E vaerua kitea koreia te Atua. Kua anga aia i te rangi, te enua, e te au mea ora ravarai. Kare tetai ua atu tangata i anga i te Atua, no te mea kare Ona akamataanga. (Salamo 90:2) Inangaro te Atua kia kimi te tangata iaia e kia kite i te tuatua mou no runga iaia.​—E tatau ia Angaanga 17:24-27.

Ka rauka ia tatou i te kite i te ingoa o te Atua. Ka rauka katoa i te apii no runga i tona au tu me akara tatou i te au mea tana i anga. (Roma 1:20) Inara e rauka ai ia tatou i te kite tikai no runga i te Atua, ka anoanoia tatou kia apii i tana Tuatua, te Pipiria. I reira ka kite tatou i te tu aroa o te Atua.​—E tatau ia Salamo 103:7-10.

Te rikarika ra a Iehova i te tu tau kore. Pera katoa, kua anga Aia i te tangata i roto i tona uaorai tu. (Deuteronomi 25:16) Ko te tumu te reira e rikarika ana tatou i te tu tau kore. Kare ko te Atua te tumu i tupu ei te tu tau kore takapini ia tatou. Kua oronga mai te Atua i te tu rangatira ki te tangata kia iki i te tika e te tarevake. Te mea tangi ra, kare te tangata e taangaanga meitaki ana i to ratou tu rangatira e e rave ra ratou i te au mea kino. Kua “ongoongo rava akera” to Iehova ngakau.​—E tatau ia Genese 6:5, 6; Deuteronomi 32:4, 5.

Te inangaro ra a Iehova i te tu tika, e ka takore aia i te tu tau kore. (Salamo 37:28, 29) Te taputou maira te Pipiria e kare e roa atu ka akaope te Atua i te au tu tau kore ravarai.​—E tatau ia 2 Petero 3:7-9, 13.