TUMU MANAKO I TE KAPI MUA | AU PIKIKAA KIA MANAKOIA E KARE E RAUKA KIA INANGARO I TE ATUA
Te Pikikaa Tei Akariro i te Atua ei Mea Ngaro
TA TE MANGANUI E IRINAKI RA
Kua ariki te akonoanga Kerititiano “i roto i tona au tuanga maata e toru, koia oki te Roman Catholicism, Eastern Orthodoxy, e te Protestantism e, ko te Atua Metua, te Atua Tamaiti, e te Atua Vaerua Tapu, okotai rai Atua. Kare teia akonoanga Kerititiano e irinaki ana e e toru au Atua ke ke, mari ra okotai rai.”—The New Encyclopædia Britannica.
TE TIKA MEI ROTO I TE PIPIRIA
Kare rava a Iesu, te Tamaiti a te Atua, i karanga ana e e aiteite aia ki te Atua me kore, okotai rai o raua kopapa e tona Metua. Kua akakite ra aia e: “Ka aere au ki te Metua ra: e maata oki toku Metua iaku.” (Ioane 14:28) Akakite katoa aia ki tetai pipi ana e: “Te aere nei au ki toku Metua ra, e ki to kotou Metua ra; ki toku Atua, e ki to kotou Atua.”—Ioane 20:17.
Kare te vaerua tapu i te tangata. Te na ko ra te irava e ko te au Kerititiano i mua ana kua ‘ki ratou ravarai i te vaerua tapu; e kua tuatua maira Iehova e: ‘E riringi atu au i taku vaerua ki rungao i te tangata ravarai.’ (Angaanga 2:1-4, 17) Kare te vaerua tapu i te tuanga no te Toru Tai. E mana ririnui te reira no te Atua.
TUMU I PUAPINGA AI
Akamarama mai te nga poropeta Katorika a Karl Rahner e Herbert Vorgrimler e, ko te Toru Tai, “kare e rauka kia kite e eaa te reira me kare i akakiteia mai, e noatu me kua akakiteia mai, kare rai e maramaia e eaa te reira.” Ka rauka ainei ia koe kia inangaro i tetai tangata kare koe i kite? Ko te apiianga o te Toru Tai, te arai ra te reira i te tangata kia kore e kite i te Atua e kia kore e inangaro iaia.
Kia Marco, tei taikuia mai i roto i tetai atikara i mua ake i teia, kua riro te Toru Tai ei arai. “Kua manako au e te uuna ra te Atua iaia mei iaku,” i nana ai, “e kua riro tera ei akamamao roa atu iaia, e ei akariro iaia ei mea muna e te ngata i te akavaitata atu.” Inara, ‘Kare te Atua i te tumu o te kononinoni pu ua.’ (1 Korinetia 14:33) Kare aia i uuna iaia mei ia tatou. Te inangaro ra aia ia tatou kia kite e koai aia. Akakite a Iesu e: “Kua kite matou i ta matou e akamori nei.”—Ioane 4:22.
“Toku kite anga e kare te Atua i te tuanga no te Toru Tai,” i na Marco ei, “i reira i rauka ai iaku i te akamou i tetai pirianga vaitata noku kiaia.” Me irinaki tatou e e Atua tika tikai a Iehova, e kare aia i tetai mea muna ngaro, ka mama roa atu kia inangaro iaia. “Ko tei kore e aroa ra, kare ïa i kite i te Atua; ko te Atua oki te aroa,” e karanga ra te Pipiria.—1 Ioane 4:8.
