I TETAI tuatau i topa, kua tataia tetai atikara i roto i te nuti pepa Korea ko The Chosun Ilbo. Kua ui teia atikara e: “‘Te Vaine Meitaki ko Shim Cheong,’ Kare i Kite ia Iesu—Tei Roto Ainei Aia i te aʼi Era?”

E atikara taee teia no te mea e vaine meitaki a Shim Cheong i roto i tetai tua Korea, tei akaatinga i tona oraanga kia tauturu i tona metua tane matapo. No tetai au mataiti, kua akaepaepaia aia. I Korea, kua riro a Shim Cheong ei akaraanga meitaki no te au tamaine.

Ki te manganui o te tangata, kare e tau ana e e kino tikai te manako e ka akautungaia tetai vaine meitaki i roto i te aʼi era no tei kore aia i papetitoia ei Kerititiano. Tera tetai, kua tupu teia tua i mua roa ake ka tae mai ei te karere no te Karaiti ki tona oire.

Kua kapitiia ki teia atikara te uiuianga ki tetai orometua. Kua uiia kiaia e me kua akautunga pouroa ia te aronga i mate ki roto i te aʼi era noatu e kare ratou i apii no runga ia Iesu. Eaa tana pauanga? “Kare tatou i kite. Te irinaki ua nei tatou e e akakoroanga to te Atua [no taua aronga ra].”

Kua akakite The New Catholic Encyclopedia e: “Ka anoanoia te papetitoanga no te ora. Mei ta te Karaiti i tuatua e, kia kore te tangata e anau akaouia ki te vai e te Vaerua Tapu, kare aia e o atu i te Patireia o te Atua (Ioa 3.5).” No teia tumu, kua irinaki tetai pae e ko te aronga tei mate e kare i papetitoia, ka tiria ki roto i te aʼi era, me kore ka tamamaeia i muri ake i te matenga.

Manganui te aronga e manako ra e e kino tikai teia irinakianga. Mirioni ua atu te tangata tei mate, kare i kite i te Pipiria. Ka tau ainei ratou kia tamamaeia e mutu kore ua atu? Eaa ta te Pipiria e akakite maira no te reira?

Te akakite atea maira te Pipiria e kare te Atua e kopae i te aronga kare i kite i tana e umuumu maira. Te akapapu maira te puka o Angaanga 17:30 ia tatou e: “Kare atura te Atua i akono i taua au tuatau kite kore.” Eaa i reira te manakonakoanga ta te Pipiria e oronga maira no te aronga i mate, kare i apii ana no runga i te Atua?

Ka kitea te pauanga i roto i te tuatua a Iesu ki te tangata kino tei mate i te pae mai iaia. Kua karanga taua tangata ra kia Iesu e: “E akamaara mai koe iaku, kia tae koe ki toou basileia.” Eaa ta Iesu pauanga? “Koia mou taku e karanga atu kia koe nei, ei Paradaiso taua katoa i teianei rai rā.”—Luka 23:39-43.

Te taputou ra ainei a Iesu ki taua tangata ra e ka aere aia ki te rangi? Kare. Kare taua tangata ra i “anau akaou” ki te vai e te vaerua tapu, tei umuumuia i mua ake ka tae ei tetai tangata ki te Patireia o te rangi. (Ioane 3:3-6) Mari ra, kua taputou a Iesu ki taua tangata kino ra e ka ora akaou aia i Parataito. No te mea e tangata ngati Iuda aia, papu e kua kite aia i te Parataito enua—te aua o Edene—i roto i te puka mua o te Pipiria. (Genese 2:8) Kua oronga te taputou a Iesu kiaia i tetai manakonakoanga papu tikai no te tuakaouanga i roto i te Parataito me akatupuia te reira i te enua nei.

Ko te tika, kua taputou te Pipiria “e e tuakaouanga to tei mate, te aronga tuatua-tika e te aronga tuatua-tika kore.” (Angaanga 24:15) Ko “te aronga tuatua-tika kore,” koia oki ko te aronga kare i kite i te au turanga tuatua tika o te Atua, no te mea kare ratou i kite i te anoano o te Atua. Ka akatuakaou a Iesu i te tangata “tuatua-tika kore” tei tuatua kiaia, e penei e mirioni, me kore e pirioni ua atu tangata tei mate, kare i kite i te Atua. I reira, i roto i te enua Parataito, ka apii ratou i te au umuumuanga a te Atua e ka rauka ia ratou te tikaanga i te akapapu i to ratou inangaro no te Atua, na te akono anga i tana au akauenga.

Me akatuakaouia te aronga tuatua-tika kore, ka akavaia ainei ratou no te au angaanga ta ratou i rave  i mua ana? Kare. Te akakite ra a Roma 6:7 e: “Ko te tangata oki i mate ra, kua matara ïa aia i te kino nei.” Ka tutakiia te ara a te aronga tuatua-tika kore me mate ratou. No reira, ka akavaia ratou no ta ratou ka rave i muri ake i to ratou tuakaouanga, kare e no to ratou kite kore i mua ake ka mate ei. Akapeea ratou e puapinga ai?

Muri ake i te tuakaouanga, ka orongaia te tikaanga no te aronga tuatua-tika kore kia apii i te au ture a te Atua i roto i te au puka akatutu ua me eeuia te reira. E oti, ka akavaia ratou no “ta ratou au angaanga,” koia oki, me ka akono ratou i te au ture a te Atua, me kare. (Apokalupo 20:12, 13) No te maataanga o te aronga tuatua-tika kore, ko te taime mua tikai teia i orongaia ai tetai atianga no ratou kia rauka te ora mutu kore i te enua nei na te apii e te rave anga i te anoano o te Atua.

Na teia apii Pipiria i tauturu i te manganui kia akatupu i te akarongo i roto i te Atua. Ko Yeong Sug tetai ia ratou. Kua utuutuia aia i roto i te akonoanga Katorika. Tetai au mema o tona ngutuare tangata, e au orometua ratou. No tona inangaro kia riro mai ei paretenia, kua aere aia ki te ngai o te au paretenia. Muri mai, kua akaruke aia i taua ngai ra no tana i kite e tupu ra i reira. Tei maata atu, kare i rauka iaia te ariki i te apii no te aʼi era no te mea kua manako aia e kare te reira e tau ana, e kare i te tu aroa i te tamamae i te tangata i roto i te aʼi era.

I tetai ra, kua akaari tetai Kite o Iehova kia Yeong Sug i teia irava i roto i te Pipiria: “Kua kite oki te aronga e ora nei e ka mate ratou: kare ra a te aronga i mate ra e tuatua i kitea: kare oki a ratou tutaki toe i te enua nei.” (Koheleta 9:5) Kua tauturu teia Kite no Iehova iaia kia kite mai e kare tona ai tupuna e tamamaeia ra i roto i te aʼi era. Mari ra, te moe ra ratou i roto i te vaarua, e te tiaki atura no te tuakaouanga.

I te kite anga e e maata te tangata kare rava i akarongo ana i te tuatua mou a te Pipiria, kua akono a Yeong Sug i te tuatua a Iesu i roto ia Mataio 24:14 e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira.” I teianei te rave ra aia i te angaanga tutu aere i te tuatua meitaki e te akakite ra i tona manakonakoanga mataora i roto i te Pipiria ki te tangata.

Te akakite maira te Pipiria e: “Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” (Angaanga 10:34, 35) Ko te tu tau apa kore tikai teia ta tatou ka tatari atu i te Atua, tei “inangaro . . . i te tuatua-tika e te tuatua-tau.”—Salamo 33:5.