Te anga mai anga te Atua i te tangata, kua inangaro aia ia ratou kia ora e tuatau ua atu i runga i te enua nei ma te kore e maki e te mate. Inara, kare te tangata mua ko Adamu i akarongo ana ki Tei Anga mai iaia, e kua ngere aia i te manakonakoanga kia ora e tuatau ua atu. I te mea e e uanga tatou na Adamu, kua o atu tatou ki roto i te mate. (Roma 5:8, 12; 6:23) Kua tono mai te Atua mou ko Iehova i tana Tamaiti ko Iesu ki te enua nei, kia mate e kia rauka akaou mai i tei ngere ia Adamu.​—E tatau ia Ioane 3:16.

Na roto i te mate o Iesu i rauka ai i te akakore i ta tatou ara e kia ora ua atu tatou e tuatau ua atu. Te akaari maira te Pipiria e mei teaa rai te tu o te oraanga i runga nei i te enua ma te kore e ruaine, maki, e te mate.​—E tatau ia Isaia 25:8; 33:24; Apokalupo 21:4, 5.

I te po i mua ake ka mate ei a Iesu, kua akakite aia ki tana au pipi, kia akamaara ratou i tona mate na roto i tetai akamaaraanga tau ua. Na te rave anga i te reira i te au mataiti ka rauka ia tatou i te akamanako meitaki no runga i to Iesu e to Iehova aroa maata no te tangata ravarai.​—E tatau ia Luka 22:19, 20; 1 Ioane 4:9, 10.