I roto i te Emepera o Roma, e maata te tangata tei riro ei au tuikaa no te autu anga tamaki me kore te keia anga tangata. Kua okoia atu te au tuikaa e kare roa ratou e kite akaou i to ratou kainga e te ngutuare tangata.

E maata te au tuikaa tei maroia kia angaanga i roto i te au maina, e i taua taime rai, kua meitaki te turanga o te aronga tanutanu e te aronga akono puakatoro. Penei ka anoanoia tetai tuikaa kia tapekaia tona kaki ki te kiri auri kua tataia te tutaki ka rauka mai me oro aia e me kiteaia mai e tetai tangata e kua akaokiia aia ki tona pu. Ko te au tuikaa tei oro mei te ngai tapeka anga, penei ka tataia ki runga i tona rae te reta F, te aiteanga e tuitarere.

I roto i te puka Pipiria o Philemona, te akakite maira no runga i te apotetoro ko Paulo te akaoki anga aia i te tuikaa ko Onesimo ki tona pu, ko Philemona. Noatu kua rauka ia Philemona te tikaanga kia akautunga ia Onesimo, kua pati a Paulo ia Philemona kia ‘āriki mai iaia,’ ma te aroa e te tu oaoa.​—Philemona 10, 11, 15-18.

Ko te enua ko Phenia, tei kapikiia i teianei e ko Lebanona, kua kite matauia te reira no te takarakara purapura o Turia, aite rai te reira ki te kara vareʼau, e kua tapaia tona ingoa mei te oire ko Turia. Kua akamanea te Ariki ko Solomona o Iseraela taito i tona iero ki te “kakau purapura” tei maaniia e tetai tangata karape no Turia mai.​—2 Paraleipomeno 2:​13, 14.

E mea rongonui tikai te takarakara purapura i tera tuatau, no te mea e aka angaanga kia maani i te reira. Te mea mua, e maata te patito murex * ta te aronga tautai e koʼi ana no roto mai i te tai, no te mea mei te 12,000 patito tei anoanoia kia maani i te takarakara no tetai pona. E oti, ka kiritiia mai te patito mei tona anga e rauka ai i te rave mai i te apinga takarakara. Ka kairo te aronga maani takarakara i te reira ki te miti e ka tuku i te reira ki roto i tetai ngai ātea ua i roto i te ra no te toru ra. E oti, ka tuku ratou i te patito ki roto i tetai pani maatamaata e ka tunu i te reira ki te tai no tetai au ra.

No te au anere mataiti i topa, kua puapingaia te iti tangata Phenia no te maani anga i teia takarakara purapura. Ka kiteaia te au apinga tei maaniia ki teia tu takarakara i te pae o te Tai Metitarenia e i Cádiz, i Paniora.