“E i te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.”​—Daniela 2:44.

Ko te Patireia o te Atua, e kavamani i runga i te rangi. Ka apai tona Tutara ikiia a Iesu Karaiti i te ngai o te au tutara tangata pouroa, e ka akapapu aia e kia raveia te anoano o te Atua i te rangi e i te enua katoa nei. (Mataio 6:9, 10) Kare tetai ua atu kavamani tangata e mono i teia kavamani no te mea ko “te basileia mutu kore [teia] o to tatou Atu o Iesu Mesia to tatou Ora.” E akapapuanga tera e ka tupu te au e mutu kore ua atu.​—2 Petero 1:11.

“Ko Satani oki tei akatutu angela katoa iaia uaorai no te mārama. Kare oki te mea va maata, kia akatutu tavini tona au tavini no te tuatua-tika; e akatauia to ratou openga i ta ratou angaanga.”​—2 Korinetia 11:14, 15.

Ka akaari puia mai te akonoanga pikikaa e e angaanga na te Tiaporo, e ka takore takiriia te reira mei te enua nei. Ka kore pouroa te tu akavaavaa e te akamaringi toto a te au akonoanga. Ka rauka pouroa i te aronga tei inangaro “i te Atua ora e te mou” kia akamori iaia i roto i te akarongo okotai e “ma te vaerua e te tuatua-mou.” Ka akatupu teia i te au e te rotai!​—1 Tesalonia 1:9; Ephesia 4:5; Ioane 4:23.

“E noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:3, 4.

Ka akatupu te Atua ko Iehova i teia na roto i tana Tamaiti ia Iesu, ko tei oronga i tona ora no te tangata nei. (Ioane 3:16) Raro i ta Iesu aratakianga,  ka oki akaou te tangata ki te turanga apa kore. Kare e taitaia akaou no te mea “E noo te Atua ki rotopu ia ratou,” e ka akakore aia “i te roimata katoatoa.” Kare e roa atu ka riro te tu apa ua e te taitaia ei mea taito; “ka riro te enua no te aronga tuatua-tika, ka noo tamou rai ratou i reira.”​—Salamo 37:29.

“Kua opu iora [Iesu Karaiti] i te taae, i taua ovi taito ra, koia oki te diabolo ra, ko Satani, kua tapeka iaia kia okotai, tausani i te mataiti. Kua uri atura iaia ki raro i te vaarua takere kore ra, e popani atura iaia i reira, tuku iora i te akairo ki rungao, kia kore aia e pikikaa akaou i te pa enua.”​—Apokalupo 20:2, 3.

Ka kore te akakeuanga kino a Satani me tapekaia aia, e me uriia te au temoni ki raro i te “vaarua takere kore,” kare takiri a ratou angaanga e rauka i te rave. Kare e rauka akaou ia ratou i te taangaanga i ta ratou akatereanga ei akaaere i te tangata. E mea pumaana tikai kia noo i roto i tetai ao kare e kite akaouia te akakeuanga a Satani e tana au angera kino!

Ka ope “taua tuatau openga ra” me tupu ta Iesu i karanga e ko te “mate maata.” Akakite aia e: “E mate maata tei te reira tuatau, kare ïa mei muatangana mai i teianei ao, e tae rava akenei i teianei rā, e kare oki a muri atu.”​—Mataio 24:21.

Te mate maata ka tupu mai e maata rava atu te reira i tetai ua atu i tupu ana i mua ana. Ka taopenga mai te reira ki te “tamaki i taua rā maata o te Atua mana katoatoa,” tei kite matauia e ko “Aramagido.”​—Apokalupo 16:14, 16.

Te aronga tei inangaro i te mea tika, te tapapa atu nei ratou i te tuatau e kore ei teia akatereanga kino. Ka akamanako ana i te au akameitakianga e vai maira no ratou i raro i te Patireia o te Atua.

“E aronga maata rava” te ka akaoraia atu ki roto i te ao ou: Te karanga ra te Tuatua a te Atua e e “aronga maata” kare e rauka kia tareia te ka “aere mai mei roto i te mate maata,” e ka akaoraia atu ki roto i tetai ao ou e te tuatua tikai. (Apokalupo 7:9, 10, 14; 2 Petero 3:13) Ka oronga ratou i te akameitakianga no to ratou ora kia Iesu Karaiti, “te Punua-mamoe a te Atua, ko tei apai ke atu i te ara a to te ao.”​—Ioane 1:29.

Maata te puapinga ka rauka mai mei te apiianga a te Atua: I roto i te ao ou, “ka ki te enua i te kite ia Iehova.” (Isaia 11:9) Ka kapiti mai teia apiianga na te Atua i te au ikuikuanga no runga i te noo au ua anga e te tangata ravarai, e te akono anga i te enua. Taputou mai te Atua e: “Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra.”​—Isaia 48:17.

Ka akatu akaouia mai to tatou au akaperepere i mate, mei roto i te vaarua: Ia Iesu i te enua nei, kua akatu akaou mai aia i tona oa ia lazaro mei te mate. (Ioane 11:1, 5, 38-44) Te akatutu maira aia e e maata roa atu tana ka rave i raro i te Patireia o te Atua.​—Ioane 5:28, 29.

Te au e te tuatua tika, ka vai rai e mutu kore ua atu: Raro i te tutaraanga a Karaiti, ka kore te aronga rave ara. Eaa to tatou kite? No te mea ka rauka ia Iesu kia kite e eaa to roto i te ngakau, e ka taangaanga aia i tona mana me akava i te aronga tuatua tika e te aronga kino. Te aronga kare e inangaro i te taui i to ratou au tu kino e kare ratou e akatikaia kia noo ki roto i te ao o te Atua.​—Salamo 37:9, 10; Isaia 11:3, 4; 65:20; Mataio 9:4.

Ta tatou i akamanako akenei, ko etai ua te reira o te au totou Pipiria e manganui e tuatua ra no runga i te tuatau umeremere roa e tu mai nei. Me akamata te Patireia o te Atua i te tutara ki rungao i te enua, “ka rekareka ratou i te maata o te au ra.” (Salamo 37:11, 29) Pouroa te au mea tei akatupu mai ana i te mamae e te taitaia ki te tangata, ka takoreia te reira. Papu tikai ia tatou no te mea te taputou maira te Atua e: “I na, te akariro nei au i te au mea ravarai ei mea ou. . . . E tuatua-mou oki teianei au tuatua e te pikikaa kore.”​—Apokalupo 21:5.