai ana?
Sophia: Kare.
Michelle: Te taka ua ra e, e apinga ke rai kia akara mai i tetai turanga, inara e apinga ke takiri kia akakeuia toou ngakau e taua turanga ra.
Sophia: E tika rava te reira.
Michelle: Ia taua e akamanako ra i te reira, ka tatau taua i tetai akaraanga ke no runga i te iti tangata o te Atua i te rokoia anga ratou e te turanga ngata. Kua rekotiia te reira i roto ia Isaia 63:9. Te na ko ra te tuanga mua o tera irava e: “I to ratou katoa ra au mate kare aia i te enemi” koia oki kua akaora aia ia ratou no tona inangaro e tona tangi ia ratou. Ka karanga ainei koe i reira e kua mamae rai te ngakau o te Atua no te turanga taitaia o tona iti tangata?
Sophia: Ae, te akapera rai te tuatuaanga.
Michelle: Kite koe e Sophia, te inangaro maira te Atua ia tatou, e kare aia e mareka ana me taitaia tatou. Me mamae tatou, mamae rai aia.
EAA RA OKI AIA I TIAKI EI?
Michelle: Mua ake ka aere ei au, e tai manako toe ka inangaro au i te akakite atu kia koe.
Sophia: Te meitaki ua ra.
Michelle: Akamanako ana i ta te Pipiria e apii maira ia tatou no runga i to te Atua mana. Te irava taku e manako nei, tei roto ia Ieremia 10:12. Ka tika ia koe kia tatau mai?
Sophia: Ae. Te karanga nei e: “Nana i anga te enua i tona mana, e nana i akamou te ao katoa nei i tona ra pakari, e i tona kite i totoaʼi aia i te au rangi ra.”
Michelle: Meitaki maata. Ka akamanako ana taua no runga i teia irava. Ka anoanoia ainei kia maata to te Atua mana i te anga mai i te ao katoa e te au mea tini ravarai?
Sophia: Papu iaku e ae.
Michelle: I na me e mana to te Atua i te anga mai i te au mea tini ravarai e pini ua ake, kare ainei tatou e irinaki e e mana katoa tona i te akatere i tana au mea i anga?
Sophia: Ae.
Michelle: Akamanako akaou koe i reira i te mama oou. No teaa koe e taitaia ei me akara koe i tona turanga?
Sophia: No toku inangaro oki iaia. E no te mea e mama aia noku.
Michelle: Naringa e mana toou i te rapakau iaia, ka rave ainei koe i te reira?
Sophia: Eaa oki.
Michelle: Akamanako ana ra e eaa te aiteanga o tera. Te apii maira te Pipiria e te kite ua maira te Atua i to tatou turanga taitaia, te tangi ua maira aia ia tatou, e e mana maata tona. I toou manako e, mei teaa te maata o to te Atua akakoromaki i te tapu iaia uaorai kia kore e takore vave atu i to tatou turanga taitaia?
Sophia: Kare rava au i manako ana e mei te reira roa te tu.
Michelle: Ka tau ainei kia karanga e e tumu tau tetai i kore ei aia i takore vave atu i to tatou au manamanata? *
Sophia: Toku manako e tumu tau rai tetai i kore ei aia.
Michelle: Te tangi maira te tereponi aau, ka oki mai au a tetai taime kia uriuri akaou atu taua i teia tumu manako.
Sophia: Meitaki maata. Ae, ka inangaro au kia oki mai koe. *
E tumu manako ainei tetai e inangaro ana koe kia kite? Ka inangaro ainei koe kia kite no runga i tetai ua atu irinakianga me kore, au angaanga a te Au Kite o Iehova? Me koia ia, auraka e emiemi i te pati ki tetai o te Au Kite o Iehova. Ka rekareka roa aia i te uriuri kapiti i taua au mea ra kia koe.
^ para. 61 No tetai akakiteanga maata atu, akara i te pene 11 o te puka Eaa Tikai ta te Pipiria e Apii Maira? tei neneiia e te Au Kite o Iehova.
^ para. 64 E atikara ke tetai ka aru mai i teia au atikara no runga i te tumu i akatika ua ai te Atua kia tupu te turanga taitaia.