TUMU MANAKO I TE KAPI MUA | AU PIKIKAA KIA MANAKOIA E KARE E RAUKA KIA INANGARO I TE ATUA
Tumu i Ngata ai te Inangaro i te Atua
‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa. Ko te akauenga mua teia e tei maata.’—Iesu Karaiti, 33 T.N. *
Ngata i tetai aronga i te inangaro i te Atua. Kia ratou, kua akatakake te Atua iaia, kare aia e kea mai ana, me kore e kino katoa aia. Ka akamanako ana ra i teia au tuatua:
-
“Kua pure au kia tauturu mai te Atua iaku, inara mei te mea rai e tei te atea ke ua aia iaku, kare e rauka kia akavaitata atu kiaia. Kiaku uaorai, kare o te Atua tu tangi, me kore tu aroa e te vai atura.”—Marco, Itaria.
-
“Noatu te inangaro nei au i te tavini i te Atua, inara vaitata rai e tei te atea ke ua aia. Manako au e e Atua viivii aia tei inangaro ua i te akautunga ia tatou. Kare au e irinaki ana e e tu akaperepere tona.”—Rosa, Guatemala.
-
“Toku tamarikianga, irinaki au e te kimi maira te Atua i to tatou au tarevake, e oti akautunga mai ia tatou me kua tau rai. I muri mai, manako au e kare aia e kea mai ana. Aite rai te Atua mei te parai minita te tu, te akatere ra i te iti tangata inara kare tikai aia e kea mai ana ia ratou.”—Raymonde, Kanata.
Eaa ra toou manako? Ka rauka ainei ia tatou kia inangaro i te Atua? Kua ui ana te au Kerititiano i teia uianga i te au anere mataiti. Mei te mataiti 500 ki te 1500 T.N., kare roa te maataanga i te tangata o Kerititome e pure ana ki te Atua Mana Katoatoa. No teaa ra? No te mea e mataku kino tikai to te tangata iaia. Teia ta te tangata tuatua enua ko Will Durant i akakite: “Ka akapeea ra tetai tangata ara ua nei te pure anga ki tetai Atua rikarikaia e te matakuia?”
Akapeea ake te Atua i manakoia ai e e “kino e kare aia e kea mai ana”? Eaa tikai ta te Pipiria e apii maira no runga i te Atua? Ka riro ainei te apii i te tuatua mou no runga i te Atua ei tauturu ia koe kia inangaro iaia?