Penei i ui ana koe i teia, ‘Me kua kite te Atua i te au mea ravarai, toku au manako e toku au anoano, eaa ra au ka pure ei?’ E uianga meitaki te reira. Akakite mai a Iesu e: “Kua kite ana to kotou Metua i te au mea e tau ia kotou, ou kotou i pati atu ei.” (Mataio 6:8) Ko teia ta te Ariki ko Davida o Iseraela i taito i marama, e kua tata aia e: “Kare rava oki e tuatua o roto i toku vaa, i toe i te kitea puia e koe, e Iehova.” (Salamo 139:4) No reira, eaa ra tatou ka pure ei ki te Atua? Ei pau i teia uianga, ka uriuri tatou i ta te Pipiria e akakite maira no runga i te pure. *

I te mea e te karanga ra te Pipiria e kua kite te Atua ko Iehova * i te au mea ravarai, akaari katoa te reira e kare Aia e inangaro kia kite i te au manako ua no runga i tona aronga akamori. (Salamo 139:6; Roma 11:33) Kare aia e aite ana ki tetai roro uira tei akaputu ua i te kite no runga i te tangata. Mari ra, te inangaro tikai ra te Atua i te kite i to tatou manako ngakau no te mea te inangaro ra aia ia tatou kia akavaitata atu kiaia. (Salamo 139:23, 24; Iakobo 4:8) Ko teia te tumu i akamaroiroi ei a Iesu i tana au pipi kia pure, noatu kua kite takere tona Metua i ta ratou e anoano ra. (Mataio 6:6-8) Me pure ua rai tatou kia Iehova, ka akavaitata atu tatou kiaia.

Tetai taime, penei kare tatou e kite e eaa ta tatou ka pati me pure tatou. Me koia ia, kia akamaara e ka rauka i te Atua i te akara mai ki roto i to tatou ngakau e ka taangaanga aia i tona kite oonu no runga i to tatou turanga kia oronga mai i ta tatou e anoano ra. (Roma 8:26, 27; Ephesia 3:20) Me kite tatou e kua tauturu mai te Atua ia tatou, ka piri vaitata atu tatou kiaia.

Te akapapu maira te Pipiria e ka pau mai te Atua Mana Katoatoa i te pure a tona au tavini akarongo mou, inara e au tumuanga tetai kare aia e akarongo ana ki tetai au pure. Ei akaraanga, i te tuatau e maata tikai te takinga kino i Iseraela i taito, kua akauru te Atua i te peroveta ko Isaia kia akakite ki te iti tangata e: “Kia akamaata kotou i te au pure, kare au e akarongo atu; kua ki oki to kotou rima i te toto.” (Isaia 1:15) Te taka ua ra e, kare te Atua e akarongo ana i te pure a te aronga tei kopae i tana au ture e tei pure ma te akakoroanga tau kore.​—Maseli 28:9; Iakobo 4:3.

Te akakite katoa maira te Pipiria e: “Kia pati ua atu tatou i te au mea ravarai i tau iaia ra, te akarongo maira aia ia tatou.” (1 Ioane 5:14) Tera ra, ko te aiteanga ainei e ka pau te Atua i te au pure ravarai a tona au tavini? Kare. Akamanako ana i te akaraanga o te apotetoro ko Paulo. Kua pati akatenga aia e toru taime ki te Atua kia akaatea i ‘tetai tara i roto i tona kopapa.’ (2 Korinetia 12:7, 8) Penei kua tu a Paulo i tetai maki kino i roto i tona mata. Me koia ia, papu e kua mamae tikai te reira! Kua akamanaia a Paulo kia akaora i te au maki e kia akatuakaou mai i tetai tangata tei mate, inara kua anoanoia aia kia akakoromaki i tona uaorai tu maki. (Angaanga 19:11, 12; 20:9, 10) Noatu kare tana au pure i pauia na roto i te mataara tana i inangaro, kua ariki rekareka a Paulo i te tauturu ta te Atua i oronga mai.​—2 Korinetia 12:9, 10.

E tika, kua pauia te au pure a tetai aronga i roto i te Pipiria na roto i te temeio. (2 Ariki 20:1-7) Inara kare rai teia au pauanga i te mea matau i te reira tuatau. No tetai aronga akamori, kua manamanata ratou no te mea i te akara anga, kare te Atua i pau mai i ta ratou pure. Kua ui te Ariki ko Davida e: “Mei te aa ra te roa o to akangaropoina anga iaku, e Iehova? e tuatau ua atu?” (Salamo 13:1) Inara te kite anga a Davida e kua tauturu a Iehova iaia, kua akapapu akaou aia i tona irinaki ki roto i te Atua. I roto i taua pure ra, kua akakite a Davida e: “Te irinaki nei ra au i te aroa noou ra.” (Salamo 13:5) Mei ia Davida rai, penei ka anoanoia te au tavini o te Atua i teia tuatau kia tamou marie tikai i te pure kia kite ratou e kua pau mai te Atua i ta ratou pure.​—Roma 12:12.

Ka oronga mai te Atua i ta tatou e anoano ra.

Kare te au metua e oronga ua ana i te au mea ta te tamariki ka pati, i te tuatau i pati ei ratou i te reira. Mei te reira katoa, penei kare te Atua e oronga mai i ta tatou e pati ra na roto i te mataara ta tatou i inangaro e i tapapa. Inara ka rauka ia tatou i te irinaki e mei tetai metua aroa rai, ka oronga mai te Atua i ta tatou e anoano ra i te tuatau tau, e na roto i te mataara tika.​—Luka 11:11-13.

Ka pau mai te Atua na roto i te au ravenga manako koreia.

Inara, akapeea me pure ua rai tatou kia akaateaia tetai manamanata? Ka manako ainei tatou e no te mea kare teia manamanata i akaateaia, kare a Iehova i pau mai i ta tatou pure? Kare, mari ra e mea meitaki no tatou kia akamanako e me kua tauturu te Atua ia tatou na roto i tetai mataara manako koreia. Ei akaraanga, penei kua tauturu mai tetai oa meitaki ia tatou i te taime tau tikai. (Maseli 17:17) I toou manako, kua akakeu ainei a Iehova i toou oa kia tauturu mai ia koe? Kapiti mai ki te reira, ka pau mai te Atua i ta tatou pure na roto i te Pipiria. I roto i te Pipiria, ka rauka ia tatou i te kite oonu tei anoanoia kia akakoromaki i tetai turanga ngata.​—2 Timoteo 3:16, 17.

Noatu me kare te Atua e akakore ana i te au manamanata o tona iti tangata, e oronga ua ana aia i te maroiroi tei anoanoia kia akakoromaki i te reira. (2 Korinetia 4:7) Ei akaraanga, te pati anga a Iesu i tona Metua kia akakore i tetai turanga ngata no te mataku e ka akakinoia te ingoa o te Atua, kua tono a Iehova i tetai angera kia akamaroiroi i tana Tamaiti. (Luka 22:42, 43) Mei te reira katoa, penei ka akakeu te Atua i tetai oa piri vaitata kia oronga mai i te tuatua akamaroiroi i te tuatau tikai e anoano ra tatou i te reira. (Maseli 12:25) No te mea ka pauia teia au pure na roto i te mataara manako koreia, ka anoanoia tatou kia akara meitaki i te au mataara ta te Atua ka pau i ta tatou au pure.

Ka pau te Atua i tetai au pure i te tuatau tau tikai.

Te akakite maira te Pipiria e ka akaari te Atua Mana Katoatoa i tona akaperepereanga ki te aronga akaaka, “i te tuatau tikai” e tau iaia. (1 Petero 5:6) No reira, me manako koe e kare taau au pure ngakau tae e pauia mai, eiaa e manako e kare a Iehova e manako maira ia koe. Mari ra, ka akamanako aia i ta tatou au patianga e ka tauturu mai aia ia tatou na roto i te mataara tana i kite e ko te mea meitaki rava atu ia no tatou.

Ei akatutuanga: Akamanako ana e kua pati taau tamaiti ia koe kia oko mai i tetai patikara takatakai nona. Ka oronga ua ainei koe i tana i pati mai? Me manako koe e kare e rauka i taau tamaiti i te akono i tona patikara, penei kare koe e oko vave i te reira. Inara i te tuatau ka aereia, penei ka akatika koe i tana patianga me manako koe e ka rauka iaia i te akono i tona patikara. Mei te reira katoa, me pure putuputu tatou, ka oronga mai te Atua i ta to tatou “ngakau e anoano ra” i te tuatau tau tikai.​—Salamo 37:4.

Te raurau maira te Pipiria i te au Kerititiano mou kia kore e akangaropoina i te puapinga o te pure. Inara, penei ka karanga tetai pae e kare ratou e puapingaia mei te pure. E tika, me te na roto ra tatou i tetai turanga ngata me kore tetai manamanata, penei ka ngata rai i te tiaki i te Atua kia pau mai i ta tatou pure. Inara e mea meitaki no tatou kia akamaara i ta Iesu i apii mai no runga i te puapinga kia tamou marie tikai i te pure.

 Kua akakite a Iesu i tetai parapore no runga i tetai vaine takaua tei aere ua rai ki tetai akava kino kia akatika mai i tona turanga. (Luka 18:1-3) Noatu kare te akava i tauturu ana i te vaine takaua i mua ana, kua karanga aia kiaia uaorai e: “E akatika atu au i tana tuatua, ka manamanata aea au iaia i te aere putuputu anga mai.” (Luka 18:4, 5) Kia tau ki te reo taito o teia irava, kua akarongo atu te akava ki te vaine takaua kia kore aia e “moto [i te akava] i raro ake i tona mata” koia oki, kia kore te vaine takaua e “akakino i [tona] taoonga.” * No reira, me ka tauturu tetai akava kino i tetai vaine takaua no te mataku i ta etai ke ka manako no runga iaia, papu tikai ia tatou e ka tauturu mai te Atua i te aronga “tei kapiki atu iaia i te po e te ao”! Mei ta Iesu i akakite mai, “kare rava e mamia, e akatika mai [te Atua] ia ratou” koia oki, ka tauturu te Atua ia ratou.​—Luka 18:6-8.

Noatu me ka roiroi tatou i te pure no te tauturu a te Atua, eiaa tatou e akamutu. Me tamou marie tikai tatou i te pure, te akaari ra te reira i to tatou inangaro maata i te kite i to te Atua rima i roto i to tatou oraanga. Ka rauka katoa ia tatou i te kite i ta te Atua pauanga ki ta tatou au pure, e te ka tupu mai, ka piri vaitata atu tatou kiaia. Ae, ka rauka ia tatou i te irinaki papu e ka pau mai a Iehova i ta tatou au pure tei tau ki tona anoano.​—Luka 11:9.