“Kare a matou tika i rauka ake no runga i te uianga e me e ingoa rai to te Atua, e me e ingoa tona, eaa ra taua ingoa ra.”​—Professor David Cunningham, Theological Studies.

Akakite te Atua e: “Ko au ko Iehova; ko toku ïa ingoa.” (Isaia 42:8) Te ingoa “Iehova” e ingoa Epera, te aiteanga “Ka Akariro Aia Kia Tupu.”

Inangaro a Iehova ia tatou kia taangaanga i tona ingoa. “E kapiki atu ki tona ingoa,” e akakite ra te Pipiria. “E akakite ki te tangata i tana au ravenga, e akakite marie kotou e kua akateiteiia tona ingoa.”​—Isaia 12:4.

Kua taangaanga a Iesu i te ingoa o te Atua. I roto i te pure, kua akakite a Iesu kia Iehova e: “Kua akakite atu oki au kia ratou [ta Iesu au pipi], e e akakite atu rai au, i toou ingoa.” No teaa a Iesu i akakite ei i te ingoa o te Atua ki tana au pipi? Karanga aia e: “Ei roto ia ratou te akaperepere taau [te Atua] i akaperepere mai iaku ra, e ei roto au ia ratou.”​—Ioane 17:26.

“Tetai tangata kare i kite i te ingoa o te Atua, kare aia i kite e mei teaa tikai tona tu,” i tata ai a Walter Lowrie, te tangata kite no runga i te irinakianga Atua, “kare aia e inangaro i tetai apinga kua kite aia e kare i te mea tika tikai.”

Tetai tangata ko Victor te ingoa, e aere ana aia ki te pure i te au epetoma ravarai, inara kiaia uaorai kare tikai aia i kite i te Atua. “I na i muri mai, kua kite mai au e ko Iehova te ingoa o te Atua, aite rai ki te akaaravei angaia kiaia no te taime mua,” i karanga ai aia. “I roto iaku, ko toku aravei anga tikai teia Iaia, taku i akarongo ua mai ana. Teianei kua kite au e e Atua tika tikai Aia e ka rauka iaku i te akariro iaia ei oa noku.”

I tetai tua, te akavaitata maira Iehova ki te aronga tei taangaanga i tona ingoa. No runga i “tei manako i tona ra ingoa,” te taputou maira a Iehova e: “Naku e akaperepere ia ratou, mei te tangata e akaperepere i tana uaorai tamaiti kia tavini atu kiaia ra.” (Malaki 3:16, 17) E akameitaki katoa ana a Iehova i te aronga tei kapiki i tona ingoa. Te na ko ra te Pipiria e: “Ko te kapiki i te ingoa o te Atu ra, e ora ïa.”​—Roma 10:13.