“I muri tika ake i te mate anga, ka aere te vaerua o te aronga tei mate i roto i te turanga ara ki roto ia ate, te ngai ka akautungaia ratou i roto i te ‘ai mutu kore.’” (Catechism of the Catholic Church) Karanga tetai au arataki akonoanga e ko ate, e turanga takake takiri mai te reira mei ko i te Atua.

“Kare ra a te aronga i mate ra e tuatua i kitea.” (Koheleta 9:5) Me kua mate tetai tangata, ka akapeea ra aia i te kite ake anga i te mamae i roto i te “ai mate kore,” e ka akapeea ra aia te kite anga i te mamae mutu kore no tei takake mai mei te Atua?

I roto i te Pipiria, ko te kupu Epera e te Ereni e uriuri putuputuia ana e ko “ade,” te tuatua ra te reira i te vaarua tanumanga o te tangata. Ei akaraanga, te rokoia anga a Iobu e te maki kino pakari te mamae, kua pure aia e: “Naringa koe e akapipini iaku ki te vaarua [“i roto i ade,” Douay-Rheims Version].” (Iobu 14:13) Inangaro a Iobu i te akangaroi, kare ki roto i tetai ngai tamamaeanga me kore i tetai turanga takake takiri mai mei te Atua, mari ra ki roto i te vaarua tanumanga.

Kare te tu rotoriri e akavaitata atu ia tatou ki te Atua; ka akatakake ra te reira ia tatou. “Mei toku meangiti anga kua apiiia au no runga i te ai o ate,” i na Rocío ei, e noo ana aia i Mexico. “Vinivini tikai au e kare au e irinaki ana e e tu meitaki to te Atua. Manako au e te riri maira aia e kare ona akakoromaki.”

Riro te tuatua taka meitaki a te Pipiria no runga i ta te Atua akavaanga e te turanga o tei mate, ei taui i te manako o Rocío no runga i te Atua. “Rekareka tikai au e kua atea teia apainga i roto i toku ngakau,” i nana ai. “Teianei akamata au i te irinaki e te inangaro maira te Atua kia meitaki to tatou oraanga, te inangaro maira aia ia tatou, e ka rauka iaku kia inangaro iaia. Mei te metua rai aia e mou ra i te rima o tana tamariki no tona inangaro ia ratou.”​—Isaia 41:13.

Manganui tei tauta ana kia riro ei aronga akono i te Atua no te mataku i te ai o ate, inara kare te Atua e inangaro kia tavini koe iaia no te mea te vinivini ra koe iaia. Mari ra te akakite ra a Iesu e: “E anoano atu koe i toou Atua ia Iehova.” (Mareko 12:29, 30) Tetai, me kite tatou e kare ta te Atua au ravenga i teia tuatau i te mea tau kore, ka rauka ia tatou kia irinaki i tana au akavaanga a te tuatau ki mua. Mei ia Eliu te oa o Iobu, ka rauka ia tatou kia tuatua papu tikai e: “Atea ke atu te tuatua kino i te Atua; e te ara i te Mana katoatoa.”​—Iobu 34:10.