Te karanga ra te Pipiria e: “Kia tutara ra te tangata kino ra, kua aue anake te tangata.”​—Maseli 29:2.

Akakite te tuatua enua e, e manganui ua atu te au tutara kino tei akatupu i te taitaia maata ki to ratou uaorai au tangata. Inara kare mei te reira au tutara pouroa. Tetai pae penei te meitaki ua ra to ratou akakoroanga no to ratou au tangata. Me akamata ra ratou i te tutara, e kite ei ratou i te puapinga kore o ta ratou tautaanga, no te maata o te orureau e te akarere kia rauka te mana tutara. E penei ka akariro ratou i to ratou taoanga ei akapuapinga ia ratou uaorai, e ko te tangata i reira te ka kino. “Te akakite maira te tuatua enua i te au tautaanga tei puapinga kore, e te au manakonakoanga kare i akatupuia,” i akakite ei a Henry Kessinger te Tekeretere o Marike i mua ana.

Te akakite katoa maira te Pipiria e: “Kare tei te tangata e aere nei, i te akono i tona uaorai takainga tapuae.” (Ieremia 10:23) Kua ngere te tangata apa ua nei i te pakari e te kite, tei anoanoia kia akaaere ia ratou uaorai. Me kare e rauka i te tangata i te akaaere i to ratou uaorai takainga vaevae, ka akapeea i reira e rauka ai ia ratou i te akaaere i tetai patireia katoa? Te kite ra ainei koe i te tumu i kore ei e rauka i te au tutara tangata i te takore i te turanga taitaia? Te maataanga i te taime, ko te akatereanga a te kavamani kino me kore ko te tutaraanga kino a te tangata, te tumu i tupu ei te taitaia!

Kua akakite a Iesu e: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:35.

Te apii nei te au arataki o te au akaaereanga akonoanga i te tu aroa e te tu rotai. Ko te tikaanga ra, kare i rauka ia ratou te akakeu i ta ratou au pipi kia akatupu i te aroa mou tikai te ka riro ei takore i te tu akavaavaa tangata. Kare te akonoanga e akatupu ana i te aroa, ko ratou ra te tauturu ra i te akatupu i te pae ke, te akavaavaa tangata, e te pekapeka i rotopu i te au iti tangata e te pa enua. I te pae openga o tana puka Christianity and the World Religions, tata a Hans Küng, e poropeta akonoanga e: “Ko te au  manamanata poritiki tau kore e te rikarika rava atu, koia oki ko te au pekapeka ta te akonoanga i akatupu, e ta ratou i akanauru, e i akamana.”

Tetai, kua ariki ua te au orometua o te au akonoanga i te pirianga ainga i mua ake ka akaipoipo ei, e i vao ake i te akaipoipo, e i rotopu i te tane e te tane, te vaine e te vaine. Kua akatupu mai teia i te au maki viivii, te titiri pepe, te nui kare e inangaroia ana, e te ke i rotopu i te au akaipoipo e te ngutuare tangata, tei tupu mai, ko te mamae ngakau e te aue.

“Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.”​—Iakobo 1:14, 15.

E apa ana tatou pouroa e e tarevake ana, no to tatou tu apa ua e ka anoanoia kia patoi pakari “i te akatupu anga i ta te kopapa.” (Ephesia 2:3) Inara me tupu mai tetai atianga tau kia akatupu i te anoano tika kore, ka riro te reira ei mea ngata tikai. Me tuku ua atu tatou ki ta te anoano kino, e openga kino rai te ka tupu.

Tata a P. D. Mehta, e tangata tata puka e: “Te tumu no te maataanga o te taitaia, ko to tatou uaorai anoano pangia kore, anoano maata i te au mea e navenave ei e to tatou uaorai anoano tika kore, te noinoi e te anoano maata kia apinganui.” Riro te kava, te vairakau akakona, te au peu mei te peti oroenua, peti moni, te ainga e te vai atura, ei takino i te oraanga o tetai “aronga meitaki ua” e kua akatupu te reira i te taitaia ki to ratou kopu tangata, au oa, e etai atu. Me akamanako tatou i te tu apa ua o te tangata, ka akatika rai tatou ki ta te Pipiria e: “Kua kite oki tatou e, te ngunguru anake nei te au mea katoa i angaia mei te mamae anau ra e tae rava akenei i teianei rā.”​—Roma 8:22.

Te akaari maira te Pipiria e ko Satani “te atua o teianei ao” e kua piri te au vaerua kino ririnui koia oki te au temoni kiaia.​—2 Korinetia 4:4; Apokalupo 12:9.

Mei ia Satani rai, te angaanga pakari katoa nei te au temoni i te akaaere e te pikikaa i te tangata. Kua akatika katoa te apotetoro ko Paulo i teia i tona akakite anga e: “Kare oki te tangata anake ta tatou e kukumi nei, ko te au ariki katoa ra, e te aronga mana, e te au tutara o teianei ao poiri, e te au vaerua kikino i te reva nei.”—Ephesia 6:12.

Noatu te reka ra te au temoni i te tamanamanata i te tangata, kare ra ko te reira to ratou akakoroanga maata. Te inangaro ra ratou i te tarurike i te tangata mei te Atua Teitei Rava, ko Iehova. (Salamo 83:18) Te au peu mei te akara etu, angaanga manamana, purepure, ko etai ua teia o te au peu ta te au temoni e taangaanga ana ei pikikaa e ei akaaere i te tangata. No reira a Iehova i akamatakite mai ei ia tatou i teia au kino, e i oronga mai ei i te paruruanga no te aronga pouroa e patoi ra ia Satani.​—Iakobo 4:7.

Mei te rua tauatini mataiti i topa, kua totou mai te Pipiria e: “Ka tupu te kino maata i taua tuatau openga ra, kia kite mai koe.”

I te akaari mai anga e eaa te tumu i maata ai te kino i taua tuatau ra, te karanga ra te reira e: “E riro te tangata nei ei akaperepere ia ratou uaorai, ei noinoi, ei akatietie, ei nengonengo, . . . Ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra, Ei pikikaa, ei māro, ei ngakau akateitei, ei anoano i te au mea e navenave ei ra, kare i anoano i te Atua.” Papu roa e ko te tumu maata no te kino e kite nei tatou i teia tuatau koia oki, te noo nei tatou i “taua tuatau openga ra.”​—2 Timoteo 3:1-4.

No runga i te au tumu ta tatou i akamanako ana, kare ainei e taka ua ra e no teaa kare e rauka i te tangata i te takore i te kino noatu te meitaki o to ratou akakoroanga? Ka aere ra tatou kiea no te tauturu? Ka anoanoia tatou kia akara ki Tei Anga mai ia tatou, tei taputou mai e ka “akakore aia i te angaanga a te diabolo,” e te aronga e turuturu ra iaia. (1 Ioane 3:8) Ka uriuri te atikara ka aru mai i ta te Atua ka rave ei takore i te au tumu pouroa o te taitaia.