“KA RAUKA iaku i te patoi i tetai ua atu apinga, inara kare e rauka iaku i te patoi i te timataanga.” Ko te manako teia no tetai au tangata no runga i te timataanga​—e reka ana ratou i te reira. Ki tetai pae ra, e enemi ïa te timataanga ta ratou ka inangaro i te autu atu. Eaa ra toou manako? Me aro atu koe ki te timataanga, ka tukutuku ua ainei koe me kore ka patoi ainei koe i te reira?

E tika, kare te au timataanga pouroa e arataki atu ki te au manamanata maata. Ei akaraanga, me kai koe i tetai keke ma te kore e pati, kare te reira e takino i toou oraanga. Inara, me tukutuku ua atu tatou ki te au timataanga te ka arataki atu ki te ainga viivii, ka tupu te tumatetenga. Te akamatakite maira te Pipiria e: “Ko tei akaturi . . . , e neneva maata ïa; ko tei akapera ra, kua ta ïa i tona uaorai vaerua.”​—Maseli 6:32, 33.

Me aro atu koe i tetai timataanga, ka akapeea koe te ariu atu anga? Te pau maira te Pipiria e: “Teia oki to te Atua inangaro, kia akatapuia kotou, e kia kore kotou e akaturi: Kia kite kotou ravarai e pini ua ake i te vaio i tona uaorai āriki ma te tapu e te ngateitei.” (1 Tesalonia 4:3, 4) Akapeea koe te akatupu anga i te maroiroi kia kore e tukutuku ua atu ki te timataanga? Akamanako ana e toru takainga te ka tauturu ia koe.

Me akamou koe i toou mata ki runga i te au tutu ainga, ka tupu toou inangaro no te au anoano tika kore. Te akapapu anga a Iesu i te pirianga i rotopu i te akara e te inangaro, kua akamatakite aia e: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” E oti kua raurau a Iesu e: “E te pekapeka na koe i toou mata katau, e koiti, e akaruke ke atu.” (Mataio 5:28, 29) Eaa te manako puapinga ta Iesu e apii mai nei ia tatou? E rauka ai i te patoi i te timataanga, ka anoanoia tatou kia kore e akamou i to tatou mata ki runga i te au tutu ainga viivii.

 Tetai akaraanga: Akamanako ana e te akara tika ra koe ki roto i tetai mori pata. Ka akara ua atu ainei koe i te mori? Kare! Ka uri ke e ka paruru koe i toou mata mei te marama o te mori pata. Mei te reira katoa, me kite koe i te au tutu ainga i roto i tetai puka, te teata, e te vai atura​—e uri ke i toou mata. Paruru i toou manako kia kore te reira e akakinoia. Kua akakite mai tetai tangata ko Juan tei akara putuputu i te au tutu ainga i mua ana e: “Me akara au i tetai vaine purotu, e inangaro ana au i te akara akaou iaia. No reira, ka tauta au kia uri ke i toku mata e ka tuatua au kiaku uaorai e: ‘E pure kia Iehova! Eiaa e tiaki!’ Muri ake i te pure, ka kore toku inangaro kia akara i te vaine.”​—Mataio 6:9, 13; 1 Korinetia 10:13.

E akamanako katoa i te akaraanga o tetai tangata akarongo mou ko Iobu tei karanga e: “Kua papau au i te koreromotu i oku nei mata: eaa ra au ka akara atu ei ki te paretenia?” (Iobu 31:1) Eaa ka kore ei e papau i tetai koreromotu mei te reira rai?

Tamata i teia: Me kite koe i tetai tutu ainga, e uri ke i toou mata. Aru i te akaraanga o te tata salamo tei pure e: “E akaariu ke i toku mata kia kore e akara i te mea puapinga kore.”​—Salamo 119:37.

No te mea e aronga apa tatou pouroa, tetai taime e ngata ia tatou i te kopae i te au anoano tika kore. Te akakite maira te Pipiria e: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara.” (Iakobo 1:14, 15) Akapeea koe me patoi i te au anoano tika kore tei ngata i te kopae?

Me tupu te au anoano tika kore i roto ia koe, eiaa e ngaropoina e ka rauka ia koe i te iki akapeea me ariu atu ki te reira. E tauta pakari i te kiriti mai i taua au anoano tika kore mei toou manako. E kopae i te anoano kia akamanako ua rai no runga i te ainga tau kore. Kua akakite tetai tangata ko Troy, tei akara putuputu i te au tutu ainga viivii i runga i te Initaneti e: “Kua tauta pakari au kia akakore i te au manako kino na te akamou anga i toku manako ki runga i te au mea meitaki. Kare te reira i te mea mama ua i te rave. Maata te taime, kua akara akaou au i te au tutu ainga viivii. I te openga ra, kua kite au e akapeea me akatere meitaki i toku manako.” Kua akamaara tetai vaine ko  Elsa, kua ngata iaia i te patoi i te au timataanga i tona mapu anga e, “Na te rave maata anga i te angaanga a Iehova e te pure anga kiaia, kua rauka iaku i te kopae i te au manako tarevake.”

Tamata i teia: Me tupu te au manako tika kore i roto ia koe, akakore viviki i te reira e e pure kia Iehova. Ka rauka ia koe i te autu atu i te au manako tika kore na te akamanako anga ki runga i “te au mea mou ra, te au mea tau meitaki ra, te au mea tika ra, te au mea viivii kore ra, te au mea rekarekaia ra, te au mea rongo meitaki ra, te vai ra tetai meitaki, te vai ra tetai mea paapaaia ra, e akamaara i taua au mea ra.”​—Philipi 4:8.

Me kapitiia mai te au anoano, te timataanga, e te au atianga, ka mama ua no te kino kia tupu mai. (Maseli 7:6-23) Akapeea koe e kore ei e o atu ki roto i te kino?

Te ako maira te Pipiria: “E kite mamao te tangata pakari i te kino, e kua pipini iora; te aere ua atura te kite kore, e mate atura.” (Maseli 22:3) No reira, e paruru i toou aerenga. E tapapa i te au mea te ka akatupu i te manamanata, e e kopae i te reira. (Maseli 7:25) Kua tuatua tetai tangata ko Filipe tei akamutu i te akara i te au tutu ainga viivii e: “E tuku ana au i ta matou komupiuta ki tetai ngai ka kiteaia e te tangata, e kua kopi mai au i tetai porokaramu te ka arai i te au apinga kino i runga i te Initaneti. E aere ana au ki runga i te Initaneti i te tuatau ua me tei te kainga toku ngutuare tangata.” Kua kite a Troy tei taikuia i mua ana e: “E kopae ana au i te au teata tau kore e te kapiti anga atu ki te aronga tei tuatua viivii no runga i te ainga. Kare au e inangaro kia o atu ki roto i te turanga kino.”

Tamata i teia: E akara i toou au tu paruparu, e e parani meitaki kia kopae i te au turanga te ka maani ia koe kia tukutuku ua ki te timataanga.​—Mataio 6:13.

Akapeea me tauta pakari koe i te patoi i te au timataanga, inara ka paruparu koe e ka tuku ua koe ki te timataanga? Auraka e tuku i te au. Te akakite maira te Pipiria e: “Kia taki itu ua atu te inga anga o te tangata tuatua-tika, e tu akaou mai aia.” (Maseli 24:16) Ae, te akamaroiroi maira to tatou Metua i te rangi ia tatou kia “tu akaou mai.” Ka ariki ainei koe i tana tauturu? Auraka e tukutuku ua i te pure Kiaia. E akamatutu i toou akarongo na te apii anga i tana Tuatua e na te aere putuputu anga ki te au uipaanga Kerititiano. Te taputou maira te Atua kia koe e: “E akamaroiroi au ia koe; koia ïa, e tauturu au ia koe.”​—Isaia 41:10.

Kua akakite a Cody tei taikuia i mua ana e: “E maata te tautaanga tei anoanoia kia kopae i te akarakara i te au tutu ainga. Tetai au taime, kua turori au, inara ma te tauturu a te Atua, kua akamutu au i te akara i te au tutu ainga.” Akakite a Dylan tei taiku katoaia i mua ana e: “E mea mama ua kia piri maua ko toku oa angaanga ki roto i te ainga. Inara kua karanga au kiaia e ‘Kare!’ Mataora au no te mea e manako ngakau mā toku. Te mea puapinga maata atu, kua kite au e kua akamareka au ia Iehova.”

Me kopae koe i te au timataanga, ka papu ia koe e te akamareka ra koe i te Atua!​—Maseli 27:11.