Te akakite tika maira te Pipiria i ta Iehova raua ko tana Tamaiti ko Iesu Mesia ka rave no runga i te kino ta Satani te Tiaporo i akatupu ki te tangata. Te na ko ra te Pipiria e: “No reira i akakiteia mai ei te Tamaiti a te Atua ra [ko Iesu], kia akakore aia i te angaanga a te diabolo ra.” (1 Ioane 3:8) Ka akakoreia te akatereanga o teia ao tei ki i te tu noinoi, te makitakita, e te au angaanga rikarika. Akapeea ra “te ariki o teianei ao,” ko Satani te Tiaporo? Kua taputou mai a Iesu e ka uriia aia ki vao. (Ioane 12:31) Me akaateaia a Satani, ka akanooia i reira te ao ou tuatua tika, e ka kī te enua i te au.—2 Petero 3:13.

Akapeea ra te aronga kare e inangaro i te taui i to ratou tu, e ka rave ua atu rai i te kino? Akamanako ana i teia taputou taka meitaki: “Na te aronga tiratiratu oki e noo i te enua, e te aronga apa kore te ka akatinamouia ki reira; Ka tipu keia ra te aronga kino i te enua nei, e te aronga rave ara ra, ka kiriti tumuia ïa.” (Maseli 2:21, 22) Kare roa te aronga kino e akakeu akaou i te tangata. Raro ake i taua turanga ponuiaau ra, aere ua rai, ka akarangatiraia te au tangata akarongo mei te kino.—Roma 6:17, 18; 8:21.

I roto i taua ao ou ra, ka akapeea te Atua me akakore i te kino? Kare e na te akakore anga i te tu rangatira o te tangata e te akariro anga ia ratou ei matini. Mari ra, ka apii aia i te aronga akarongo mou i tona au arataa, e ka tauturu ia ratou kia akaruke i to ratou au manako kino e te aerenga kino.

Eaa ta te Atua ka rave no te au tupuanga kino manako koreia? Kua taputou aia e kare e roa atu, na tona kavamani Patireia e akatere i te enua. Ko Iesu Mesia tei akatainuia e te Atua, te Ariki o taua Patireia ra, e tei iaia te mana i te rapakau i te maki. (Mataio 14:14) E mana katoa to Iesu i te akaaere i te au tupuanga natura. (Mareko 4:35-41) No reira, ka akakoreia te mamae no te au tupuanga o te “tuatau ra, e te manuia ua.” (Koheleta 9:11) Raro ake i te tutaraanga a te Mesia, kare te tangata e rokoia akaou e te tumatetenga.—Maseli 1:33.

Eaa te ka tupu ki te au mirioni tangata meitaki tei mate no te au tupuanga tumatetenga? Mua poto ua ake ka akatuakaou ei a Iesu i tona oa ko Lazaro, kua karanga aia e: “Ko au te tuakaouanga, e te ora.” (Ioane 11:25) Ae e mana to Iesu i te akatuakaou mai i te aronga tei mate!

Me reka koe i te manakonakoanga kia noo ki roto i tetai ao kare roa te kino e tupu ki te aronga meitaki, eaa koe ka kore ei e apii maata atu no runga i te Atua mou e tona akakoroanga i roto i te Puka Tapu? Ka rekareka te Au Kite o Iehova i roto i toou ngai i te tauturu ia koe kia rauka taua kite ra. Te pati pumaana atu nei matou ia koe kia aravei mai ia matou me kore kia tata mai ki te aronga nenei o teia makatini.