Mirioni ua atu te tangata e inangaro nei i te aere ki te rangi me mate ratou. Akakite a Iesu e ka noo tana au apotetoro tiratiratu ki reira. Mua ake ka mate ei aia, kua taputou aia e ka akateateamamao aia i tetai ngai no ratou kia noo i runga i te rangi e tona Metua.​—E tatau ia Ioane 14:2.

Eaa te tumu ka akatuakaouia mai ei te tangata mei te enua ki te oraanga i te rangi? Eaa ta ratou ka rave i reira? Akakite a Iesu ki tana au apotetoro e ka riro ratou ei au ariki. Ka tutara ratou ki rungao i te enua.​—E tatau ia Luka 22:28-30; Apokalupo 5:10.

I roto i te maataanga o te au enua, e tokoiti ua te aronga e tutara ra. I te mea e ka akatuakaou mai a Iesu i te tangata kia noo i te rangi e kia tutara i rungao i te enua, no reira te tapapa atu nei tatou e e tokoiti ua te aronga ka ikiia. (Luka 12:32) Te akakite maira te Pipiria e eaa tikai te maata o te aronga ka tutara kapiti e Iesu.​—E tatau ia Apokalupo 14:1.

Te aronga ka aere ki te rangi kare ko ratou ua te ka akameitakiia. Ka rauka katoa i te au tangata tiratiratu i raro i te Patireia o Iesu, te oraanga mutu kore i runga i te enua parataito. (Ioane 3:16) Ka ora atu tetai papaki ki roto i te Parataito me takoreia teia akatereanga kino. E ko tetai papaki, ka na roto i te tuakaouanga.​—E tatau ia Salamo 37:29; Ioane 5:28, 29.