E 930 mataiti o Adamu i te noo anga i te enua nei. I te openga, kua ruaine aia e kua mate. Mei reira mai, e maata ua atu te au mataara ta te tangata i tamata ana kia kore ratou e ruaine. Inara, kare rava e tangata i rauka ana iaia i te kopae i te mate. No teaa ra? Te tumu i ruaine ei a Adamu e i mate ei, no te mea kua ara aia no te akarongo kore i te Atua. No reira tatou i ruaine ei no te mea kua iri mai te ara a Adamu ki runga ia tatou, e ko te utunga o te ara, e mate.​—E tatau ia Genese 5:5; Roma 5:12.

E rauka ai ia tatou te oraanga mutu kore, ka anoano tatou i tetai tangata kia oko mai ia tatou mei roto i tera turanga. (Iobu 33:24, 25) Ko te oko te tutaki tei orongaia ei akaora mai i tetai tangata, e i roto i to tatou turanga, ka anoanoia kia akaoraia mai tatou mei te utunga o te mate. (Exodo 21:29, 30) Kua tutaki a Iesu i te oko i tona mate anga no tatou.​—E tatau ia Ioane 3:16.

Kare te au tangata ravarai e akaoraia mei te turanga o te maki e te ruaine. Ko te au tangata akarongo kore i te Atua mei ia Adamu rai, ka ngere ratou i te tikaanga no te ora. Ko te aronga ua tei akakoreia ta ratou ara, te ka rauka te oraanga mutu kore.​—E tatau ia Isaia 33:24; 35:3-6.

E akakoreia ai te ara, ka anoanoia tatou kia akaari e ka inangaro tatou kia ora. Ka anoanoia tatou kia kite no runga i te Atua na roto i te apii anga i tana Tuatua, i te Pipiria. Te apii maira te reira e ka akapeea e rauka ai ia tatou tetai oraanga meitaki atu, e ka akapeea katoa e rauka ai ta te Atua akaperepereanga, e te oraanga mutu kore.​—E tatau ia Ioane 17:3; Angaanga 3:19.