Kare te mate i te tumu manako marekaia. Maata te tangata kare ratou e inangaro ana i te tuatua no runga i te reira. Inara penei kare e roa atu ko tatou tetai ka o ki te reira turanga. E kokoi te tara o te mate e te mamae tengatenga.

Ngata tikai ia tatou kia ariki me mate tetai akaperepere mei te metua, te tokorua, me kore te tamariki. Penei ka tupu poitirere ua mai te tumatetenga me kore ka roa. Noatu ra eaa te tu, kare e rauka i te kopae i te mamae o te mate, e mea taitaia tikai no te mea ko te openga rai te reira.

Te mate anga te papa o Antonio no tei u i te motoka, akamarama mai aia e: “Mei te mea rai e te topiripiri ra tetai tangata i toou are e oti titiri i te taviri. Kare e rauka ia koe i te oki ki te kainga, noatu no tetai atianga poto ua. Kare atu aau apinga ke mari ua ko toou manakonakoanga. Ko te turanga ou teia. Noatu ka patoi koe no te mea kare takiri e tau ana, inara kare atu aau ravenga.”

Te takake anga te tane a Dorothy, riro mai aia e vaine takaua e 47 rai ona mataiti, inara kua inangaro aia kia kite no runga i te turanga o te mate. E puapii aia no te apii Tapati, e kare roa aia e manako ana e ka ope te au mea ravarai me mate te tangata. Inara kare tikai aia i kite e eaa te tupu ana i muri ake i te mate anga te tangata. Kua ui aia ki tona orometua Anglican e, “Me mate tatou, eaa te tupu ana kia tatou?” Pau mai aia e “kare ua rai e tangata i kite.” “Tera ua ka tiaki tatou kia kite e mei teaa tikai te tu.”

Kua akautungaia ainei tatou kia ‘tiaki ua, kia kite tatou e eaa tikai te tu?’ E mataara ke atu ainei tetai ka rauka ia tatou kia kite papu tikai e me ka akaope ainei te mate i te au mea ravarai?