E 35 o Smita * mataiti e e noo ana aia ki Dhaka, i Bangladesh. E vaine aroa aia e te takinga meitaki. Kua kite te tangata e e vaine angaanga maroiroi aia e te mataora e kua inangaro i te tauturu i etai ke kia kite i tana i mou mai no runga i te Atua. Poitirere tikai tona ngutuare tangata e tona au oa e kua tu a Smita i tetai maki kino e kua mate i taua epetoma rai!

Ko James e tana vaine, e nga tokorua mei te 30 o raua mataiti, aiteite to raua tu ki to Smita. I tetai ra, kua aere atu raua ki te tua opunga o Marike i te atoro i to raua au oa. Kare raua i oki ana ki to raua kainga i New York no te mea kua ū to raua motoka e kua mate raua. Kua mii tikai te au taeake akaperepereia e to raua au oa angaanga ia raua.

E mea matau i te kite i te tu kino e te mamae e tupu maata ra i teia tuatau. Te tamate ra te tamaki i te au tangata e te tamariki, pera te au vaeau. Te takino ra te aronga rave kino e te tā ua i te aronga meitaki. Te tupu ra te au tumatetenga e te au maki kino ki tetai ua atu tangata, noatu tona mataiti e tona turanga i roto i te oraanga. E takore ana te au tumatetenga natura i te au oire katoa. Kua koropiniia tatou e te tu papaki tai e te tu tika kore. Penei kua tupu ana tetai o teia au kino kia koe.

Te ka tupu mai, penei ka ui koe i teia au uianga:

• Eaa te tumu i tupu ei te kino ki te aronga meitaki?

• Ka tau ainei kia akaapa i te Atua no teia au mea kino?

• E mea tupu poitirere ua ainei te au tumatetenga, me na te tangata te reira i akatupu?

• Ko te Karma ainei, koia oki ko te kino ta tetai i rave i roto i tetai oraanga i mua ana, tei akatupu i te kino ki te tangata?

• Me e Atua ririnui tetai, eaa te tumu i kore ei aia e akaora i te aronga meitaki?

• Ka kore ainei te au tu kino e te mamae?

Kia pau i teia au uianga, ka anoanoia tatou kia marama i te pauanga ki teia nga uianga puapinga: Eaa te tumu i tupu ei te au mea kino? Eaa ta te Atua ka rave?